K'ARU yook xb'aanunkil li Jesus sa' li tzuul re Galilea? Li Jesus yook chi xk'utb'al li yaal chiruheb' li qas qiitz'in. Ut, eb' li winq li wankeb' chi xk'atq a'aneb' li 12 chi tzolom, li kixsik'eb' ru cho'q x'apostol. Aniheb' xk'ab'a' li xtzolom li Jesus?

Li Jesus yook chi kʼutuk

Laj Simon Pedro ut laj Andres riitz'ineb' rib'. Laj Santiago ut laj Juan, riitz'ineb' ajwi' rib'. Laj Santiago, laj Simon, laj Judas Iscariote ut wank jun chik laj Judas yeeb'il re Tadeo, laj Felipe, laj Natanael yeeb'il re Bartolomeo, laj Mateo ut laj Tomas. A'aneb' li xkab'laju chi apostol li Jesus.

Naq li Jesus ki'elk chaq sa' li tenamit Samaria ut ki'ok xpuktesinkil li chaab'il esilal, kixye: ‹Li Xnimajwal Awab'ejilal li choxa ak xnach'ok chaq›. Ma nakaanaw k'aru li Awab'ejilal li kixye li Jesus? A'an li Xnimajwal Awab'ejilal li Yos. Li Jesus tjolominq sa' choxa sa' li Awab'ejilal a'in ut tixk'am chaq li tuqtuukilal sa' Ruuchich'och'. Chi jo'kan chixjunil li Ruuchich'och' twulaq cho'q Sahilal Na'ajej.

Sa' li tzuul a'in, li Jesus ki'aatinak chirix li Xnimajwal Awab'ejilal li Yos ut kixye: ‹Chi jo'ka'in textijoq, at Qayuwa' li wankat sa' choxa, santob'resinb'il taxaq laak'ab'a'. Chichalq ta Laanimajwal Awab'ejilal. Chi'uxq ta laawajom sa' choxa ut sa' Ruuchich'och'›. A'in li tij li kixk'ut li Jesus. Ma nakaanaw chixjunil li tij a'in?

Li Jesus kixk'ut ajwi' chanru tqak'am qib' sa' usilal ut kixye: ‹Chixjunil li teeraj naq te'xb'aanu eere, cheeb'aanuhaq ajwi' laa'ex reheb' a'an›. Ma twulaq raj chiqu naq sa too'e'ril? Jo'kan naq, tento naq chaab'ilaqo rik'ineb' li qas qiitz'in. K'ajo'aq xch'ina'usal naq chixjunileb' te'xb'aanu a'in sa' li Sahilal Na'ajej arin sa' Ruuchich'och'!

Mateo 5-7; 10:1-4.



Ebʼ li patzʼom

  • B’ar yook chi k’utuk li Jesus? Aniheb’ li winq wankeb’ chi xk’atq li Jesus?
  • Aniheb’ xk’ab’a’ li 12 chi apostol?
  • K’aru li Nimajwal Awab’ejilal chirix li ki’aatinak wi’ li Jesus?
  • K’aru kixye li Jesus naq tqatz’aama naq tootijok?
  • Chanru kixye li Jesus naq tento te’ril rib’eb’ li qas qiitz’in?

Chaasume ajwiʼ ebʼ li patzʼom aʼin

  • Chaawil li naxye Mateo 5:1-12.

    Chanru tqak’utb’esi naq tchaqiq qe chi sik’b’al li Yos? (Mat. 5:6; Rom. 10:13-15; 1 Tim. 4:13, 15, 16.)

  • Chaawil li naxye Mateo 5:21-26.

    Chanru naxk’ut Mateo 5:23, 24 naq moko us ta toowanq chiru li Jehob’a, wi ink’a’ sa naqileb’ li qahermaan? (Mat. 6:14, 15; Sal. 133:1; Col. 3:13; 1 Juan 4:20.)

  • Chaawil li naxye Mateo 6:1-8.

    K’aru li yiib’ru aj na’leb’ ke’xb’aanu eb’ laj Fariseo ut ink’a’ us naq te’xb’aanu reheb’ li neke’loq’onink re li Jehob’a? (Luc. 18:11, 12; 1 Cor. 4:6, 7; 2 Cor. 9:7.)

  • Chaawil li naxye Mateo 6:25-34.

    Chanru kixk’ut li Jesus naq tento tqak’ojob’ qach’ool rik’in li Jehob’a xb’aan naq a’an naxk’e qe li naqaj? (Éxo. 16:4; Sal. 37:25; Fili. 4:6.)

  • Chaawil li naxye Mateo 7:1-11.

    K’aru naxk’ut chiqu li eetalil li kixk’e li Jesus sa’ Mateo 7:5? (Pro. 26:12; Rom. 2:1; 14:10; Sant. 4:11, 12.)