ANI wankeb' sa' li eetalil? Li ixq a'an li xMaria Magdalena, ramiiw li Jesus ut eb' li winq li saqeb' rix, a'aneb' li x'anjel li Yos. Li xMaria yook chi ilok sa' li jul b'arwi' kik'ehe'k li Jesus naq kikamk. Ab'an li Jesus maa'ani chik aran! Qilaq ani kik'amok re.

Ebʼ li anjel yookebʼ chi aatinak rikʼin li xMaria Magdalena

Ak kamenaq chik li Jesus naq eb' laj tij ke'xye re laj Pilato: ‹Naq yo'yo li Jesus kixye naq tnume'q oxib' kutan re naq twakliiq wi' chik chi yo'yo. Taqlaheb' laj puub' chi xk'aak'alenkil, re naq eb' li xtzolom ink'a' te'risi li Jesus ut te'xye naq kiwakliik wi' chik chi yo'yo›. Toja' naq laj Pilato kixye reheb' laj tij naq te'xtaqla eb' laj puub' chi xk'aak'alenkil li jul.

Sa' li rox kutan, jun li x'anjel li Jehob'a kiwulak eq'la sa' li b'ekb'il jul b'arwi' kimuqe'k li Jesus. Li anjel kirisi li pek li ke'xtz'ap wi' re li jul. Li b'ekb'il jul a'in, chanchan jun li ochoch pek. Eb' laj puub', k'ajo' ke'xuwak naq ke'ril ru li anjel! Naq ke'ilok chisa' li jul, ke'xk'e reetal naq maa'ani chik li Jesus. Jo'kan naq kole'xye chaq reheb' laj tij ut naq eb' laj tij ke'rab'i a'in, ke'xtoj eb' laj puub' re naq te'tik'ti'iq. Maa'useb' xna'leb' laj tij, ke'xye reheb' laj puub' naq te'xye a'in: ‹Eb' li xtzolom ke'k'amok re, naq yooko chi wark›.

Wiib' oxib' li ixq, ramiiw li Jesus, koheb' chi rilb'al li jul. K'ajo' naq ke'sach xch'ool, naq ink'a' ke'xtaw li Jesus chisa' li jul! Naq li xMaria Magdalena kiril a'in, xko sa' aanil chi xyeeb'al re laj Pedro ut laj Juan. Naq xko li xMaria, wiib' li anjel lemtz'uneb' rix, kutamileb' chiruheb' li ixq ut ke'xye: ‹K'a'ut naq ke'xchalk chi xsik'b'al li Jesus? Li Jesus ak kiwakliik wi' chik chi yo'yo, yemaq chaq reheb' li xtzolom›. Naq eb' li ixq koheb' sa' aanil, ma nakaanaw ani kixaqab'ank reheb'? A'an li Jesus! Toja' naq li Jesus kixye reheb': ‹Yemaq chaq reheb' lintzolom naq xinwakliik wi' chik chi yo'yo›.

Naq eb' li ixq ke'xye naq li Jesus yo'yo, eb' li xtzolom ink'a' ke'xpaab'. Jo'kan naq laj Pedro ut laj Juan koheb' sa' aanil chi rilb'al li Jesus sa' jul, ab'an maak'a' ke'xtaw! Naq laj Pedro ut laj Juan ke'elk chaq, li xMaria Magdalena kikanaak chi ilok sa' rokeb'aal li muqleb'aal. Toja' naq wiib' li anjel ke'xk'ut rib' chiru.

Ma nakaanaw k'aru kixk'ul li xtib'el li Jesus? Li Yos kisachb'esink re. Li Yos kiwaklesink re chi yo'yo, ab'an ink'a' chik kixwaklesi sa' tib'elej. Kixwaklesi sa' musiq'ej jo' li xyu'ameb' li anjel. Us ta li Jesus wank sa' musiq'ej kiru xb'aanunkil naq t-ile'q xb'aaneb' li xtzolom.

Mateo 27:62-66; 28:1-15; Lucas 24:1-12; Juan 20:1-12.



Ebʼ li patzʼom

  • Ani li ixq li wank sa’ li eetalil? Aniheb’ li winq li wankeb’ sa’ li eetalil ut b’ar wankeb’?
  • K’a’ut kixye laj Pilato reheb’ laj tij naq te’xtaqla eb’ laj puub’ chi xk’aak’alenkil li jul?
  • K’aru kixb’aanu jun li anjel chire li b’ekb’il jul naq ak oxib’ kutan xkamik li Jesus? K’aru ke’xb’aanu eb’ laj tij?
  • K’a’ut ke’sach xch’ool eb’ li ixq naq koheb’ chi rilb’al li Jesus sa’ li jul?
  • K’a’ut laj Pedro ut laj Juan koheb’ rilb’al li b’ekb’il jul b’arwi’ kik’ehe’k li Jesus?
  • K’aru kik’ulmank rik’in xtib’el li Jesus naq kiwakliik wi’ chik chi yo’yo? K’aru kixb’aanu li Jesus re xk’utb’esinkil rib’ chiruheb’ li xtzolom?

Chaasume ajwiʼ ebʼ li patzʼom aʼin

  • Chaawil li naxye Mateo 27:62-66 ut 28:1-15.

    Chanru ke’maakob’k chiru li santil musiq’ej eb’ li xb’eenileb’ laj tij, eb’ laj Fariseo ut eb’ li cheekel winq? (Mat. 12:24, 31, 32; 28:11-15.)

  • Chaawil li naxye Lucas 24:1-12.

    Chanru kixk’utb’esi li Jehob’a naq oxloq’ chiru eb’ li ixq, naq kiwaklesiik wi’ chik chi yo’yo li Jesus? (Luc. 24:4, 9, 10; Mat. 28:1-7.)

  • Chaawil li naxye Juan 20:1-12.

    Chanru tooxtenq’a li naxye Juan 20:8, 9 naq ink’a’ naqataw ru li naxye li Santil Hu? (Pro. 4:18; Mat. 17:22, 23; Luc. 24:5-8; Juan 16:12.)