AK XNUME'K tana wiib' chihab' naq eb' laj Medos ut eb' laj Persa ke'reechani li tenamit Babilonia. Anaqwan eb' laj Israel yookeb' chi elk Babilonia. Ani ki'ach'ab'ank chaq reheb'?

Laj Ciro, li awab'ej re Persia, kirisiheb' chaq eb' laj Israel sa' li tenamit Babilonia. Toj maaji' nayo'laak laj Ciro naq li Jehob'a kixye re laj Isaias, laj k'anjel chiru, naq tixtz'iib'a li tixb'aanu laj Ciro: ‹Taab'aanu li tinye aawe. Te'kanaaq chi teeto eb' li rokeb'aal li tenamit Babilonia re naq tatruuq reechaninkil li tenamit›. Laj Ciro kijolomink reheb' laj Medos ut eb' laj Persa naq ke'reechani li tenamit Babilonia. Chi jo'kan kitz'aqlok ru li kixye li Jehob'a.

Laj Isaias kixye ajwi' naq laj Ciro ttaqlanq chi xyiib'ankil wi' chik li tenamit Jerusalen ut chi xyiib'ankil li Rochoch li Yos. Jo'kan naq laj Ciro kixk'e jun li chaq'rab' reheb' laj Israel: ‹Ayuqex sa' li tenamit Jerusalen ut yiib'amaq aran li Rochoch li Jehob'a, leeYos›. Eb' laj Israel koheb' chi xb'aanunkil li kixye li awab'ej.

Ebʼ laj Israel yookebʼ chi elk Babilonia

Moko chixjunileb' ta laj Israel ke'ru chi elk sa' li tenamit Babilonia. Xb'aan naq wank cheekeb' ut yajeb' ut kaahib' po ki'ajmank re naq te'ruuq chi wulak sa' li tenamit Jerusalen. Laj Ciro kixye reheb' li ink'a' ke'ru chi xik: ‹K'emaq oor, plaat ut li maatan reheb' li te'xik xyiib'ankil li Rochoch li Yos li wank Jerusalen›.

Naq eb' laj Israel koheb' sa' li tenamit Jerusalen ke'xk'am naab'al li maatan. Ut laj Ciro kixk'e reheb' li sek' re oor ut plaat li kirisi chaq laj Nabucodonosor sa' li Rochoch li Jehob'a. Jo'kan naq, naab'al li k'a'aq re ru ke'xk'am chirixeb'.

Kaahib' po tana kinume'k naq ke'wulak eb' laj Israel sa' li tenamit Jerusalen. Aran kitz'aqlok li 70 chihab' naq kik'atmank li tenamit Jerusalen ut naq ke'k'ame'k cho'q moos eb' laj Israel. Usta ke'sutq'iik sa' li xtenamiteb' toj ke'xk'ul naab'al li rahilal.

Isaías 44:28; 45:1-4; Esdras 1:1-11.



Ebʼ li patzʼom

  • K’aru yookeb’ xb’aanunkil eb’ laj Israel?
  • Chanru kitz’aqlok ru li raatin li Jehob’a rik’in laj Ciro?
  • K’aru kixye laj Ciro reheb’ li ink’a’ ke’ru chi xik Jerusalen?
  • K’aru kixk’e laj Ciro reheb’ laj Israel naq koheb’ Jerusalen?
  • Chiru jarub’ po ke’wulak eb’ laj Israel sa’ li tenamit Jerusalen?
  • Jarub’ chihab’ kinume’k re naq te’sutq’iiq eb’ laj Israel sa’eb’ li xtenamit?

Chaasume ajwiʼ ebʼ li patzʼom aʼin

  • Chaawil li naxye Isaías 44:28 ut 45:1-4.

    Chanru kixch’olob’ li Jehob’a naq chirix laj Ciro ttz’aqloq ru li Raatin? (Isa. 55:10, 11; Rom. 4:17.)

    Naq kitz’aqlok ru li Raatin li Jehob’a chirix laj Ciro, chanru naxk’utb’esi a’in naq li Jehob’a naxnaw k’aru tk’ulmanq sa’ li kutan chaalel? (Isa. 42:9; 45:21; 46:10, 11; 2 Ped. 1:20.)

  • Chaawil li naxye Esdras 1:1-11.

    Wi naqaj xk’amb’al qe rik’in li ink’a’ ke’ru chi sutq’iik sa’ li tenamit Jerusalen, k’aru tento tqab’aanu re xtenq’ankileb’ li neke’raj k’anjelak chiru li Yos jo’ precursor? (Esd. 1:4, 6; Rom. 12:13; Col. 4:12.)