Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 94: Li Jesus Kixraheb' li Kok'al

Tzolom 94: Li Jesus Kixraheb' li Kok'al

LI JESUS yook xq'alunkil jun li ch'ina'al. Arin nak'utunk naq li Jesus naxraheb' li kok'al. Eb' li winq li wankeb' rik'in li Jesus a'aneb' li x'apostol. Ma nakaanaw k'aru yook xyeeb'al li Jesus reheb'?

Naq li Jesus ut eb' li x'apostol yookeb' chaq chiru b'e, eb' li x'apostol ke'xweech'i rib'. Jo'kan naq li Jesus kixye reheb': ‹Chirix k'aru xeeweech'i eerib'? Li Jesus naxnaw chirix k'aru yookeb' chi pleetik. Ab'an kixb'aanu li patz'om a'in, yal re rilb'al ma te'xye xyaalal re.

Li Jesus wank rikʼin jun li chʼinaʼal

Naq li Jesus kixb'aanu li patz'om maajun reheb' li xtzolom kisumenk re, xb'aan naq yookeb' xyeeb'al ani reheb' wank xwankil. Chanru kixch'olob' li Jesus reheb' li xtzolom naq li wankil moko us ta xrahinkil ru?

Li Jesus kixk'e jun li ch'ina'al chiruheb' li xtzolom ut kixye reheb': ‹Cheenaw a'in, wi ink'a' nekeejal eena'leb' ut wi ink'a' jo'kaqex li kok'al maajoq'e tex'oq sa' li Xnimajwal Awab'ejilal li Yos. Li naxkub'si rib' jo' li ch'ina'al a'in, a'an li jwal nim xwankil sa' li Xnimajwal Awab'ejilal li Yos›. Ma nakaanaw k'a'ut kixye li Jesus a'in reheb' li xtzolom?

Xb'aan naq eb' li kok'al ink'a' neke'xnima xwankil, chi moko neke'xnimob'resi rib' chiruheb' li rechkok'alil. Jo'kan naq li Jesus kiraj naq eb' li xtzolom te'xtzol reheb' rik'ineb' li kok'al. Re naq ink'a' te'xrahi ru li wankil.

Moko ka'aj tawi' sa' li kutan a'in li Jesus kixk'utb'esi naq kixraheb' li kok'al. Xb'aan naq sa' jun kutan eb' li na'b'ej yuwa'b'ej ke'xk'am eb' li xkok'al rik'in li Jesus. Ab'an eb' li apostol ink'a' ke'xkanab' chi nume'k li kok'al. Jo'kan naq, li Jesus kixye reheb' li xtzolom: ‹Kanab'omaq chi chalk eb' li kok'al wik'in ut meeram chiruheb', xb'aan naq li chanchaneb' li kok'al a'aneb' te'eechaninq re li Nimajwal Awab'ejilal›. Chirix chik a'an, li Jesus kixq'aluheb' li kok'al ut kirosob'tesiheb'. Li Jesus kixraheb' li kok'al chi anchal xch'ool!

Mateo 18:1-4; 19:13-15; Marcos 9:33-37; 10:13-16.



Ebʼ li patzʼom

  • K’a’ut ke’xweech’i rib’ li x’apostol li Jesus naq yookeb’ chaq chiru b’e?
  • K’a’ut li Jesus kixxaqab’ jun ch’ina’al chiruheb’ li xtzolom?
  • Chanru naq eb’ li x’apostol li Jesus jo’kaqeb’ li kok’al?
  • Chanru kixk’utb’esi li Jesus naq moko jun sut ajwi’ kixraheb’ li kok’al?

Chaasume ajwiʼ ebʼ li patzʼom aʼin

  • Chaawil li naxye Mateo 18:1-4.

    K’a’ut li Jesus kiroksi li jaljookil ru aatin naq kik’utuk? (Mat. 13:34, 36; Mar. 4:33, 34.)

  • Chaawil li naxye Mateo 19:13-15.

    K’aru tento tqatzol chirixeb’ li kok’al wi’ naqaj naq li Xnimajwal Awab’ejilal li Yos toorosob’tesi? (Sal. 25:9; 138:6; 1 Cor. 14:20.)

  • Chaawil li naxye Marcos 9:33-37.

    K’aru kixye li Jesus reheb’ li xtzolom chirix rahinkil li wankilal? (Mar. 9:35; Mat. 20:25, 26; Gál. 6:3; Fili. 2:5-8.)

  • Chaawil li naxye Marcos 10:13-16.

    Chanru kixk’utb’esi li Jesus naq kixk’e xhoonal reheb’ li qas qiitz’in? K’aru te’xtzol rik’in li Jesus eb’ li cheekel winq li neke’k’amok b’e sa’eb’ li ch’uut? (Mar. 6:30-34; Fili. 2:1-4; 1 Tim. 4:12.)