Rilb'al li na'leb'

Rilb'al li xtusulal naʼlebʼ

Tzolom 87: Toj Kach'in ut Wank Xna'leb'

Tzolom 87: Toj Kach'in ut Wank Xna'leb'

MA NAKAANAW ani li ch'ina'al yook chi aatinak rik'ineb' li winq? Li ch'ina'al a'an li Jesus ut wank 12 chihab' re. Ut eb' li winq a'aneb' li neke'k'utuk sa' li Rochoch li Yos aran Jerusalen.

Sachso xch'ool ke'kanaak eb' li winq xb'aan naq li Jesus naxnaw chirix li Yos ut chirix li Santil Hu. Ab'an, b'ar wank laj Jose ut li xMaria? K'a'ut maa'aniheb' rik'in li Jesus?

Li Jesus yook chi aatinak rikʼinebʼ li neke'k'utuk sa' Rochoch li Yos

Rajlal chihab' laj Jose kixk'ameb' li xjunkab'al sa' li tenamit Jerusalen re xnimankil li Paswa. Najt wank li tenamit Nazaret ut maak'a' li b'eleb'aal ch'iich'. Chi roqeb' neke'xik ut chiru oxib' kutan tana neke'wulak sa' li tenamit Jerusalen.

Nim li xjunkab'al laj Jose ut tento naq tixch'oolaniheb'. Wankeb' ranab' ut riitz'in li Jesus. Naq laj Jose, li xMaria ut eb' li ralal xk'ajol ke'elk chaq Jerusalen, ke'sutq'iik sa' li tenamit Nazaret. Ke'xk'oxla naq yook chaq li Jesus chirixeb'. Ab'an, naq ke'ok chi hilank ke'xk'e reetal naq li Jesus moko wank ta sa' xyanqeb' li xkomon ut eb' li ramiiw. Jo'kan naq laj Jose ut li xMaria ke'sutq'iik chi xsik'b'al li Jesus sa' li tenamit Jerusalen.

Naq kitawe'k li Jesus, yook xb'aanunkil eb' li patz'om reheb' li neke'k'utuk sa' Rochoch li Yos. Eb' li yookeb' chi ab'ink re, sachsookeb' xch'ool xb'aan naq wank xna'leb'. Li xMaria kixye re li Jesus: ‹K'a'ut xaab'aanu qe a'in? Yooko chaasik'b'al›.

Li Jesus kixye reheb': ‹K'a'ut yookex chinsik'b'al? Ma ink'a' nekeenaw naq tento wanqin sa' Rochoch linYuwa'?›

Li Jesus kiwulak chiru wank, b'arwi' neke'k'utuk chirix li Yos. Jo'kan naq, rajlal xamaan kiwulak chi xloq'oninkil li Yos sa' li tenamit Nazaret. Ut kixk'e xch'ool chi ab'ink sa'eb' li ch'utam, jo'kan naq kiwank xna'leb' chirix li Santil Hu. Ut laa'at, ma nawulak chaawu xik sa'eb' li ch'utam? Qatzolaq qe rik'in li Jesus.

Lucas 2:41-52; Mateo 13:53-56.



Ebʼ li patzʼom

  • Jarub’ chihab’ wank re li Jesus? Ut b’ar wank? (Chaawil li eetalil.)
  • K’aru ke’xb’aanu rajlal chihab’ laj Jose ut li xjunkab’al?
  • K’a’ut naq laj Jose ut xMaria ke’sutq’iik sa’ li tenamit Jerusalen?
  • B’ar ke’xtaw li Jesus naq yookeb’ xsik’b’al? K’a’ut naq eb’ li ke’k’utuk sa’ li Rochoch li Yos ke’sach xch’ool naq ke’rab’i li Jesus?
  • K’aru kixye li Jesus re li xna’?
  • Chanru tqak’am qe rik’in li Jesus naq nokootzolok chirix li Yos?

Chaasume ajwiʼ ebʼ li patzʼom aʼin

  • Chaawil li naxye Lucas 2:41-52.

    Usta li chaq’rab’ kixye naq ka’ajwi’ eb’ li winq te’xik xnimankil li Paswa, k’aru li chaab’il eetalil ke’xkanab’ laj Jose ut li xMaria cho’q reheb’ li na’b’ej yuwa’b’ej? (Luc. 2:41; Deu. 16:16; 31:12; Pro. 22:6.)

    K’aru li chaab’il eetalil kixkanab’ li Jesus cho’q reheb’ li saaj al ut ixqa’al chirix xpaab’ankil li na’b’ej yuwa’b’ej? (Luc. 2:51; Deu. 5:16; Pro. 23:22; Col. 3:20.)

  • Chaawil li naxye Mateo 13:53-56.

    Aniheb’ xk’ab’a’ eb’ li 4 chi riitz’in li Jesus? Chanru ke’ok chi k’anjelak sa’eb’ li ch’uut, wiib’ reheb’ li riitz’in li Jesus? (Mat. 13:55; Hech. 12:17; 15:6, 13; 21:18; Gál. 1:19; Sant. 1:1; Jud. 1.)