Laj Eli, li xyuwaʼil aj tij, wank wiibʼ li ralal: laj Hofni ut laj Finehas. Ebʼ li ralal wankebʼ choʼq aj tij ut nekeʼkʼanjelak saʼ li naʼaj re loqʼonink. Abʼan inkʼaʼ nekeʼxpaabʼ chaq li xchaqʼrabʼ li Jehobʼa ut jwal nekeʼnumtaak ajwiʼ saʼ xbʼeenebʼ li poyanam. Naq ebʼ laj Israel nekeʼxkʼam li mayej choʼq re li Jehobʼa, laj Hofni ut laj Finehas nekeʼxchap li xchaqʼalil ru li tibʼ choʼq rehebʼ. Laj Eli naxnaw naq inkʼaʼ us xnaʼlebʼebʼ li ralal, abʼan moko kixqʼusebʼ ta. Ma wank tawiʼ kʼaru tixbʼaanu li Jehobʼa naq nakaaye?

Usta laj Samuel jwal kachʼin xchihabʼ chiru laj Hofni ut laj Finehas, inkʼaʼ naxbʼaanu li maaʼusilal joʼebʼ aʼan. Joʼkan naq, li Jehobʼa jwal sa chaq saʼ xchʼool rikʼin. Saʼ jun qʼoqyink, laj Samuel yook chi wark ut kirabʼi naq yook chi bʼoqeʼk. Kiwakliik, kiʼaanilak bʼarwiʼ wank laj Eli ut kixye re: «Arin wankin». Abʼan laj Eli kixye re: «Laaʼin inkʼaʼ xatinbʼoq. Warin chaq wiʼ chik». Laj Samuel xkoho wiʼ chik chi wark. Ut kikʼulmank wiʼ chik xkaʼsutil aʼin. Naq laj Samuel kirabʼi naq kibʼoqeʼk saʼ rox sut, laj Eli kixkʼe reetal naq li Jehobʼa yook xbʼoqbʼal laj Samuel. Laj Eli kixye re li tixbʼaanu wi nabʼoqeʼk wiʼ chik, tento tixye: «Ye we, Jehobʼa. Laamoos yook chaawabʼinkil».

 Laj Samuel kiyoklaak wiʼ chik ut kirabʼi li xyaabʼ kuxej: «Samuel, Samuel». Laj Samuel kixye: «Ye we, Jehobʼa. Laamoos yook chaawabʼinkil». Li Jehobʼa kixye re: «Ye re laj Eli naq tinkʼe chi xtojbʼal xmaak aʼan ut li xjunkabʼal. Aʼan naxnaw naq ebʼ li ralal yookebʼ xbʼaanunkil li maaʼusilal saʼ li naʼaj re loqʼonink, abʼan inkʼaʼ naxqʼusebʼ». Wulajaq eqʼla, laj Samuel kixte li rokebʼaal li naʼaj re loqʼonink, joʼ qʼaynaq xbʼaanunkil. Laj Samuel kixuwak chi xkʼebʼal resil li Jehobʼa re li xyuwaʼil aj tij. Abʼan laj Eli kixbʼoq ut kixpatzʼ re: «At walal, kʼaru kixye aawe li Jehobʼa?». Joʼkan naq, laj Samuel kixseeraqʼi re chixjunil.

Laj Samuel kinimank, ut li Jehobʼa junelik wank chaq choʼq ramiiw. Ebʼ laj Israel li wankebʼ saʼ chixjunil li tenamit nekeʼxnaw naq li Jehobʼa kisikʼok ru laj Samuel re naq twanq choʼq propeet ut aj raqol aatin.

«Jultikoʼq aawe saʼ laasaajilal li Xnimal aj Yobʼtesihom aawe» (Eclesiastes 12:1).