Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 95: Ch'ina'us Kik'utuk li Jesus!

Tzolom 95: Ch'ina'us Kik'utuk li Jesus!

SA' JUN kutan li Jesus kixye re jun li winq naq tento tixra li ras riitz'in. Li winq kixpatz' re li Jesus: ‹Ani li was wiitz'in?› Li Jesus naxnaw naq li winq a'in, yook xk'oxlankil naq li ras riitz'in a'an li rechtenamitul ut li rechpaab'al. Qatzolaq k'aru kixye li Jesus re li winq.

Li Jesus kik'utuk rik'in eetalil. Jo'kan naq ki'aatinak chirix jun laj Judio ut jun laj Samaria. Xqatzol naq eb' laj Judio ut eb' laj Samaria ink'a' neke'raatina rib'. A'in kixye li Jesus.

Sa' jun kutan, jun laj Judio yook chi xik sa' li tenamit Jerico, naq kichape'k xb'aaneb' laj elq'. Ke'xmaq' li xtumin, ke'xteni ut kach'in chik ma ke'xkamsi.

Sa' li b'e a'in kinume'k jun laj tij, aj Judio, kiril li winq chi t'ant'o. Ab'an, ma kixtenq'a li winq? Ink'a', yal kinume'k chiru ut xko! Chirix chik a'an kichalk jun laj Levita, aj paab'anel. K'aru nakaaye, ma kixtenq'a tawi' li winq? Ink'a' kixtenq'a li winq. Sa' li eetalil nak'utunk naq laj tij ut laj Levita koheb'.

Ma nakaanaw ani yook chi tenq'ank re laj Judio? Li winq aj Samaria yook xb'anb'al laj Judio. Ut kixsik' xna'aj li winq a'in re naq thilanq ut tk'iraaq.

Chaab’il li winq laj Samaria

Naq li Jesus kiraqe'k xseeraq'inkil a'in, kixye re li winq, li kixb'aanu li patz'om re: ‹Anaqwan ye we, ani reheb' li oxib' chi winq a'in, nakaak'oxla naq a'an tz'aqal ras riitz'in li kichape'k xb'aaneb' laj elq'? Ma laj tij, laj Levita malaj laj Samaria?›

Li winq kixye re li Jesus: ‹Laj Samaria, li kitenq'ank re laj Judio›.

Toja' naq li Jesus kixye re li winq: ‹Yaal nakaaye. Jo'kan naq aayu ut yu'ami li kixb'aanu laj Samaria›.

Ch'ina'us kik'utuk li Jesus! Pe'yaal? Laa'o naru tqatzol naab'al li na'leb' sa' li Santil Hu. Xb'aan naq aran wank chixjunil li kixb'aanu li Jesus.

Lucas 10:25-37.



Ebʼ li patzʼom

  • K’aru kixpatz’ jun li winq re li Jesus ut k’a’ut?

    Chanru kik’utuk li Jesus? K’aru xqatzol chirixeb’ laj Judio ut eb’ laj Samaria?

    Chirix li kixseeraq’i li Jesus, k’aru kixk’ul jun aj Judio naq yook chi xik sa’ li tenamit Jerico?

    K’aru kixb’aanu laj tij ut laj Levita naq ke’ril li winq chi t’ant’o?

    Ani kitenq’ank re laj Judio li ke’xteni?

    K’aru kixye li Jesus naq kiraqe’k xseeraq’inkil li jaljookil ru aatin? Ut chanru kisumenk li winq?

Chaasume ajwiʼ ebʼ li patzʼom aʼin

  • Chaawil li naxye Lucas 10:25-37.

    Chanru kixtenq’a li Jesus jun li winq aj nahol chaq’rab’ re naq tna’leb’aq? (Luc. 10:26; Mat. 16:13-16.)

    Chanru kiroksi li Jesus eb’ li eetalil re naq eb’ li qas qiitz’in te’xjal xna’leb’ malaj xk’a’uxl? (Luc. 10:36, 37; 18:9-14; Tito 1:9.)