Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 112: Laj Pablo Kikole'k sa' Palaw

Tzolom 112: Laj Pablo Kikole'k sa' Palaw

LI JUKUB' kisub'e'k sa' ha' ut ki'ok chi juk'e'k! Jo'kan naq wank ke'xk'ut rib' sa' li palaw. Ut wankeb' ak ke'elk chaq sa' li ha'. Ma wank laj Pablo sa' xyanqeb'? Qilaq k'aru kixk'ul chaq laj Pablo.

Li keʼkoleʼk chiru li palaw

Jultik aawe naq laj Pablo kiwank chaq wiib' chihab' sa' tz'alam aran Cesarea. Chirix chik a'an, ke'xk'e laj Pablo ut eb' li ak wankeb' sa' tz'alam, sa' jun li jukub' xb'aan naq ke'k'ame'k Roma. Nach' wankeb' sa' li na'aj Creta naq kichalk jun li kaqsut-iq' sa' xb'eeneb'. Jo'kan naq ink'a' chik ke'ru xb'eeresinkil li jukub'. Ink'a' chik ke'ril ru li Saq'e chi moko eb' li chahim. Chi jo'kan ke'xnumsi naab'al li kutan. Eb' li wankeb' sa' li jukub', ke'xk'oxla naq ink'a' te'kole'q.

Toja' naq kiwakliik laj Pablo ut kixye: ‹Ka'ajwi' li jukub' tsachq, maajun eere tkamq. Xb'aan naq sa' li q'oqyink jun li x'anjel li Yos kixye we: Matxuwak, Pablo! Tatwulaq rik'in laj Cesar, li awab'ej re Roma. Li Yos tixkoleb' li yookeb' chi xik aawochb'een›.

Tuqtu q'oqyink ut ak kinume'k 14 kutan, chalen chaq xtiklajik li kaqsut-iq'. Eb' li yookeb' xch'eeb'al li jukub' ke'xk'e reetal naq moko cham ta li ha'. Jo'kan naq ke'xkut jun li ch'iich' sa' ha' re naq li jukub' ink'a' tixsak' rib' rik'ineb' li pek. Naq kisaqewk ke'ril naq wank jun jachal li na'aj chaqi ru. Jo'kan naq ke'xk'e xch'ool chi xk'amb'al li jukub' sa' li na'aj a'an.

Ak nach' wankeb' chire li na'aj, naq li jukub' kixsak' rib' chiru li samahib' ut aran kikanaak chi t'ilt'o. Li xkawil roq li palaw ki'ok riiqankil li jukub' ut ki'ok chi juk'e'k. Jun laj puub' li yook chi jolomink reheb' kixye: ‹Li nekeenaw numxik, ayuqex sa' li na'aj chaqi ru. Ut li ink'a' nekeenaw numxik chapamaq jun perel xtz'alam che'ul li jukub' ut teek'e eerib' sa' xb'een›. Chi jo'kan ke'kole'k chixjunileb' li 276 li yookeb' chi xik sa' li jukub'. A'an tz'aqal kixye li anjel re laj Pablo.

Li na'ajej b'arwi' ke'kole'k, Malta xk'ab'a'. Eb' li wankeb' sa' li na'aj Malta chaab'ileb' xch'ool ke'xtenq'a li ke'wulak sa' li jukub'. Naq kichaab'ilo'k li kutan, ke'xk'am laj Pablo sa' jun chik li jukub' sa' li tenamit Roma.

Hechos 27:1-44; 28:1-14.



Ebʼ li patzʼom

  • K’aru kixk’ul li jukub’ b’arwi’ yook chi xik laj Pablo naq wankeb’ nach’ sa’ li na’aj Creta?
  • K’aru kixye laj Pablo reheb’ li wankeb’ rochb’een sa’ li jukub’?
  • K’a’ut naq kijuk’e’k li jukub’?
  • K’aru kixye laj jolominel aj puub’ reheb’ li wankeb’ sa’ li jukub’ ut jarub’eb’ ke’kole’k?
  • K’aru xk’ab’a’ li na’aj b’arwi’ ke’kole’k? K’aru ke’xb’aanu rik’in laj Pablo naq ki’chaab’ilo’k ru li kutan?

Chaasume ajwiʼ ebʼ li patzʼom aʼin

  • Chaawil li naxye Hechos 27:1-44.

    Naq kitz’iib’amank li kixk’ul chaq laj Pablo, chanru naxkawresi qach’ool a’in chirix li Santil Hu? (Hech. 27:16-19, 27-32; Luc. 1:3; 2 Tim. 3:16, 17.)

  • Chaawil li naxye Hechos 28:1-14.

    Li wankeb’ sa’ li na’ajej Malta ink’a’ neke’xloq’oni li Yos, ab’an ke’xtenq’a laj Pablo ut eb’ li wankeb’ rochb’een, naq naqil a’in, k’aru raj tento tqab’aanu laa’o ut chanru raj ru us tqab’aanu? (Hech. 28:1, 2; Heb. 13:1, 2; 1 Ped. 4:9.)