Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 103: Li Jesus Kiwakliik sa' Musiq'ej

Tzolom 103: Li Jesus Kiwakliik sa' Musiq'ej

NAQ laj Pedro ut laj Juan ke'elk chaq sa' li muqleb'aal li xMaria kikanaak chi yaab'ak xb'aan naq ink'a' kixtaw li Jesus. Toja' naq li xMaria kiril wiib' li anjel chisa' li muqleb'aal. Eb' li anjel ke'xye re: ‹K'a'ut yookat chi yaab'ak?›

Li xMaria kixye reheb' li anjel: ‹Maa'ani chik li Jesus ut ink'a' ninnaw b'ar xe'xk'am!› Naq li xMaria ki'ilok chirix, jun li winq kixye re: ‹Ani nakaasik'?›

Li xMaria kixk'oxla naq li winq aj ilol awimq, ut a'an tana kik'amok re li Jesus. Jo'kan naq kixye re: ‹Wi' laa'at xatk'amok re, ye we b'ar xaak'e chaq›. Li winq a'an li Jesus. Li xMaria ink'a' chik kixnaw ru li Jesus xb'aan naq moko juntaq'eet ta chik li xtib'el. Naq li winq kixye li xk'ab'a' li xMaria, aran kixk'e reetal naq a'an li Jesus. Li xMaria xko sa' aanil chi xyeeb'al reheb' li xtzolom: ‹Xwil ru li Jesus!›

Sa' ajwi' li kutan a'an wiib' li xtzolom li Jesus yookeb' chi xik sa' li k'aleb'aal, Emaus, ab'an raheb' sa' xch'ool xb'aan naq kikamk li Jesus, toja' naq jun li winq ki'ochb'eenink reheb'. Ab'an naq li winq ki'ok chi aatinak chirix li Santil Hu eb' li xtzolom li Jesus ke'k'ojlaak xch'ool. Naq ke'hilank chi wa'ak ke'xk'e reetal naq li winq li yook chi ochb'eenink reheb', a'an li Jesus. Toja' naq sachamil chiruheb'. Naq ke'sutq'iik Jerusalen ke'xye reheb' li apostol naq ke'ril ru li Jesus.

Li Jesus kixk'utb'esi rib' ajwi' chiru laj Pedro. Naq eb' li xtzolom li Jesus ke'rab'i a'in ke'saho'k sa' xch'ool. Li xwiib' chi tzolom li Jesus ke'wulak Jerusalen ut ke'xye reheb' li apostol naq sa' b'e ke'xtaw li Jesus. Ma nakaanaw k'aru kik'ulmank naq yookeb' xyeeb'al a'in?

Li ochoch tz'aptz'o naq kutamil li Jesus chiruheb'. K'ajo' naq ke'saho'k sa' xch'ool eb' li xtzolom naq ke'ril ru! A'in nak'utunk sa' li eetalil. Yaab'asi li oob' sut naq li Jesus kixk'ut rib'?

Kutamil li Jesus chiruhebʼ li xtzolom

Laj Tomas, li apostol, moko wank ta sa' xyanqeb' naq li Jesus kixk'ut rib' chiruheb'. Jo'kan naq eb' li xtzolom li Jesus ke'xye re laj Tomas: ‹Xqil ru li Jesus!› Ab'an laj Tomas ink'a' kixpaab', xb'aan naq toj maaji' naril ru. Ak waqxaqib' kutan xyeeb'al a'in, naq kixk'ut rib' wi' chik li Jesus chiruheb'. Toj aran kixpaab' laj Tomas naq yo'yo li Jesus xb'aan naq tz'aptz'ookeb' sa' li ochoch naq kiwulak li Jesus.

Juan 20:11-29; Lucas 24:13-43.



Ebʼ li patzʼom

  • Naq li xMaria ki’ilok chirix naq wank sa’ li muqleb’aal, k’aru kixye jun li winq re li xMaria? Chanru kixk’e reetal li xMaria naq li winq a’an li Jesus?
  • K’aru ke’xk’ul wiib’ li xtzolom li Jesus naq yookeb’ chi xik Emaus?
  • Naq eb’ li tzolom ke’xye reheb’ li apostol naq ke’ril ru li Jesus, k’aru kik’ulmank?
  • Jarub’ sut kixk’ut rib’ li Jesus?
  • K’aru kixye laj Tomas naq ke’xye re naq ke’ril ru li Jesus ut k’aru kik’ulmank naq kinume’k waqxaqib’ kutan?

Chaasume ajwiʼ ebʼ li patzʼom aʼin

  • Chaawil li naxye Juan 20:11-29.

    Ma kiraj xyeeb’al li Jesus sa’ Juan 20:23 naq teneb’anb’il sa’ qab’een li kuyuk maak? (Sal. 49:3, 8; Isa. 55:7; 1 Tim. 2:5, 6; 1 Juan 2:1, 2.)

  • Chaawil li naxye Lucas 24:13-43.

    K’aru tento tqab’aanu re naq tqataw ru li naxye li Santil hu? (Luc. 24:32, 33; Esd. 7:10; Mat. 5:3; Hech. 16:14; Heb. 5:11-14.)