K'A'UT naq ke'xkamsi laj Juan li kisub'uk re li Jesus sa' ha'? Li xHerodias, li rixaqil li awab'ej, xik' naril laj Juan, jo'kan naq kixb'aanu naq laj Herodes, li awab'ej tixtaqla xch'otb'al li xjolom laj Juan. Nimla maak ke'xb'aanu re laj Juan!

K'ajo' naq kiraho'k sa' xch'ool li Jesus naq kirab'i a'in, jo'kan naq xko xjunes sa' jun li na'aj. Li tenamit kitaqenk re ut naq li Jesus kiril a'in, kixtoq'ob'a ruheb'. Jo'kan naq ki'ok chi aatinak chirix li xNimajwal Awab'ejilal li Yos ut ki'ok chi xk'irtasinkileb'.

Ak yook chi ok li q'oqyink, naq eb' li xtzolom ke'xye re: ‹Ak x'ewuuk ut maak'a' wank sa' li na'aj a'in. Taqlaheb' li qas qiitz'in re naq te'xloq' chaq xtzakahemq sa' junaq reheb' li k'aleb'aal›.

Li Jesus kixch'oolani ajwi' naab'al li tenamit

Li Jesus kixye: ‹Moko aajel ta naq te'xik. Laa'ex texk'ehoq reheb' chi wa'ak›. Li Jesus kixye re laj Felipe: ‹B'ar tqaloq' xtzakahemq li qas qiitz'in?›

Laj Felipe kixye re li Jesus: ‹Naab'al tumin na'ajmank re naq te'ruuq chi wa'ak chixjunileb'›. Toja' naq kixye laj Andres: ‹Rik'in li ch'ina'al a'in, wank oob' li kaxlan wa ut wiib' li kar. Ab'an moko ttz'aqloq ta cho'q re li tenamit›.

Li Jesus kixye reheb' li xtzolom: ‹Yeehomaq re li tenamit naq te'hilanq sa' pach'aya'›. Chirix chik a'an, li Jesus kitijok chirix li tzakahemq, toja' naq kixjachi. Eb' li xtzolom li Jesus ke'ok xjek'inkil li kaxlan wa ut eb' li kar sa' xyanqeb' li 5.000 chi winq, wank ajwi' naab'al chi ixq ut kok'al. Chixjunileb' ke'wa'ak toj reetal ke'nujak. Ut toj kixokmank 12 chakach li tzakahemq.

Li Jesus kixtaqlaheb' li xtzolom sa' jun li jukub' re naq te'xik sa' junpak'al li nima' Galilea. Sa' li q'oqyink naq yookeb' chi xik chiru ha', kichalk jun li nimla kaqsut-iq' ut ki'ok chi reek'asinkil chi kaw li jukub'. Eb' li xtzolom li Jesus ke'xuwak naq ke'ril a'in. Chirix chik a'an, ke'ril sa' xchamal li q'oqyink naq jun li winq yook chaq chi b'eek sa' xb'een li nima'. Jo'kan naq ke'xuwak ut ke'ok xjapb'al re, xb'aan naq ink'a' neke'xnaw k'aru a'an.

Li Jesus kixye reheb': ‹Mexxuwak, laa'in!› Ab'an ink'a' ke'xpaab' re li Jesus. Jo'kan naq laj Pedro kixye re: ‹Wi laa'at, Qaawa', b'oqin re naq tinxik aawik'in›. Li Jesus kixye re laj Pedro: ‹Kim chintawb'al b'i'!› Toja' naq laj Pedro ki'elk sa' li jukub' ut ki'ok chi b'eek sa' xb'een li nima', ab'an kichalk xxiw ut ki'ok chi xik rub'el ha'. Li Jesus kikolok re.

Sa' jun chik kutan, li Jesus kixch'oolani ajwi' naab'al li tenamit. Kixb'aanu rik'in wuqub' chi kaxlan wa ut moko naab'al ta li kar. Ut chixjunileb' ke'wa'ak. Chaab'il kixb'aanu li Jesus. Naq li Jesus yooq chi awab'ejink sa' Ruuchich'och' maak'a'aq chik li rahilal.

Mateo 14:1-32; 15:29-38; Juan 6:1-21.



Ebʼ li patzʼom

  • K’aru ke’xb’aanu re laj Juan? K’aru kixye li Jesus naq kirab’i li ke’xb’aanu re laj Juan?
  • Chanru kixk’eheb’ chi wa’ak li Jesus eb’ li tenamit li ke’taqenk re? Jo’nimal li tzakahemq kikanaak naq li tenamit kiraqe’k chi wa’ak?
  • K’a’ut naq ke’xuwak eb’ li xtzolom li Jesus naq yookeb’ chi xik chiru ha’ ut k’aru kixk’ul laj Pedro?
  • Chanru kixk’eheb’ wi’ chik chi wa’ak li Jesus eb’ li tenamit?
  • K’a’ut chaab’il t-awab’ejinq li Jesus sa’ li Ruuchich’och’?

Chaasume ajwiʼ ebʼ li patzʼom aʼin

  • Chaawil li naxye Mateo 14:1-32.

    K’aru naxye Mateo 14:23-32 chirix li xna’leb’ laj Pedro?

    Chanru naxch’olob’ li Santil Hu naq laj Pedro us kik’oxlak ut kixjal xna’leb’? (Mat. 14:27-30; Juan 18:10; 21:7; Hech. 2:14, 37-40; 1 Ped. 5:6, 10.)

  • Chaawil li naxye Mateo 15:29-38.

    Chanru kixk’utb’esi li Jesus naq oxloq’ chiru li kik’ehe’k re xb’aan li Xyuwa’? (Mat. 15:37; Juan 6:12; Col. 3:15.)

  • Chaawil li naxye Juan 6:1-21.

    Li Jesus kiroxloq’iheb’ li neke’taqlank sa’ li tenamit, chanru te’xk’am reheb’ rik’in li Jesus li neke’loq’onink re li Jehob’a? (Juan 6:15; Mat. 22:21; Rom. 12:2; 13:1-4.)