ANIHEB' li winq li wankeb' sa' li eetalil? Li winq li yook xye'b'al li ruq' a'an li apostol Pedro ut li wankeb' rik'in a'aneb' li ramiiw. Ani li winq wiq'wo chiru ch'och'? Ma us naq kixwiq'ib' rib' chiru laj Pedro? Ut k'a'ut naq kixb'aanu a'in?

Laj Pedro wank saʼ rochoch laj Cornelio

Li winq aj Cornelio ut aj jolominel sa' xyanqeb' laj puub' sa' li tenamit Roma. Laj Cornelio ink'a' naxnaw ru laj Pedro. Ab'an kiyehe'k re, naq tixk'am chaq laj Pedro sa' li rochoch. Chanru kik'ulmank a'in?

Eb' li xb'een xtzolom li Jesus, eb' aj Judio, ab'an laj Cornelio maawa' Judio. Ab'anan naxra li Yos, natijok chiru ut naxtenq'aheb' li qas qiitz'in. Sa' jun li ewuuk jun li anjel kixk'ut rib' chiru laj Cornelio ut kixye re: ‹Li Yos tixsume laatij xb'aan naq nawulak chiru laana'leb'. Taqla xb'oqb'al laj Pedro. Laj Pedro wank sa' li tenamit Jope sa' rochoch laj Simon, chi xk'atq li palaw›.

Laj Cornelio sa' junpaat kixtaqla xb'oqb'al laj Pedro. Sa' li jun chik kutan laj Pedro wank sa' xb'een li rochoch laj Simon, naq li Yos kixb'aanu naq laj Pedro tixk'oxla naq yook chi rilb'al naq yook chaq chi kub'eek sa' choxa jun nimla t'ikr ut chisa' wank jalan jalanq chi xul. Sa' xchaq'rab' li Yos kixye naq eb' li xul a'in moko us ta xtzakankil. Toja' naq kirab'i jun xyaab' kuxej: ‹Waklin Pedro, kamsiheb' li xul ut wa'in›.

Laj Pedro kixye: ‹Ink'a'! Maajunwa xintzaka li muxb'il ru›. Li xyaab' kuxej kixye re laj Pedro: ‹Kanab' xyeeb'al naq muxb'il xul a'in, li yook xyeeb'al li Yos naq saq' ru›. Oxib' sut kixk'ul a'in laj Pedro. Toj yook xk'oxlankil laj Pedro k'aru xyaalal a'in, naq ke'wulak eb' li winq, li kixtaqla laj Cornelio.

Laj Pedro ki'elk chaq ut kixye reheb' li winq: ‹Laa'in li nekeesik'. K'aru nekeeraj wik'in?› Eb' li winq ke'xch'olob' chiru naq jun li anjel kixye re laj Cornelio naq tixtaqla xk'amb'al laj Pedro sa' rochoch. Naq laj Pedro kirab'i a'in kixk'ulub'a xik chirixeb'. Sa' li jun chik kutan laj Pedro ut eb' li ramiiw koheb' Cesarea, sa' rochoch laj Cornelio.

Laj Cornelio kixch'utub' li xjunkab'al ut eb' li ramiiw sa' rochoch. Naq laj Pedro kiwulak, laj Cornelio kixwiq'ib' rib' chiru, jo' nak'utunk sa' li eetalil. Ab'an, laj Pedro kixye re laj Cornelio: ‹Waklin, xb'aan naq laa'in yal winqin!› Li Santil Hu naxye naq moko us ta xwiq'ib'ankil qib' chiru junaq winq. Tento naq ka'ajwi' li Jehob'a tqaloq'oni ru.

Toja' naq laj Pedro ki'ok xpuktesinkil li chaab'il esilal reheb' li wankeb' sa' rochoch laj Cornelio ut kixye: ‹Nink'e reetal naq li Yos naxk'ulub'a chixjunil li neke'raj xloq'oninkil ru›. Toj yook ajwi' chi aatinak laj Pedro naq li Yos kixtaqla li xsantil musiq'ej sa' xb'eeneb' jo'kan naq ke'ok chi aatinak sa' jalan jalanq chi aatinob'aal. Naq eb' li ramiiw laj Pedro ke'ril a'in ke'sach xch'ool xb'aan naq ke'xk'oxla naq li Yos ka'ajwi' narusilaheb' laj Judio. A'in kixk'ut chiruheb' naq li Yos juntaq'eet narileb' chixjunil li tenamit. Us raj naq ink'a' tsachq sa' qach'ool a'in!

Hechos 10:1-48; 11:1-18; Apocalipsis 19:10.



Ebʼ li patzʼom

  • Ani li winq yook xwiq’ib’ankil rib’?
  • K’aru kixye jun li anjel re laj Cornelio?
  • K’aru kixk’ut li Yos chiru laj Pedro naq wank sa’ rochoch laj Simon aran Jope?
  • K’a’ut kixye laj Pedro re laj Cornelio naq ink’a’ tixwiq’ib’ rib’ chiru, chi moko tixk’e ta xloq’al?
  • K’a’ut naq sachso xch’ool ke’kanaak eb’ laj Judio, li wankeb’ rik’in laj Pedro?
  • K’aru tento tqatzol naq laj Pedro kiwulak rik’in laj Cornelio?

Chaasume ajwiʼ ebʼ li patzʼom aʼin

  • Chaawil li naxye Hechos 10:1-48.

    K’aru naxk’ut chiqu li kixye laj Pedro sa’ Hechos 10:42 chirix xpuktesinkil li chaab’il esilal? (Mat. 28:19; Mar. 13:10; Hech. 1:8.)

  • Chaawil li naxye Hechos 11:1-18.

    K’aru kixb’aanu laj Pedro naq li Yos kixtaqla rik’ineb’ li maawa’eb’ aj Judio? Chanru tqak’am qe rik’in laj Pedro? (Hech. 11:17, 18; 2 Cor. 10:5; Efe. 5:17.)