ANI li winq wiq'wo chiru ch'och'? A'an laj Esteban ut wank cho'q xtzolom li Jesus. Ab'an k'a'ut yookeb' xk'eeb'al chi pek? Xb'aan naq xik' neke'ril.

Yookebʼ xkʼeebʼal chi pek laj Esteban

Li Yos kixtenq'a laj Esteban chi xb'aanunkil li sachb'ach'oolej. Jo'kan naq eb' li winq a'in, ke'xye re laj Esteban naq k'a'ut yook chi k'utuk chirix li Jesus. Li Yos kixk'e xna'leb' laj Esteban re xk'utb'esinkil naq eb' li winq a'in, ink'a' yookeb' xk'utb'al li yaal chiruheb' li qas qiitz'in. Jo'kan naq ke'numtaak xjosq'il ut ke'xchap laj Esteban. Toja' naq, ke'xye re wiib' oxib' reheb' li poyanam naq te'tik'ti'iq chirix laj Esteban.

Li xyuwa'il laj tij kixye re laj Esteban: ‹Ma yaal li yookeb' xyeeb'al chaawix?› Laj Esteban kixch'olob' rik'in li Santil Hu li patz'om. Naq yook chi raqe'k xyeeb'al a'in, kixye naq sa' li q'e kutan xik' ke'ile'k eb' laj k'anjel chiru li Yos. Jo'kan naq kixye reheb': ‹Laa'ex chanchanex ajwi' jo'eb' li winq a'in. Xeekamsi li Jesus ut ink'a' keepaab' li xchaq'rab' li Yos›.

Naq eb' li xb'eenil aj tij ke'rab'i a'in, ke'xk'uxuxi ruch reheb' xb'aan xjosq'ileb'. Laj Esteban ki'ilok sa' choxa ut kixye: ‹Yookin chi rilb'al li Jesus sa' li xnim ruq' li Yos!› Ab'an, eb' li winq ke'xtz'ap li xikeb' ut ke'xjukuki laj Esteban. Ut ke'risi sa' li tenamit.

Eb' li winq ke'risi li raq'eb' ut ke'xkanab' chi roq laj Saulo jo' nak'utunk sa' li eetalil. Toja' naq ke'ok xk'eeb'al chi pek. Laj Esteban kixwiq'ib' rib' ut ki'ok chi tijok chiru li Yos: ‹At Jehob'a maak'eheb' chi xtojb'al rix li yookeb' xb'aanunkil we!› Toja' naq, kikamk. Laj Esteban kixye a'in, xb'aan naq naxnaw naq eb' li winq ke'b'alaq'iik xb'aaneb' li xb'eenil laj tij.

Ma nakaak'e reqaj li neke'xb'aanu aawe, malaj nakaapatz' re li Yos naq tixk'e chi xtojb'al xmaakeb'? Laj Esteban ut li Jesus ink'a' ke'xb'aanu a'in. Maajunwa ke'xb'aanu li maa'usilal reheb' li xik' ke'ilok reheb'. Us wi tqak'am qe rik'ineb'!

Hechos 6:8-15; 7:1-60.



Ebʼ li patzʼom

  • Ani laj Esteban? K’aru kixb’aanu laj Esteban xb’aan naq li Yos kitenq’ank re?
  • K’aru kixye laj Esteban naq ke’chalk xjosq’il eb’ li xb’eenil laj tij?
  • K’aru ke’xb’aanu re laj Esteban naq ke’risi sa’ li tenamit?
  • Ani li saaj al li ke’xkanab’ li t’ikr chi roq?
  • K’aru kixpatz’ laj Esteban re li Jehob’a naq ak kamk re?
  • Chanru tqak’am qe rik’in laj Esteban naq te’xb’aanu qe li maa’usilal?

Chaasume ajwiʼ ebʼ li patzʼom aʼin

  • Chaawil li naxye Hechos 6:8-15.

    K’aru neke’xb’aanu eb’ li neke’k’amok b’e sa’eb’ li paab’al re naq eb’ laj Testiiw re li Jehob’a te’xkanab’ xpuktesinkil li chaab’il esilal? (Hech. 6:9, 11, 13.)

  • Chaawil li naxye Hechos 7:1-60.

    K’aru kitenq’ank re laj Esteban chi xkolb’al rix li chaab’il esilal chiru li Sanedrin ut k’aru naqatzol chirix a’in? (Hech. 7:51-53; Rom. 15:4; 2 Tim. 3:14-17; 1 Ped. 3:15.)

    K’aru tento tqab’aanu naq eb’ li qas qiitz’in ink’a’ too’e’xkanab’ chi xpuktesinkil li chaab’il esilal? (Hech. 7:58-60; Mat. 5:44; Luc. 23:33, 34.)