Rilb'al li na'leb'

Rilb'al li xtusulal naʼlebʼ

Tzolom 98: Wank sa' li Tzuul Olivo

Tzolom 98: Wank sa' li Tzuul Olivo

LI JESUS wank sa' li tzuul Olivo rik'ineb' li xtzolom. A'aneb' laj Andres, laj Pedro laj Santiago ut laj Juan. Li ochoch li wank sa' li eetalil, a'an Rochoch li Yos, li wank Jerusalen.

Naq eb' laj tij ke'ril li Jesus sa' li Rochoch li Yos, ke'raj xkamsinkil. Ab'an, ke'xuwak xb'aanunkil xb'aan naq li tenamit naxra li Jesus. Chixjunil a'in kik'ulmank sa' li kutan Martes, naq ak wiib' kutan rokik li Jesus sa' xb'een li b'uur sa' li tenamit Jerusalen.

Li Jesus ut eb’ li X’apostol

Li Jesus kixye reheb' laj k'amol b'e sa'eb' li paab'al: ‹Laa'ex k'anti' ut ralalex xk'ajol eb' li k'anti'›. Kixye ajwi' naq li Yos tixk'eheb' chi xtojb'al xmaak xb'aan naq naab'al li maa'usilal ke'xb'aanu. Naq li Jesus xko sa' li tzuul Olivo, k'aru ke'ok xpatz'b'al re, eb' li xtzolom?

Eb' li xtzolom li Jesus ke'raj xnawb'al chirix li kutan chaalel. Xb'aan naq neke'xnaw naq li Jesus trisi chixjunil li maa'usilal sa' xb'een li Ruuchich'och'. Jo'kan naq, ke'raj xnawb'al joq'e tk'ulmanq a'in. Ma nakaanaw joq'e tchalq wi' chik li Jesus jo' awab'ej?

Eb' li xtzolom li wankeb' sa' li Ruuchich'och', ink'a' te'ruuq chi rilb'al li Jesus naq tchalq wi' chik, xb'aan naq wanq sa' choxa. Jo'kan naq li Jesus ki'aatinak chirix eb' li eetalil li yooq chi k'ulmank sa' Ruuchich'och', re naq eb' li xtzolom te'xnaw naq ak yook chi awab'ejink. Ma nakaanaw k'aru eb' li eetalil a'in?

Li Jesus kixye naq twanq nimla yalok u, yajel, we'ej, kamsink ut ninqi hiik. Kixye ajwi' naq tpuktesimanq li chaab'il esilal chirix li Xnimajwal Awab'ejilal li Yos sa' chixjunil li Ruuchich'och'. Ma yook chi k'ulmank a'in sa'eb' li qakutan? Ch'olch'o chiqu naq li Jesus ak yook chi awab'ejink sa' choxa, xb'aan naq yook chi k'ulmank chixjunil a'in. Li Jesus trisi ajwi' li maa'usilal sa' xb'een li Ruuchich'och'.

Mateo 21:46; 23:1-39; 24:1-14; Marcos 13:3-10.



Ebʼ li patzʼom

  • Sa’ xyanq eb’ li winq li wank sa’ li eetalil, ani li Jesus? Aniheb’ li wankeb’ rik’in li Jesus?
  • K’aru ke’raj xb’aanunkil eb’ laj tij re li Jesus naq wank sa’ li Rochoch li Yos ut k’aru kixye reheb’?
  • K’aru ke’xpatz’ re li Jesus eb’ li xtzolom?
  • K’a’ut li Jesus ki’aatinak rik’ineb’ li xtzolom chirix li tk’ulmanq sa’ li Ruuchich’och’ naq yooq chi awab’ejink sa’ choxa?
  • Li Jesus trisi li maa’usilal sa’ li Ruuchich’och’, ab’an k’aru tk’ulmanq xb’eenwa?

Chaasume ajwiʼ ebʼ li patzʼom aʼin

  • Chaawil li naxye Mateo 23:1-39.

    Usta li Santil Hu na’aatinak chirix roksinkil li ruuchil k’ab’a’ej, ab’an k’aru kixye li Jesus sa’ Mateo 23:8-11 chirix li k’ab’a’ej re xk’eeb’al xwankil li neke’k’amok b’e sa’eb’ li ch’uut? (Hech. 26:25; Rom. 13:7; 1 Ped. 2:13, 14.)

    K’aru ke’xb’aanu eb’ laj Fariseo re naq eb’ li poyanam ink’a’ te’paab’anq? Ut chanru yookeb’ ajwi’ xb’aanunkil a’in, sa’eb’ li qakutan eb’ li neke’k’amok b’e sa’eb’ li paab’al? (Mat. 23:13; Luc. 11:52; Juan 9:22; 12:42; 1 Tes. 2:16.)

  • Chaawil li naxye Mateo 24:1-14.

    K’aru naxye Mateo 24:13 chirix li kuyum?

    K’aru naraj xyeeb’al Mateo 24:13 naq na’aatinak chirix ‹li roso’jik›? (Mat. 16:27; Rom. 14:10-12; 2 Cor. 5:10.)

  • Chaawil li naxye Marcos 13:3-10.

    Chanru naxk’utb’esi Marcos 13:10 naq aajel ru xpuktesinkil li chaab’il esilal ut chanru tento tqil li kixye li Jesus sa’ li raqal a’in? (Rom. 13:11, 12; 1 Cor. 7:29-31; 2 Tim. 4:2.)