Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Ebʼ li naʼlebʼ li nintzol saʼ li Santil Hu

 TZOLOM 85

Li Jesus nabʼanok saʼ Sabado

Li Jesus nabʼanok saʼ Sabado

Ebʼ laj Pariseey xikʼ nekeʼril li Jesus ut yookebʼ xsikʼbʼal chanru teʼxkʼe saʼ tzʼalam. Nekeʼxye naq inkʼaʼ us kʼirtasink chiru li Sabado xbʼaan naq hilobʼaal kutan aʼan. Saʼ jun li Sabado, li Jesus kiril jun li winq mutzʼ yook chi lemooxink saʼ bʼe. Joʼkan naq kixye rehebʼ li xtzolom: «Ilomaq chanru li xwankil li Yos tixtenqʼa li winq aʼin». Tojaʼ naq, li Jesus kixyukʼi li xyaʼal re rikʼin chʼochʼ re naq tqʼemoʼq. Chirix chik aʼan, kixkʼe bʼayaq saʼebʼ li ru li mutzʼ ut kixye re: «Ayu ut chʼaj chaq laawu saʼ li tzʼakanbʼilhaʼ Siloam». Naq li winq kixbʼaanu, aʼin li xbʼeen sut naq kiʼilok saʼ li xyuʼam.

Ebʼ li poyanam keʼsachk xchʼool chi rilbʼal ut keʼxye: «Aʼin li winq li nakʼojlaak chi lemooxink, peʼyaal? Malaj chanchan aʼin?». Li winq kixye: «Laaʼin li winq li mutzʼ xyoʼlaak». Ebʼ li poyanam keʼxpatzʼ re: «Ut kʼaʼut naq moko mutzʼat ta chik?». Kixseeraqʼi rehebʼ li xkʼulmank. Tojaʼ naq keʼxkʼam re naq t-aatinaq rikʼinebʼ laj Pariseey.

Li winq kixseeraqʼi rehebʼ laj Pariseey: «Li Jesus kixyul sebʼ saʼ wu ut kixye we naq tinchʼaj. Xinbʼaanu, ut anaqwan ninʼilok chik». Ebʼ laj Pariseey keʼok xyeebʼal: «Wi li Jesus nabʼanok chiru li Sabado, li xwankil moko chalenaq ta rikʼin li Yos». Abʼan wankebʼ nekeʼxye: «Wi maawaʼ rikʼin li Yos nachalk li xwankil, abʼan chanru naxkʼirtasihebʼ li yaj?».

Ebʼ laj Pariseey keʼxbʼoq li xnaʼ xyuwaʼ li winq ut keʼxpatzʼ re:  «Kʼaʼut naq naʼilok chik leeralal?». Li xnaʼ xyuwaʼ li winq yookebʼ xxiw xbʼaan naq ebʼ laj Pariseey keʼxye naq teʼrisi saʼ li chʼutlebʼaal yalaq ani t-oq xpaabʼankil li Jesus. Joʼkan naq keʼxye: «Inkʼaʼ naqanaw. Patzʼomaq re». Ebʼ laj Pariseey keʼxbʼaanu xkomon li patzʼom re li winq, ut aʼan kixye rehebʼ: «Ak xinye eere chixjunil. Kʼaʼut naq inkʼaʼ nekeekanabʼ xpatzʼbʼal?». Ebʼ laj Pariseey keʼpoʼk ut keʼrisi aran.

Chirix chik aʼan, li Jesus xkoho rilbʼal li winq ut kixpatzʼ re: «Ma nakaapaabʼ li Sikʼbʼil Ru?». Li winq kixye re: «Wi tinnaw raj ani, tinpaabʼ raj». Li Jesus kixye re: «Laaʼin li Sikʼbʼil Ru». Peʼyaal naq chaabʼil li Jesus rikʼin li winq mutzʼ? Kixbʼan ut kixtenqʼa ajwiʼ re naq wanq xpaabʼal.

«Tiik sachenaqex xbʼaan naq inkʼaʼ nekeenaw chi moko li Santil Hu chi moko li xwankil li Yos» (Mateo 22:29).