Rilb'al li na'leb'

Rilb'al li xtusulal naʼlebʼ

 TZOLOM 11

Chanru Nokooxtenqʼa li Naʼlebʼ li Wank saʼ li Santil Hu?

Chanru Nokooxtenqʼa li Naʼlebʼ li Wank saʼ li Santil Hu?

1. Kʼaʼut aajel ru naq tkʼeemanq qanaʼlebʼ?

Chanru nokooxtenqʼa li xnaʼlebʼ li Yos re naq ajʼooq qu? (SALMO 36:10 [36:9, Wy])

Li Jehobʼa naxqʼax ru li qanawom xbʼaan naq aʼan kiyoobʼtesink qe. Joʼkan ajwiʼ aʼan Qayuwaʼ ut nokooxra ut nokooxkʼoxla. Moko kooxyoobʼtesi ta chaq re naq tqabʼeeresi qibʼ qajunes (Jeremias 10:23). Joʼ chanru naq ebʼ li kokʼal nekeʼraj naq teʼtenqʼaaq xbʼaan xnaʼ xyuwaʼ, ebʼ li qas qiitzʼin nekeʼraj ajwiʼ naq teʼbʼeeresiiq xbʼaan li Yos (Isaias 48:17, 18). Li naʼlebʼ li naxkʼe li Santil Hu aʼan li maatan li naxkʼe qe li Yos. Chaawil 2 Timoteo 3:16.

Li xchaqʼrabʼ ut li xnaʼlebʼ li Jehobʼa naxkʼut chiqu chanru toowanq anaqwan ut chanru tqataw naabʼal qosobʼtesinkil saʼ li kutan chaalel. Ut saʼ xkʼabʼaʼ naq Aʼan kiyoobʼtesink qe, tento tqakʼulubʼa naq tixkʼut qabʼe. Chaawil Salmo 19:8, 12 (19:7, 11, Wy) ut Apocalipsis 4:11.

2. Chanru nakʼanjelak li naʼlebʼ li wank saʼ li Santil Hu?

Li naʼlebʼ li naxkʼe li Santil Hu nokooxtenqʼa saʼ chixjunil li qayuʼam: saʼ li qakʼanjel, saʼ li qochoch malaj yalaq joqʼe. Abʼan li chaqʼrabʼ moko joʼkan ta nakʼanjelak (Deuteronomio 22:8). Joʼkan naq tento tqoksi chiʼus li qakʼaʼuxl naq tqoksi junaq li naʼlebʼ li wank saʼ li Santil Hu (Proverbios 2:10-12). Qilaq jun li eetalil: li Santil Hu naxkʼut naq li Yos kixkʼe qe li yuʼam. Xnawbʼal aʼin tooxtenqʼa chi xbʼeeresinkil chiʼus li qayuʼam saʼ li qakʼanjel, saʼ li qochoch malaj naq nokooxik saʼ junaq li naʼaj. Ut tooxtenqʼa ajwiʼ re naq junelik ajʼooq qu. Chaawil Hechos 17:28.

 3. Bʼar wank tzʼaqal li wiibʼ xnimal ru naʼlebʼ?

Li Jesus kixkʼe wiibʼ xnimal ru naʼlebʼ. Li xbʼeen xnimal ru naʼlebʼ naxkʼut kʼaru tzʼaqal rajbʼal li qayuʼam: xnawbʼal ut xraabʼal li Yos, joʼkan ajwiʼ kʼanjelak chiru chi anchal qachʼool. Li xnimal ru naʼlebʼ aʼin wanq saʼ li qachʼool naq tqaj xbʼaanunkil junaq li kʼanjel (Proverbios 3:6). Li nekeʼxpaabʼ li naʼlebʼ aʼin, teʼwanq choʼq ramiiw li Yos, teʼxtaw li sahil chʼoolejil ut li junelik yuʼam. Chaawil Mateo 22:36-38.

Li xkabʼ xnimal ru naʼlebʼ nokooxtenqʼa chi xkʼambʼal qibʼ chiʼus rikʼin chixjunilebʼ (1 Corintios 13:4-7). Ut wi joʼkan tqabʼaanu, yooqo xkʼambʼal qe rikʼin li Yos xbʼaan naq sa narilebʼ li qas qiitzʼin. Chaawil Mateo 7:12 ut 22:39, 40.

4. Chanru nokooxtenqʼa li naʼlebʼ li naxkʼe li Santil Hu?

Li Santil Hu naxkʼut chanru teʼxra ribʼ li junkabʼal ut chanru teʼwanq saʼ junajil (Colosenses 3:12-14). Ut naxkʼut ajwiʼ naq li sumsuukebʼ inkʼaʼ teʼxkanabʼ ribʼ. Chaawil Genesis 2:24.

Nokooxtenqʼa ajwiʼ saʼ li qakʼanjel ut re naq junelik sahaq saʼ qachʼool. Wankebʼ laj kʼehol kʼanjel, nekeʼxsikʼ choʼq xmoos li nekeʼyuʼamink re li Santil Hu xbʼaan naq nekeʼkʼanjelak chiʼus ut inkʼaʼ nekeʼelqʼak (Proverbios 10:4, 26; Hebreos 13:18). Li naʼlebʼ li wank saʼ li Santil Hu naxkʼut ajwiʼ chiqu naq sahaq saʼ qachʼool rikʼin li kʼaru wank qe ut inkʼaʼ txik qachʼool chi xsikʼbʼal li bʼihomal re naq inkʼaʼ tqatzʼeqtaana li Yos. Chaawil Mateo 6:24, 25, 33 ut 1 Timoteo 6:8-10.

Li naʼlebʼ li naxkʼe li Santil Hu nokooxtenqʼa ajwiʼ re naq inkʼaʼ yajaqo (Proverbios 14:30; 22:24, 25). Li chaqʼrabʼ chirix li kalaak nokooxtenqʼa re naq inkʼaʼ tooyajerq ut naq inkʼaʼ tqakʼul li raxkamk (Proverbios 23:20). Li Jehobʼa naxkanabʼ naq tqukʼ bʼayaq li haʼ li nakaltesink, abʼan inkʼaʼ tnumeʼq xbʼeen tqabʼaanu (Salmo 104:15; 1 Corintios 6:10). Li xnaʼlebʼ li Yos moko kaʼaj tawiʼ nokooxtenqʼa chi rilbʼal li qabʼaanuhom nokooxtenqʼa bʼan ajwiʼ saʼ li qakʼaʼuxl (Salmo 119:97-100). Abʼanan, ebʼ li tzʼaqal aj paabʼanel moko nekeʼabʼink ta chiru li Yos xbʼaan naq nekeʼraj naq teʼosobʼtesiiq, nekeʼxbʼaanu bʼan re xkʼeebʼal xloqʼal li Jehobʼa. Chaawil Mateo 5:14-16.