Saʼ li rox sutil naq xkoho laj Pablo chi puktesink, saʼ Jerusalen kixraq ru li xkʼanjel. Aran keʼxchap. Saʼ jun qʼoqyink, naq wank chaq saʼ tzʼalam, li Jesus kixye re saʼ jun li moy u: «Tatxik Roma ut tatpuktesinq saʼ li tenamit aʼin». Saʼ Jerusalen keʼrisi laj Pablo ut keʼxkʼam Cesarea. Ut aran kiwank wiibʼ chihabʼ saʼ tzʼalam. Saʼ jun kutan, naq wank chaq saʼ li raqlebʼaal aatin chiru laj Festo, li ruuchil awabʼej, laj Pablo kixtzʼaama: «Nawaj naq laj Cesar traqoq aatin saʼ inbʼeen saʼ Roma». Laj Festo kixye re: «Wi nakaawaj naq laj Cesar traqoq aatin saʼ aabʼeen, tatintaqla rikʼin laj Cesar». Joʼkan naq keʼxtaqsi laj Pablo saʼ jun li jukubʼ li yook chi xik Roma. Kiʼochbʼeniik xbʼaan wiibʼ laj paabʼanel: laj Lucas ut laj Aristarco.

Wankebʼ saʼ li palaw naq kichalk jun li nimla kaqsut-iqʼ saʼ xbʼeenebʼ ut aʼin kiwank chiru naabʼal kutan. Chixjunilebʼ keʼxkʼoxla naq teʼkamq. Abʼan laj Pablo kixye rehebʼ: «Ex qawaʼchin, jun li anjel kixye we saʼ jun li matkʼ: “Matxuwak. Tatwulaq Roma, ut chixjunilebʼ li wankebʼ saʼ li jukubʼ teʼkoleʼq”. Joʼkan naq, kawaq eechʼool! Inkʼaʼ tookamq».

Naq ak 14 kutan rokikebʼ xkʼebʼal xqʼe chirix li kaqsut-iqʼ, keʼril jun li naʼaj chaqi ru. Li naʼaj aʼin Malta xkʼabʼaʼ. Kitʼilk li jukubʼ ut kixjachi ribʼ, abʼan li 276 li wankebʼ saʼ li jukubʼ keʼkoleʼk naq keʼwulak chire li haʼ. Wankebʼ keʼnumxik ut wankebʼ keʼxchap ribʼ rikʼin xjachalil li jukubʼ. Ebʼ li poyanam re Malta keʼtenqʼank rehebʼ ut keʼxtzʼabʼ jun li xaml re naq teʼqʼixinq.

Naq ak xnumeʼk oxibʼ po, ebʼ laj puubʼ keʼxkʼe laj Pablo saʼ jun chik li jukubʼ re naq txik Roma. Ebʼ li hermaan xeʼwulak chi xkʼulbʼal chaq. Naq kirilebʼ ru, laj Pablo kibʼanyoxink chiru li Yos ut kikawuuk xchʼool. Usta laj Pablo wank saʼ tzʼalam, keʼxkanabʼ chi wank saʼ jun li toʼninbʼil ochoch li kʼaakʼalenbʼil xbʼaan jun laj puubʼ. Wiibʼ chihabʼ kiwank aran. Ebʼ li poyanam nekeʼwulak chi rulaʼaninkil, ut aʼan naxpuktesi rehebʼ li esil chirix li Xʼawabʼejilal li Yos ut naxtzolebʼ chirix li Jesus. Laj Pablo kixtzʼiibʼa ajwiʼ ebʼ li esilhu rehebʼ li chʼuut re Asia Menor ut Judea. Chʼolchʼo tzʼaqal naq li Jehobʼa kiroksi laj Pablo re xkʼambʼal li chaabʼil esil chirix li Yos saʼebʼ li tenamit.

«Naqakʼut naq laaʼo aj kʼanjel chiru li Yos rikʼin chixjunil li naqabʼaanu: naqakuy naabʼal li aaleek, li rahilal, li raasa, li chʼaʼajkilal» (2 Corintios 6:4).