MA NAKAANAW k'a'ut kichalk xjosq'il li Jesus? Xb'aan naq eb' li winq, li wankeb' sa' li Rochoch li Yos aran Jerusalen, yookeb' risinkil naab'al li tumin chiruheb' li neke'loq'onink re li Yos.

Li Jesus kixbʼalqʼusi li meex

Eb' li winq li wankeb' sa' li Rochoch li Yos, yookeb' xk'ayinkil eb' li b'ooyx, eb' li karneer ut eb' li mukuy. Ma nakaanaw k'a'ut yookeb' chi k'ayink arin? Xb'aan naq, eb' laj Israel neke'mayejak chiru li Yos.

Sa' li q'e kutan li xchaq'rab' li Yos naxye naq eb' laj Israel te'maakob'q, tento naq te'mayejaq. Ab'an moko ka'aj tawi' chirix li maak ke'mayejak, ke'mayejak ajwi' chirix eb' li jalan jalanq chi k'anjel. B'ar ke'xtaw eb' li xul li ke'xmayeja?

Eb' laj k'irisinel xul ut mukuy, moko kich'a'ajko'k ta chiruheb' naq ke'mayejak. Ab'an, wankeb' maak'a' k'aru te'xmayeja. Ut wankeb' ajwi' li neke'chalk chi najt, moko ke'ru ta chi xk'amb'al junaq li xul re xmayejankil. Jo'kan naq ke'chalk chi xloq'b'al eb' li xul sa' li Rochoch li Yos. Eb' laj k'ay yookeb' chi relq'ankil naab'al li tumin chiruheb' li ke'loq'onink re li Yos, xb'aan naq terto yookeb' xk'ayinkil eb' li xul. Ut li Rochoch li Yos maawa' k'ayib'aal.

Jo'kan naq li Jesus kixb'alq'usiheb' li meex ut kixkut chixjunil li tumin sa' ch'och'. Chirix chik a'an, kirisi chixjunil eb' li xul sa' Rochoch li Yos ut kixye reheb' laj k'ay: ‹Isihomaq arin eb' li mukuy! Meek'e cho'q k'ayiil li Rochoch linYuwa', arin nekexchalk chi b'ihomo'k›.

Eb' li xtzolom li Jesus, li wankeb' rik'in, ke'sach xch'ool naq ke'ril a'in. Toja' naq ke'jultiko'k reheb' li naxye li Santil Hu chirix li Ralal li Yos: ‹Rik'in xraab'al laawochoch naxamamnak linch'ool›.

Li Jesus kixb'aanu naab'al li sachb'ach'oolej naq yook chaq xnimankil li Paswa aran Jerusalen. Naq li Jesus ki'elk chaq sa' li tenamit Judea kisutq'iik Galilea. Ab'an toj kinume'k sa' xteepal Samaria, ma nakaanaw k'aru kik'ulmank aran?

Juan 2:13-25; 4:3, 4.



Ebʼ li patzʼom

  • K’a’ut yookeb’ xk’ayinkil eb’ li xul sa’ li Rochoch li Yos?
  • K’a’ut kichalk xjosq’il li Jesus?
  • K’aru yook xb’aanunkil li Jesus sa’ li eetalil? K’aru kixye li Jesus reheb’ laj k’ay mukuy?
  • K’aru ke’jultiko’k reheb’ li apostol naq ke’ril li kixb’aanu li Jesus sa’ Rochoch li Yos?
  • K’aru xk’ab’a’ li teep b’arwi’ kinume’k li Jesus naq xko Galilea?

Chaasume ajwiʼ li patzʼom aʼin

  • Chaawil li naxye Juan 2:13-25.

    Li Jesus kichalk xjosq’il naq kirileb’ laj k’ay sa’ li Rochoch li Xyuwa’, chanru tqil li k’ayink sa’ li Ch’utleb’aal Kab’l reheb’ laj Testiiw re li Jehob’a? (Juan 2:15, 16; 1 Cor. 10:24, 31-33.)