Rilb'al li na'leb'

Rilb'al li xtusulal naʼlebʼ

Tzolom 81: Ke'xyiib' Wi' Chik li Rochoch li Yos

Tzolom 81: Ke'xyiib' Wi' Chik li Rochoch li Yos

NAAB'ALEB' laj Israel ke'elk chaq Babilonia. Ut naq ke'wulak sa' li tenamit Jerusalen maa'ani ke'xtaw aran. Jo'kan naq eb' laj Israel ke'ok xyiib'ankil wi' chik li tenamit Jerusalen.

Eb' laj Israel ke'xyiib' xb'eenwa xna'aj b'arwi' te'xb'aanu li mayej chiru li Jehob'a. Naq ke'nume'k li po, ke'ok xyiib'ankil li Rochoch li Jehob'a. Eb' li xik' neke'ilok, ke'ok xseb'esinkileb' laj Israel re naq te'xkanab' xyiib'ankil li Rochoch li Yos. Naq laj Ciro kikamk, ke'xk'e jun chik li awab'ej sa' li tenamit Persia. Eb' li xik' neke'ilok ke'xb'aanu naq li awab'ej a'in, tixk'e jun li chaq'rab' re naq ink'a' te'xchoy xyiib'ankil li Rochoch li Yos.

Ak 17 chihab' relikeb' laj Israel sa' li tenamit Babilonia naq li Yos kixtaqla laj Ageo ut laj Zacarias, chi xyeeb'al reheb' laj Israel naq te'oq xyiib'ankil wi' chik li Rochoch li Yos. Eb' laj Israel neke'xnaw naq li Yos ttenq'anq reheb', jo'kan ke'ok chi k'anjelak chirix li ochoch, usta li chaq'rab' naxye naq ink'a' te'kab'laq.

Jo'kan naq laj Tatenai, jun reheb' laj puub' re Persia, kixye reheb' laj Israel naq k'aru xwankileb' naq yookeb' xyiib'ankil li Rochoch li Yos. Eb' laj Israel ke'xye re laj puub' naq laj Ciro, li awab'ej re Babilonia, kixye reheb': ‹Ayuqex sa' li tenamit Jerusalen ut yiib'amaq aran li Rochoch li Jehob'a, leeYos›.

Laj Ciro ak kamenaq, jo'kan naq laj Tatenai kixtaqla jun li hu sa' li tenamit Babilonia re xnawb'al ma laj Ciro kitaqlank reheb' laj Israel chi xyiib'ankil li Rochoch li xYoseb'. Toja' naq laj Dario, li awab'ej re Persia, kixye naq a'an xtaqlahom laj Ciro. Laj Dario kixtaqla xyeeb'al re laj Tatenai: ‹Kanab'omaq naq eb' laj Israel te'xb'aanu wi' chik li Rochoch li xYoseb' ut tenq'amaqeb' chi xb'aanunkil›. Chiru kaahib' chihab' tana ke'xchoy xyiib'ankil li Rochoch li Yos, jo'kan naq saheb' sa' xch'ool.

Anaqwan, 48 chihab' tana xyiib'ankil li Rochoch li Jehob'a. Eb' laj Israel li wankeb' Jerusalen neb'a'eb'. Li tenamit ut li Rochoch li Yos moko ch'ina'us ta neke'k'utunk. Laj Esdras wank chaq Babilonia naq ke'xye naq aajel ru xyiib'ankil li Rochoch li Yos. Ma nakaanaw k'aru kixb'aanu laj Esdras naq kixnaw a'in?

Laj Esdras kiwulak sik'b'al laj Artajerjes, li awab'ej re Persia. Laj Artajerjes chaab'il awab'ej. Kixk'e re laj Esdras naab'al li maatan re naq tixk'am Jerusalen. Laj Esdras kixye reheb' laj Israel li wankeb' Babilonia naq ttenq'aaq chi xk'amb'al li maatan. Koheb' tana 6.000 chi winq chirix ut ke'xk'am naab'al li plaat, li oor ut eb' li k'a'aq re ru.

