Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Ebʼ li naʼlebʼ li nintzol saʼ li Santil Hu

 TZOLOM 11

Nayaleʼk li xpaabʼal

Nayaleʼk li xpaabʼal

Laj Abrahan kixkʼut chiru laj Isaac, li ralal, xraabʼal li Jehobʼa ut xpaabʼankil chixjunil li xyeechiʼom. Abʼan naq wank tana 25 chihabʼ re laj Isaac, li Jehobʼa kixye re laj Abrahan naq tixbʼaanu jun li kawil kʼanjel. Ma nakaanaw kʼaru kipatzʼeʼk re?

Li Yos kixye re laj Abrahan: «Bʼaanu usilal, kʼam laawalal li jun chaawu ut tyeechiʼi choʼq mayej saʼ jun rehebʼ li tzuul re Moria». Laj Abrahan inkʼaʼ naxnaw kʼaʼut li Jehobʼa kixye aʼin, usta inkʼaʼ naxnaw kiʼabʼink.

Naq xsaqewink, laj Abrahan kixkʼam chirix laj Isaac ut wiibʼ li xmoos saʼ li naʼaj Moria. Naq xnumeʼk oxibʼ kutan, chi najt xeʼril ebʼ li tzuul. Laj Abrahan kixye rehebʼ li xmoos naq teʼkanaaq chi oybʼenink naq aʼan ut laj Isaac teʼxik xyeechiʼinkil jun li mayejak. Laj Abrahan kixkʼam li chʼiichʼ ut kixkʼe re li ralal li siʼ choʼq re li xaml. Laj Isaac kixpatzʼ re li xyuwaʼ: «Bʼar wank li xul li tqamayeja?». Laj Abrahan kixye: «At walal, li Jehobʼa tixkʼe qe».

Naq keʼwulak saʼ xbʼeen li tzuul, keʼxyiibʼ jun li altar. Chirix chik aʼan, laj Abrahan kixbʼakʼ ebʼ li roq ut ebʼ li ruqʼ laj Isaac, ut kixkʼe saʼ xbʼeen li altar.

Laj Abrahan kixchap li chʼiichʼ. Saʼ li hoonal aʼan, jun li xʼanjel li Jehobʼa kiʼaatinak chaq saʼ choxa: «Abrahan! Maakʼaʼ taabʼaan re li al! Anaqwan ninnaw naq wank aapaabʼal chirix li Yos, xbʼaan naq xaamayeja raj  laawalal». Tojaʼ naq laj Abrahan kiril jun li chibʼaat jitʼinbʼil li xxukubʼ saʼ pim. Saʼ junpaat kirachʼabʼ laj Isaac ut kixmayeja li chibʼaat choʼq reqaj.

Chalen chaq saʼ li kutan aʼin, li Jehobʼa kixye naq laj Abrahan wank choʼq ramiiw. Ma nakaanaw kʼaʼut? Xbʼaan naq laj Abrahan kixbʼaanu chixjunil li kipatzʼeʼk re xbʼaan li Jehobʼa, usta inkʼaʼ naxtaw ru kʼaʼut kipatzʼmank re aʼin.

Li Jehobʼa kixjultika li xyeechiʼom re laj Abrahan: «Tatwosobʼtesi ut tinkʼe naabʼal aawalal aakʼajol». Aʼin naraj xyeebʼal naq saʼ xkʼabʼaʼ li xjunkabʼal laj Abrahan, li Jehobʼa tixkʼe li us rehebʼ li poyanam li teʼabʼinq.

«Li Yos kʼajoʼ naq kixra li ruuchichʼochʼ joʼkan naq kixqʼaxtesi li Ralal, li jun chiru, re naq chixjunilebʼ li teʼxkʼut xpaabʼal chirix inkʼaʼ teʼsacheʼq, wanqebʼ bʼan xyuʼam chi junelik» (Juan 3:16).