NAAB'AL sut kixk'utb'esi rib' li Jesus chiruheb' li xtzolom. Ab'an jun sut ajwi' kixk'ut rib' chiruheb' 500 chi tzolom. Ma nakaanaw, k'aru kixye reheb'? Li Jesus ki'aatinak chirix li Xnimajwal Awab'ejilal li Yos. Li Jehob'a kixtaqla li Jesus sa' Ruuchich'och' re naq tk'utuq chirix li X'awab'ejilal li Yos. Jo'kan naq ink'a' kixkanab' xb'aanunkil. Ut toj kixb'aanu naq kiwakliik wi' chik chi yo'yo.

Li Jesus yook chi sutqʼiik saʼ choxa

K'aru li Nimajwal Awab'ejilal chirix li ki'aatinak li Jesus? A'an li X'awab'ejilal li Yos ut wank sa' choxa. Li Yos kixsik' li Jesus re naq a'an t-awab'ejinq sa' li X'awab'ejilal. Naq li Jesus kiwank sa' Ruuchich'och' kixk'utb'esi chanru t-awab'ejinq sa' li kutan chaalel. Tixch'oolaniheb' li qas qiitz'in, tixk'irtasiheb' li yaj ut tixwaklesiheb' wi' chik chi yo'yo eb' li kamenaq.

K'aru tk'ulmanq sa' li Ruuchich'och' naq li Jesus t-awab'ejinq chiru li jun mil chihab'? Chixjunil li Ruuchich'och' twulaq cho'q Sahilal Na'ajej. Maak'a'aq chik li nimla yalok u, li kamsink, li yajel chi moko li kamk. Naqanaw a'in, xb'aan naq li Yos kixyiib' sa' li Ruuchich'och', li Eden, re naq eb' li qas qiitz'in te'wanq aran. Li Jesus tixb'aanu li naraj li Jehob'a.

Chiru 40 kutan kixk'ut rib' li Jesus chiruheb' li xtzolom re naq te'xnaw naq yo'yo. Xb'aan naq wulak re xq'ehil naq tsutq'iiq sa' choxa. Ak xik re li Jesus sa' choxa naq kixye reheb' li xtzolom: ‹Mex'elk sa' li tenamit Jerusalen toj naq teek'ul li santil musiq'ej›. K'aru li santil musiq'ej? A'an li xmetz'ew li Yos ut chanchan iq'. A'an naroksi li Yos re xtenq'ankileb' li xtzolom li Jesus re naq te'xb'aanu li Rajom. Chirix chik a'an li Jesus kixye reheb': ‹Teepuktesi li yaal chiwix toj sa' xmaril li Ruuchich'och'›.

K'aru kik'ulmank naq kiraqe'k xyeeb'al a'in? Li Jesus ki'ok chi taqe'k sa' choxa jo' nak'utunk sa' li eetalil. Naq jun li choql kimuquk re, eb' li xtzolom ink'a' chik ke'ru chi rilb'al. Sa' choxa wank li Jesus naq ki'ok chi awab'ejink sa' xb'eeneb' li xtzolom arin sa' li Ruuchich'och'.

Ebʼ li xtzolom li Jesus yookebʼ rilbʼal naq xkoho saʼ choxa

1 Corintios 15:3-8; Apocalipsis 21:3, 4; Hechos 1:1-11.



Ebʼ li patzʼom

  • Chiru jun sut ajwi’, jarub’eb’ li xtzolom li Jesus ke’ril ru? K’aru kixye li Jesus reheb’?
  • K’aru li Nimajwal Awab’ejilal chirix li ki’aatinak li Jesus? Chanruhaq li yu’am sa’ li Ruuchich’och’ naq li Jesus t-awab’ejinq chiru li jun mil chihab’?
  • Chiru jarub’ kutan kixk’ut rib’ li Jesus chiruheb’ li xtzolom? K’aru li hoonal ak yook chi nach’ok chiru li Jesus?
  • K’aru kixye li Jesus reheb’ li xtzolom naq ok re xkanab’ankileb’?
  • K’aru yook chi k’ulmank sa’ li eetalil ut k’aru kimuquk re li Jesus?

Chaasume ajwiʼ ebʼ li patzʼom aʼin

  • Chaawil li naxye 1 Corintios 15:3-8

    K’a’ut ch’olch’o chiru laj Pablo naq kixye naq li Jesus kiwakliik wi’ chik chi yo’yo? Sa’eb’ li qakutan, chirix k’aru te’aatinaq eb’ li neke’paab’ank re li Jehob’a? (1 Cor. 15:4, 7, 8; Isa. 2:2, 3; Mat. 24:14; 2 Tim. 3:1-5.)

  • Chaawil li naxye Hechos 1:1-11.

    Jo’ naxye Hechos 1:8, toj b’ar kiwulak resil li chaab’il esilal? (Hech. 6:7; 9:31; 11:19-21; Col. 1:23.)