Laj Esdras yook xk'a'uxl xb'aan naq naab'aleb' laj elq' sa' b'e ut naru te'kamsiiq xb'aan li k'a'aq re ru. Jo'kan naq laj Esdras kixch'utub'eb' laj Israel jo' nak'utunk sa' li eetalil. Chirix chik a'an laj Esdras ki'ok chi tijok chiru li Jehob'a re naq maak'a' te'xk'ul naq te'sutq'iiq sa' li tenamit Jerusalen.

Laj Esdras ut li tenamit yookebʼ chi tijok

Li Jehob'a kixtenq'aheb' chiru li kaahib' po naq yookeb' chi xik sa' li tenamit Jerusalen. Li tzolom a'in naxk'ut chiqu naq li Jehob'a naru tooxkol wi k'ojk'o qach'ool rik'in.

Esdras 2-8.



Ebʼ li patzʼom

  • Jarub’eb’ laj Israel ke’elk chaq Babilonia? Chanru ke’xtaw li tenamit Jerusalen?
  • K’aru ke’ok xyiib’ankil eb’ laj Israel naq ke’wulak sa’ li xtenamiteb’? K’aru ke’xb’aanu eb’ li xik’ neke’ilok reheb’ laj Israel?
  • Ani laj Ageo ut laj Zacarias ut k’aru ke’ok xyeeb’al re li tenamit?
  • K’a’ut naq laj Tatenai kixtaqla jun li hu sa’ li tenamit Babilonia? K’aru kitaqlaak xyeeb’al re laj Tatenai xb’aan li awab’ej re Babilonia?
  • K’aru kixb’aanu laj Esdras naq kirab’i naq aajel ru xyiib’ankil li Rochoch li Yos?
  • Chaawil li eetalil, k’aru kixpatz’ laj Esdras re li Jehob’a? Chanru kixsume li Jehob’a li xtij laj Esdras? K’aru naqatzol chirix li tzolom a’in?

Chaasume ajwiʼ ebʼ li patzʼom aʼin

  • Chaawil li naxye Esdras 3:1-13.

    K’aru ink’a’ tqakanab’ xb’aanunkil usta wanko sa’ junaq na’ajej b’arwi’ maak’a’ junaq li ch’uut re xloq’oninkil li Jehob’a? (Esd. 3:3, 6; Hech. 17:16, 17; Heb. 13:15.)

  • Chaawil li naxye Esdras 4:1-7.

    K’aru li chaab’il eetalil kixkanab’ qe laj Zorobabel chirix chanru xloq’oninkil li Jehob’a? (Éxo. 34:12; 1 Cor. 15:33; 2 Cor. 6:14-17.)

  • Chaawil li naxye Esdras 5:1-5, 17 ut 6:1-22.

    K’a’ut naq eb’ li xik’ neke’ilok ink’a’ ke’ru xb’aanunkil naq eb’ laj Israel te’xkanab’ xyiib’ankil li Rochoch li Yos? (Esd. 5:5; Isa. 54:17.)

    Chanru neke’kawresiik xch’ool eb’ li cheekel winq sa’eb’ li ch’uut, xnawb’al li ke’xb’aanu chaq eb’ li ke’k’amok b’e sa’ li tenamit Israel naq ink’a’ ke’kanab’aak chi xyiib’ankil li Rochoch li Jehob’a? (Esd. 6:14; Sal. 32:8; Rom. 8:31; Sant. 1:5.)

  • Chaawil li naxye Esdras 8:21-23, 28-36.

    Jo’ kixb’aanu laj Esdras, k’aru raj us tqab’aanu naq ok qe xb’aanunkil junaq li nimla k’anjel? (Esd. 8:23; Sal. 127:1; Pro. 10:22; Sant. 4:13-15.)