Li Esil aʼin choʼq Rehebʼ li Nekeʼrahoʼk re li Jehobʼa:

Li Jesus kixye: «Teenaw li yaal ut li yaal taaʼachʼabʼanq eere» (Juan 8:32). Naxkʼojobʼ qachʼool rabʼinkil aʼin! Yalaq ani naru naxtzol li yaal li wank saʼ li Santil Hu usta wanko «saʼ rosoʼjikebʼ li kutan» bʼarwiʼ numtajenaq li tikʼtiʼ (2 Timoteo 3:1). Maare toj jultik qe naq xsahoʼk saʼ qachʼool naq xqatzol li yaal li wank saʼ li Santil Hu. Kʼajoʼ xchʼinaʼusal xtzolbʼal li yaal!

Abʼan moko tzʼaqal ta rikʼin xnawbʼal li yaal ut xkʼeebʼal chi naweʼk chi rajlal kutan, tento bʼan tqayuʼami. Joʼkan bʼiʼ, tento toowanq junelik saʼ li xrahom li Yos. Abʼan, chanru tooruuq chi wank saʼ li xrahom? Ak jun qʼoqyink chik ma nakamk li Jesus naq kixsume li patzʼom, ut kixye rehebʼ li Xʼapostol: «Wi nekepaabʼ linchaqʼrabʼ, texkanaaq saʼ linrahom joʼ naq laaʼin xinpaabʼ xchaqʼrabʼ linYuwaʼ ut ninkanaak saʼ li xrahom» (Juan 15:10).

Ma xqakʼe reetal chanru kiruuk li Jesus chi wank junelik saʼ xrahom li Yos? Li Jesus junelik kixpaabʼ li xchaqʼrabʼ li Xyuwaʼ ut joʼkan ajwiʼ tqabʼaanu laaʼo. Re naq toowanq junelik saʼ xrahom li Yos, maajunwa tqakanabʼ xbʼeeresinkil li qayuʼam rikʼin li yaal. Saʼ li qʼoqyink ajwiʼ aʼin li Jesus kixye: «Wi nekenaw aʼin, us xaq eere wi teebʼaanu chi joʼkan» (Juan 13:​17).

Chi anchal qachʼool naqaj naq li tasal hu aʼin tooxtenqʼa chiqajunilo chi xyuʼaminkil li yaal ut chi joʼkan toowanq junelik saʼ «xrahom li Yos [...] choʼq re li junelik yuʼam» (Judas 21).

Li Nekeʼjolomink re Xmolam li Jehobʼa