SA' LI q'oqyink re li kutan Jueves, li Jesus ut eb' li xkab'laju chi tzolom ke'xch'uutub' rib' sa' jun li ochoch re xnimankil li Paswa. Naq kiraqe'k li wa'ak a'in, laj Judas Iscariote ki'elk chi xyeeb'al reheb' laj tij chanru tixq'axtesi li Jesus reheb'. A'in kik'ulmank naq ak kinume'k wiib' kutan naq li Jesus ki'aatinak rik'ineb' li xtzolom.

Li wa'ak re xjultikankil li xkamik li Jesus

Wulajaq xnimankil li Paswa naq laj Judas kixye reheb' laj tij: ‹K'aru teek'e we wi' tinq'axtesi li Jesus eere?› Eb' laj tij ke'xye re: ‹Tqak'e aawe lajeeb' xka'k'aal tumin re plaat›. Jo'kan naq laj Judas kixk'ameb' laj tij rik'in li Jesus. K'ajo' xyiib'al ru kixb'aanu laj Judas!

Li Jesus kixb'aanu jun nimla wa'ak naq ke'raqe'k xnimankil li Paswa. Li Jesus kixk'e reheb' li xtzolom, jun li kaxlan wa ut kixye: ‹Tzakamaq a'in xb'aan naq a'an reetalil lintib'el li tq'axtesimanq sa' leek'ab'a'›. Chirix chik a'an kixchap jun sek' li b'iin ut kixye reheb': ‹Uk'umaq a'in, xb'aan naq a'an reetalil linkik'el li thoymanq sa' leek'ab'a'›. Li wa'ak a'in, nab'aanumank re xjultikankil li Jesus.

Eb' laj Israel ke'xnima li Paswa re xjultikankil naq li x'anjel li Yos kixkamsiheb' li xb'een ralal eb' laj Egipto. Sa'eb' li qakutan, li Jesus naraj naq eb' li xtzolom te'xjultika naq kixq'axtesi li xyu'am sa' xk'ab'a'eb'. Jo'kan naq rajlal chihab' nab'aanumank li wa'ak a'in.

Naq ke'raqe'k xnimankil li wa'ak a'in, li Jesus kixye reheb' li xtzolom naq tento k'ojk'ooqeb' xch'ool ut kawaqeb' sa'eb' li xpaab'al, toja' naq ke'b'ichank chiru li Yos. Kinume'k tana xtuqtuukil li q'oqyink naq ke'raqe'k. Chirix chik a'an, b'ar koheb'?

Mateo 26:14-30; Lucas 22:1-39; Juan 13-17; 1 Corintios 11:20.



Ebʼ li patzʼom

  • K’a’ut li Jesus ut eb’ li xtzolom wankeb’ sa’ jun li ochoch?
  • Ani li winq yook chi elk sa’ li ochoch ut b’ar yook chi xik?
  • K’aru jun chik xnimal wa’ak kixb’aanu li Jesus, naq ke’raqe’k xnimankil li Paswa?
  • K’aru ke’xjultika eb’ laj Israel naq ke’xnima li Paswa? Ut k’aru najultiko’k qe naq naqanima li wa’ak li kixb’aanu li Jesus rik’ineb’ li xtzolom?
  • Naq ke’raqe’k xnimankil li wa’ak, k’aru kixye li Jesus reheb’ li xtzolom ut k’aru ke’xb’aanu a’aneb’?

Chaasume ajwiʼ ebʼ li patzʼom aʼin

  • Chaawil li naxye Mateo 26:14-30.

    Chanru naxch’olob’ Mateo 26:15 naq laj Judas naxnaw naq nimla maak kixb’aanu re li Jesus?

    K’aru wiib’ xyaalal li xkik’el li Jesus? (Mat. 26:27, 28; Jer. 31:31-33; Efe. 1:7; Heb. 9:19, 20.)

  • Chaawil li naxye Lucas 22:1-39.

    K’aru naraj xyeeb’al naq laj Tza ki’ok rik’in laj Judas? (Luc. 22:3; Juan 13:2; Hech. 1:24, 25.)

  • Chaawil li naxye Juan 13:1-20.

    Li Santil Hu naxye sa’ Juan 13:2 naq laj Tza kixk’e sa’ xch’ool laj Judas xk’ayinkil li Jesus, ma wank xmaak laj Judas naq kixb’aanu a’in? K’aru tento te’xtzol eb’ li neke’loq’onink re li Jehob’a chirix a’in? (Gén. 4:7; 2 Cor. 2:11; Gál. 6:1; Sant. 1:13, 14.)

    K’aru kixye li Jesus naq tento tqab’aanu? (Juan 13:15; Mat. 23:11; 1 Ped. 2:21.)

  • Chaawil li naxye Juan 17:1-26.

    K’aru kiraj xyeeb’al li Jesus naq kixye reheb’ li xtzolom naq ‹junajaqeb’›? (Juan 17:11, 21-23; Rom. 13:8; 14:19; Col. 3:14.)