Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 74: Laj Jeremias

Tzolom 74: Laj Jeremias

ANI li winq yookeb' xse'enkil? A'an laj Jeremias ut aj k'anjel chiru li Jehob'a. Laj Jeremias yook xk'eeb'al jun nimla esil reheb' laj Israel.

Yookebʼ xse'enkil laj Jeremias

Laj Josias ak kixsach chixjunil eb' li pech'b'il yos sa' li tenamit Jerusalen, naq li Jehob'a kixye re laj Jeremias naq tkanaaq cho'q aj k'anjel chiru. Laj Jeremias kixk'oxla naq ink'a' truuq k'anjelak chiru li Jehob'a xb'aan naq toj saaj. Ab'an li Jehob'a kixyeechi'i xtenq'ankil.

Laj Jeremias kixye reheb' laj Israel naq te'xkanab' xb'aanunkil li maa'usilal. Toja' naq kixye reheb': ‹Eb' li tenamit yookeb' xloq'oninkil eb' li pech'b'il yos›. Naab'aleb' laj Israel ink'a' chik neke'raj xloq'oninkil li Jehob'a. Laj Jeremias kixye re li tenamit naq li Jehob'a traqoq aatin sa' xb'eeneb'. Naq ke'rab'i a'in, ke'ok xse'enkil.

Chirix chik a'an kikamk laj Josias. Oxib' po xkamik laj Josias naq laj Joaquim, li ralal, kikanaak cho'q awab'ej. Laj Jeremias kixye reheb' laj Israel: ‹Li tenamit Jerusalen tsachmanq wi ink'a' nekeejal leena'leb'›. Jo'kan naq eb' laj tij ke'xchap laj Jeremias ut ke'xye: ‹Tento naq tkamq laj Jeremias xb'aan naq xmaajewa li qatenamit!›

K'aru tixb'aanu laj Jeremias xb'aan naq te'raj xkamsinkil? Laj Jeremias ink'a' naxuwak chiru li tenamit, jo'kan naq kixye reheb': ‹Li Jehob'a kitaqlank chaq we eerik'in ut wi ink'a' nekeejal leena'leb', traqoq aatin sa' xb'een leetenamit Jerusalen. Wi tineekamsi, laa'ex nekeenaw naq maak'a' inmaak cheeru›.

Eb' li neke'jolomink sa' li tenamit ink'a' ke'xkamsi laj Jeremias, ab'an eb' laj Israel ink'a' ke'xkanab' xb'aanunkil li maa'usilal. Chirix chik a'an; laj Nabucodonosor, li awab'ej re Babilonia, kichalk chi yalok sa' xb'eeneb' laj Jerusalen. Toja' naq laj Nabucodonosor kixk'eheb' laj Israel cho'q xmoos. Naab'aleb' xk'ihal laj Israel kixk'am sa' li tenamit Babilonia. K'aru taak'oxla naq jun ch'uut chi winq tate'xk'am raj sa' jalan chik tenamit?

Jeremías 1:1-8; 10:1-5; 26:1-16; 2 Reyes 24:1-17.



Ebʼ li patzʼom

  • Ani li winq yookeb’ xse’enkil?
  • K’aru kixk’oxla laj Jeremias naq li Jehob’a kixye re naq tkanaaq cho’q aj k’anjel chiru?
  • K’aru esil yook xk’eeb’al laj Jeremias reheb’ laj Jerusalen?
  • K’aru ke’xb’aanu eb’ laj tij re naq laj Jeremias ink’a’ chik t-aatinaq chirix li Jehob’a? Chanru kixk’utb’esi laj Jeremias naq ink’a’ naxuwak?
  • K’aru ke’xk’ul eb’ laj Israel naq ink’a’ ke’xkanab’ xb’aanunkil li maa’usilal?

Chaasume ajwiʼ ebʼ li patzʼom aʼin

  • Chaawil li naxye Jeremías 1:1-8.

    Rik’in li eetalil li kixkanab’ laj Jeremias, k’aru ttenq’anq re junaq li poyanam re naq tk’anjelaq chiru li Jehob’a? (2 Cor. 3:5, 6.)

    Rik’in li kixb’aanu laj Jeremias, chanru naxkawresiheb’ xch’ool eb’ li toj saajeb’? (Ecl. 12:1; 1 Tim. 4:12.)

  • Chaawil li naxye Jeremías 10:1-5.

    K’aru eetalil kixk’e laj Jeremias re xk’utb’esinkil naq maak’a’ neke’ok wi’ eb’ li pech’b’il yos? (Jer. 10:5; Isa. 46:7; Hab. 2:19.)

  • Chaawil li naxye Jeremías 26:1-16.

    Li Jehob’a kixye re laj Jeremias naq maajun li aatin tixmuq naq tixk’e li esil reheb’ laj Israel, chanru neke’xk’am reheb’ rik’in laj Jeremias eb’ li yulb’ileb’ ru rik’in santil musiq’ej? (Jer. 26:2; Deu. 4:2; Hech. 20:27.)

    K’aru chaab’il eetalil kixkanab’ laj Jeremias cho’q reheb’ laj Testiiw re li Jehob’a naq neke’xk’e resil li te’xk’ul li maa’useb’ xna’leb’? (Jer. 26:8, 12, 14, 15; 2 Tim. 4:1-5.)

  • Chaawil li naxye 2 Reyes 24:1-17.

    K’aru li rahilal ke’xk’ul eb’ laj Juda xb’aan naq ink’a’ tiikeb’ xch’ool chiru li Jehob’a? (2 Rey. 24:2-4, 14.)