Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Ebʼ li naʼlebʼ li nintzol saʼ li Santil Hu

 TZOLOM 43

Namaakobʼk li awabʼej David

Namaakobʼk li awabʼej David

Naq laj Saul kikamk, laj David kikanaak choʼq awabʼej. Wank chaq 30 chihabʼ re. Kinumeʼk naabʼal chihabʼ ut, saʼ jun qʼoqyink, laj David wank saʼ xtaqeʼqil rochoch naq kiril jun chaqʼal ru ixq. Laj David kixnaw naq li xkʼabʼaʼ li ixq aʼin aʼan xBat-Seba ut sumsu rikʼin laj Urias jun laj puubʼ. Tojaʼ naq, laj David kixtaqla xkʼambʼal chaq xBat-Seba, kiwank rikʼin, ut kikanaak saʼ yuʼam. Laj David kixyal xmuqbʼal li kixbʼaanu. Joʼkan naq, kixye re li najolomink rehebʼ laj puubʼ naq tixkʼe laj Urias chiru li yalok, ut chirix chik aʼan teʼelq chixkʼatq ut teʼxkanabʼ xjunes. Laj Urias kikamk saʼ li yalok aʼin, ut chirix chik aʼan, laj David kisumlaak rikʼin xBat-Seba.

Abʼan, li Jehobʼa kiril chixjunil li maaʼusilal li xbʼaanumank. Kʼaru tixbʼaanu li Jehobʼa anaqwan? Kixtaqla laj Natan, li propeet, chi aatinak rikʼin laj David. Laj Natan kixye re: «Kiwank jun li winq bʼihom naabʼal xkarneer, ut jun li winq nebʼaʼ jun ajwiʼ xkarneer li jwal naxra. Li bʼihom kixmaqʼ li xkarneer li nebʼaʼ». Naq laj David kirabʼi aʼin, kʼajoʼ naq kichalk xjosqʼil ut kixye: «Li bʼihom aʼin xkʼulubʼ kamk!». Tojaʼ naq, laj Natan kixye re: «Laaʼat chanchanat li bʼihom aʼin!». Laj David kʼajoʼ naq kirahoʼk saʼ xchʼool ut kixye re laj Natan: «Xinmaakobʼk chiru li Jehobʼa». Li maak aʼin, kixkʼam chaq naabʼal li chʼaʼajkilal saʼ xbʼeen laj David ut saʼ xbʼeen ajwiʼ li xjunkabʼal. Li Jehobʼa kixkʼe chi xtojbʼal xmaak laj David, abʼan inkʼaʼ kixkamsi xbʼaan naq inkʼaʼ kixmuq li xmaak ut kixkubʼsi xwankil.

Laj David kiraj xyiibʼankil li rochoch li Jehobʼa. Abʼan li Jehobʼa kixsikʼ ru laj Salomon, li ralal laj David, re naq aʼan tyiibʼanq re. Joʼkan  naq, laj David kiʼok xkʼubʼankil li tkʼanjelaq chiru laj Salomon ut kixye: «Li rochoch li Jehobʼa tento naq chaqʼalaq ru. Laj Salomon toj saaj, abʼan laaʼin tintenqʼa chi xkʼubʼankil chixjunil». Laj David kixkʼe naabʼal xtuminal li rochoch li Yos. Kixsikʼ ebʼ laj kʼanjel li nekeʼxnaw kʼanjelak, kixchʼutubʼ oor ut plaat ut kixkʼam chaq ebʼ li cheʼ cedro re li tenamit Tiro ut Sidon. Naq yook chaq chi nachʼok li xkamik laj David, kixkʼe re laj Salomon xhuhil li rochoch li Yos ut kixye re: «Li Jehobʼa xkʼe we li naʼlebʼ aʼin re naq tintzʼiibʼa ut tinkʼe aawe. Aʼan ttenqʼanq aawe. Matxuwak. Tento naq kawaq aachʼool ut taabʼaanu li kʼanjel».

«Li naxmuq li xmaak moko us ta t-elq, abʼan li naxye li xmaak ut naxtzʼeqtaana t-uxtaanaaq ru» (Proverbios 28:13).