Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Ebʼ li naʼlebʼ li nintzol saʼ li Santil Hu

 TZOLOM 8

Laj Abrahan ut li xSara nekeʼabʼink

Laj Abrahan ut li xSara nekeʼabʼink

Moko najt ta nakanaak chiru Babel jun chik li tenamit, li naxkʼabʼaʼi Ur. Ebʼ li wankebʼ aran inkʼaʼ nekeʼxloqʼoni li Jehobʼa, naabʼalebʼ bʼan li yos nekeʼxloqʼoni. Abʼan kiwank jun li winq saʼ li tenamit Ur li naxloqʼoni li Jehobʼa, aj Abrahan xkʼabʼaʼ.

Li Jehobʼa kixye re laj Abrahan: «Kanabʼ laawochoch ut ebʼ laakomon, ut ayu saʼ li naʼaj li tinkʼut chaawu». Chirix chik aʼan li Yos kixye re: «Tatnimanq joʼ jun nimla tenamit. Ut saʼ aakʼabʼaʼ tinbʼaanu li chaabʼil naʼlebʼ choʼq rehebʼ li poyanam saʼ chixjunil li Ruuchichʼochʼ».

Laj Abrahan inkʼaʼ naxnaw bʼar ttaqlaaq xbʼaan li Jehobʼa, abʼan kʼojkʼo xchʼool rikʼin. Laj Abrahan; li xSara, li rixaqil; laj Tare, li xyuwaʼ, ut laj Lot, li rikaqʼ, keʼabʼink chiru li Yos. Keʼxchʼutubʼ li kʼaru rehebʼ ut keʼxchap xbʼe.

 Laj Abrahan wank tana 75 chihabʼ re, naq aʼan ut li xjunkabʼal keʼwulak saʼ li naʼaj li kiraj li Jehobʼa naq teʼril chaq. Li naʼaj kixkʼabʼaʼi Canaan. Aran li Jehobʼa kixye aʼin re laj Abrahan: «Chixjunil li chʼochʼ li nakaawil, tinkʼe rehebʼ laawalal aakʼajol». Abʼan laj Abrahan ut li xSara ak tiixebʼ ut maakʼaʼebʼ xkokʼal. Joʼkan naq, chanru tixbʼaanu li Jehobʼa naq ttzʼaqloq ru aʼin?

«Saʼ xkʼabʼaʼ li xpaabʼal, laj Abrahan kiʼabʼink [...] ut xkoho saʼ jun li naʼaj li tixkʼul joʼ xmaatan. Xʼelk usta inkʼaʼ naxnaw bʼar yook chi xik» (Hebreos 11:8).