EB' LI wankeb' sa' li eetalil a'aneb' li xtzolom li Jesus. Eb' li xtzolom li Jesus ch'utch'uukeb' sa' li tenamit Jerusalen chanchan xyaab' kawil iq' kinujak sa' li ochoch. Chirix chik a'an, kixk'e rib' li ru'uj raq' xaml sa' xb'eeneb' li xjolom chixjunqaleb'. Ma nakaawil li xaml sa' xb'eeneb'? Ma nakaanaw k'aru xyaalal?

Li santil musiq'ej wank sa' xb'eeneb' li xtzolom li Jesus

A'in jun chik li sachb'ach'oolej kixb'aanu li Jesus. Naq li Jesus kixtaqla li santil musiq'ej sa' xb'eeneb' li xtzolom, ak wank wi' chik sa' choxa rik'in li xyuwa'. Ma nakaanaw k'aru ke'ok xb'aanunkil naq ke'xk'ul li santil musiq'ej? Chixjunileb' ke'ok chi aatinak sa' jalan jalanq chi aatinob'aal.

Eb' laj Jerusalen ke'chalk chi rilb'al eb' li xtzolom li Jesus, xb'aan naq ke'rab'i li ki'eek'ank chaq sa' li ochoch. Wankeb' ke'chalk sa' jalan chik tenamit sa' li xninq'eheb' laj Israel, Pentecostes xk'ab'a'. Sachsookeb' xch'ool ke'kanaak eb' li qas qiitz'in! Ma nakaanaw k'a'ut? Xb'aan naq eb' li xtzolom li Jesus yookeb' chi aatinak sa' li raatinob'aaleb' chirix li Yos.

Eb' li wankeb' Jerusalen ke'xye: ‹Chanru neke'ru chi aatinak sa'eb' li aatinob'aal b'arwi' nokoochalk? A'aneb' aj Galilea!›

Laj Pedro ki'ok xch'olob'ankil chiruheb' chanru ke'xkamsi li Jesus ut naq li Jehob'a kixwaklesi wi' chik chi yo'yo. Jo'kan naq laj Pedro kixye: ‹Li Jesus wank sa' choxa sa' xnim ruq' li Yos. Ut a'an kik'ehok re li santil musiq'ej sa' xb'eeneb' li xtzolom. Jo'kan naq kik'ulmank eb' li sachb'ach'oolej›.

Naq laj Pedro kiraqe'k xyeeb'al a'in, naab'aleb' ke'yot'e'k xch'ool chirix li Jesus ut ke'xye: ‹K'aru tento tqab'aanu?› Laj Pedro kixye reheb': ‹Tento naq teejal leena'leb' ut teesub' eerib' sa' ha'›. Sa' li kutan a'an 3.000 tana ke'xsub' rib' sa' ha' ut ke'kanaak cho'q xtzolom li Jesus.

Hechos 2:1-47.



Ebʼ li patzʼom

  • K’aru ke’xk’ul eb’ li xtzolom li Jesus naq ke’kanaak chi oyb’enink sa’ li tenamit Jerusalen?
  • K’a’ut sachsookeb’ xch’ool ke’kanaak eb’ li qas qiitz’in naq ke’rab’i li ki’eek’ank chaq sa’ li ochoch?
  • K’aru kixch’olob’ laj Pedro chiruheb’ li qas qiitz’in?
  • K’aru ke’reek’a eb’ li qas qiitz’in naq ke’rab’i laj Pedro ut k’aru ke’xb’aanu?
  • Jarub’eb’ ke’xsub’ rib’ sa’ ha’ sa’ li Pentecostes re li chihab’ 33?

Chaasume ajwiʼ ebʼ li patzʼom aʼin

  • Chaawil li naxye Hechos 2:1-47.

    Chanru kixch’olob’ laj Pedro sa’ Hechos 2:23, 36 naq eb’ laj Judio wankeb’ re, naq kikamk li Jesus? (1 Tes. 2:14, 15.)

    K’aru li chaab’il eetalil kixkanab’ laj Pedro chirix roksinkil chi’us li Santil Hu? (Hech. 2:16, 17, 29, 31, 36, 39; Col. 4:6.)

    Chanru kiroksi laj Pedro li ‹law› li kiyeechi’iik re xb’aan li Jesus? (Hech. 2:14, 22-24, 37, 38; Mat. 16:19.)