Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 68: Wiib' li Kok'al Ke'kamk

Tzolom 68: Wiib' li Kok'al Ke'kamk

WI TKAMQ raj junaq ch'ina'al, k'aru tixye li xna' wi twakliiq raj wi' chik chi yo'yo? K'ajo' raj tsaho'q sa' xch'ool chi rilb'al! Ab'an, ma aawab'ihom naq xwakliik wi' chik chi yo'yo junaq kamenaq?

Sa' li eetalil wank jun li winq, wank jun li ixq ut jun li ch'ina'al. Li winq a'an laj Elias ut aj k'anjel chiru li Yos. Li ixq a'in kiyo'laak sa' li tenamit Sarepta ut malka'an. Ut li ch'ina'al a'an li xyum li malka'an. Ab'an sa' jun kutan li ch'ina'al kinimank xyajel ut kikamk. Naq kikamk li ch'ina'al laj Elias kixye re li malka'an: ‹K'e we laayum›.

Laj Elias rikʼin li malka'an ut li xyum li kiwakliik wi' chik chi yo'yo

Laj Elias kixk'am li ch'ina'al sa' xkab' tasal li ochoch ut kixk'e sa' ch'aat. Ut kixye re li Jehob'a: ‹At Jehob'a b'aanu usilal waklesi wi' chik chi yo'yo li ch'ina'al a'in›. Toja' naq kik'ulunk xch'ool li ch'ina'al! Chirix chik a'an laj Elias kikub'eek chaq rik'in li ch'ina'al ut kixye re li malka'an: ‹Laayum yo'yo›. Li malka'an kisaho'k sa' xch'ool naq kiril ru li xyum.

Laj Eliseo a'an jun chik laj k'anjel chiru li Jehob'a. Laj Eliseo natenq'ank re laj Elias. Li Jehob'a kixk'e xwankil laj Eliseo re naq tixb'aanu ajwi' li sachb'ach'oolej. Naq laj Eliseo kiwulak sa' li tenamit Sunem kixtaw jun li qana'chin jwal chaab'il rik'in. Chirix chik a'an li qana'chin a'in ut li xb'eelom ke'wank jun li xyum.

Ma nakaanaw k'aru kixk'ul li ch'ina'al naq ak nim chik? Sa' jun eq'la li ch'ina'al xko xtawb'al li xyuwa' sa' li xk'anjel. Toja' naq ki'ok xyeeb'al: ‹K'ajo' xrahil linjolom!› Naq li ch'ina'al kiwulak sa' rochoch, kikamk. Kiraho'k sa' xch'ool li xna', jo'kan naq xko sa' junpaat chi xsik'b'al laj Eliseo.

Laj Eliseo kiwulak sa' rochoch li qana'chin ut kixk'am li ch'ina'al sa' xch'aat, kitijok ut kiyoklaak sa' xb'een. Toja' naq ki'ok chi luhaak xtib'el li ch'ina'al ut wuqub' sut ki'at'isamak. Naq li na'b'ej kiril naq li xyum ki'ajk ru, kisaho'k sa' xch'ool!

Naq neke'kamk li qakomon ut eb' li qamiiw naraho'k sa' qach'ool. Ab'an laa'o ink'a' nokooru xwaklesinkileb' chi yo'yo. Ka'ajwi' li Jehob'a naru xwaklesinkileb' li kamenaq. Toj tqatzol chanru tixb'aanu a'in.

1 Reyes 17:8-24; 2 Reyes 4:8-37.


Ebʼ li patzʼom

  • Aniheb’ wankeb’ sa’ li eetalil? K’aru kixk’ul li ch’ina’al li wank sa’ li eetalil?
  • K’aru kixye laj Elias naq kitijok chirix li ch’ina’al? K’aru kik’ulmank naq laj Elias kiraqe’k chi tijok?
  • Chanru xk’ab’a’ li winq li kitenq’ank re laj Elias?
  • K’a’ut naq kitaqlaak laj Eliseo sa’ rochoch jun li ixq sa’ li tenamit Sunem?
  • K’aru kixb’aanu laj Eliseo naq kikamk li ch’ina’al? Rik’in li kixb’aanu laj Eliseo, k’aru kixk’ul li ch’ina’al?
  • Naq li Jehob’a kixk’e xwankil laj Elias ut laj Eliseo, k’aru naxk’ut chiqu a’in chirix li xwankil li Jehob’a?

Chaasume ajwiʼ ebʼ li patzʼom aʼin

  • Chaawil li naxye 1 Reyes 17:8-24.

    Chanru kiyale’k rix li xpaab’al laj Elias? (1 Rey. 17:9; 19:1-4, 10.)

    K’a’ut nim xpaab’al li malka’an re li tenamit Sarepta? (1 Rey. 17:12-16; Luc. 4:25, 26.)

    K’aru naxye Mateo 10:41, 42 chirix li tqak’ul wi yooko xb’aanunkil jo’ li malka’an? (1 Rey. 17:10-12, 17, 23, 24.)

  • Chaawil li naxye 2 Reyes 4:8-37.

    K’aru naxk’ut chiqu naq li ixq re Sunem kixk’ul laj Eliseo sa’ rochoch? (2 Rey. 4:8; Luc. 6:38; Rom. 12:13; 1 Juan 3:17.)

    K’aru tento tqab’aanu re xtenq’ankileb’ li neke’paab’ank re li Jehob’a? (Hech. 20:35; 28:1, 2; Gál. 6:9, 10; Heb. 6:10.)