Rilb'al li na'leb'

Rilb'al li xtusulal naʼlebʼ

Tzolom 97: Ke'xk'e Xloq'al li Jesus

Tzolom 97: Ke'xk'e Xloq'al li Jesus

LI JESUS ak kixk'irtasiheb' li wiib' chi mutz', naq kiwulak sa' jun li k'aleb'aal nach' chiru Jerusalen. Aran wankeb' naq kixtaqlaheb' wiib' reheb' li xtzolom ut kixye reheb': ‹Ayuqex sa' li k'aleb'aal ut naq teetaw jun li b'uur, teejit ut teek'am chaq we›.

Naq ke'xk'e li b'uur re li Jesus, kitaqe'k sa' xb'een ut xko sa' li tenamit Jerusalen. Naq li Jesus yook chaq chi nach'ok, li k'iila tenamit kichalk chi xk'ulb'al. Wankeb' ke'xjel li xt'ikr chiru ch'och'. Ut wankeb' ke'xk'e xaq li che' sa' b'e, toja' naq ke'xye: ‹Li Yos t-osob'tesinq re li awab'ej li kichalk sa' xk'ab'a' li Jehob'a›.

Sahebʼ saʼ xchʼool chi xk'ulb'al li Jesus

Sa' li q'e kutan eb' li ke'kanaak cho'q awab'ej, ke'ok sa' xb'eeneb' li b'uur sa' li tenamit Jerusalen, re naq te'ile'q xb'aaneb' li tenamit. Chi jo'kan kixb'aanu li Jesus. Ut eb' li qas qiitz'in ke'xk'utb'esi naq ke'raj naq li Jesus t-awab'ejinq reheb'. Ab'an moko chixjunileb' ta ke'raj li Jesus cho'q awab'ej. A'in naqanaw rik'in li kixk'ul li Jesus naq kiwulak sa' Rochoch li Yos.

Li Jesus kixk'irtasiheb' li mutz' ut eb' li sik sa' li Rochoch li Yos. Naq eb' li kok'al ke'ril a'in, ke'xk'e xloq'al li Jesus. Jo'kan naq eb' laj tij ke'chalk xjosq'il ut ke'xye re li Jesus: ‹Ma nakaawab'i li yookeb' xyeeb'al li kok'al?›

Li Jesus kixye reheb': ‹Ma ink'a' eerilom sa' li Santil Hu, naq li Yos tixb'aanu naq rik'in xtz'uumal reheb' li kok'al tk'eemanq xloq'al li awab'ej?› Eb' li kok'al ink'a' ke'xkanab' xloq'oninkil li awab'ej li kixtaqla chaq li Yos.

Us raj naq tqak'am qe rik'ineb' li kok'al a'in! Pe'yaal? Wankeb' neke'raj naq tqakanab' xk'eeb'al resil li Xnimajwal Awab'ejilal li Yos. Ab'an laa'o ink'a' tqakanab' aatinak chirix li osob'tesink li tixk'am chaq li Jesus sa' li Ruuchich'och'.

Naq li Jesus kik'ulunk sa' Ruuchich'och', toj maaji' xkutankil naq t-awab'ejinq. Eb' li xtzolom ke'raj xnawb'al joq'e t-awab'ejinq. Anaqwan qatzolaq chirix a'in.

Mateo 21:1-17; Juan 12:12-16.



Ebʼ li patzʼom

  • Naq li Jesus kiwulak sa’ jun li k’aleb’aal nach’ chiru Jerusalen, k’aru kixye reheb’ li xtzolom?
  • K’aru ke’xb’aanu eb’ li qas qiitz’in naq li Jesus yook chi ok sa’ li tenamit Jerusalen?
  • K’aru ke’xb’aanu eb’ li kok’al naq li Jesus kixk’irtasiheb’ li mutz’ ut eb’ li sik?
  • K’aru kixye li Jesus naq ke’josq’o’k eb’ laj tij?
  • Chanru tqak’am qe rik’ineb’ li kok’al li ke’xk’e xloq’al li Jesus?
  • K’aru ke’raj xnawb’al eb’ li xtzolom li Jesus?

Chaasume ajwiʼ ebʼ li patzʼom aʼin

  • Chaawil li naxye Mateo 21:1-17.

    Jo’ chanru ki’ok li Jesus sa’ li tenamit Jerusalen, ma jo’kan ajwi’ ke’ok eb’ laj Roma naq ke’elk chi’us sa’eb’ li yalok? (Mat. 21:4, 5; Zac. 9:9; Fili. 2:5-8; Col. 2:15.)

    K’aru tento te’xtzol eb’ li saaj al ut saaj ixqa’al rik’ineb’ li kok’al aj Israel naq li Jesus ki’ok sa’ li Rochoch li Yos, jo’ naxye sa’ li Salmo 118? (Mat. 21:9, 15; Sal. 118:25, 26; 2 Tim. 3:15; 2 Ped. 3:18.)

  • Chaawil li naxye Juan 12:12-16.

    K’aru xyaalal naq li tenamit kixk’e xaq li che’ sa’ li b’e re naq li Jesus t-oq sa’ li tenamit Jerusalen? (Juan 12:13; Fili. 2:10; Apoc. 7:9, 10.)