Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 67: Li Awab'ej Jehosafat

Tzolom 67: Li Awab'ej Jehosafat

ANIHEB' li winq li wankeb' sa' li eetalil ut k'aru yookeb' xb'aanunkil? Eb' li winq a'in yookeb' chi b'ichank ut xikeb' re chi yalok. Qilaq, k'a'ut naq maak'a'eb' xch'iich' ut xjutz' che'?

Ebʼ laj Israel yookeb' chi xik sa' li yalok

Laj Jehosafat a'an li awab'ej re li xteep laj Benjamin ut laj Juda. Laj Jehosafat kiwank sa' xkutankil naq laj Acab ut li xJezabel yookeb' xjolominkil li 10 chi teep re Israel. Laj Jehosafat chaab'il awab'ej. Jo'kan ajwi' laj Asa, li xyuwa' laj Jehosafat, chaab'il naq kiwank chaq. Jo'kan naq chiru naab'al chihab' eb' li wiib' chi teep saheb' chaq sa' xch'ool.

Eb' laj Israel yookeb' xxiw. Xb'aan naq wiib' oxib' chi winq ke'xye re laj Jehosafat: ‹Naab'aleb' laj Moab, laj Amon ut eb' laj Seir te'chalq chi yalok sa' aab'een›. Jo'kan naq naab'aleb' laj Israel ke'xch'utub' rib' sa' li tenamit Jerusalen sa' Rochoch li Yos re naq li Jehob'a ttenq'anq reheb'. Aran kitijok laj Jehosafat: ‹Jehob'a, at inYos, ink'a' naqanaw k'aru tqab'aanu. Naab'aleb' laj puub' chalkeb' re sa' qab'een. Choo'aatenq'a, b'aanu usilal!›

Li Jehob'a kirab'i li xtij laj Jehosafat, jo'kan naq kixtaqla jun reheb' laj k'anjel chiru re naq tixye re li tenamit: ‹Li yalok a'in re li Yos ut maawa' eere. Moko laa'ex ta texyaloq. Teeril chanru texkol li Jehob'a›.

Naq kisaqewk, laj Jehosafat kixye re li tenamit: ‹K'ojob'amaq eech'ool rik'in li Jehob'a›. Toja' naq kixk'eheb' laj b'ich chiruheb' laj puub'. Naq yookeb' chi xik sa' li yalok, yookeb' ajwi' chi b'ichank chiru li Jehob'a. Ma nakaanaw k'aru kik'ulmank naq eb' laj Israel wulakeb' re sa' li na'aj b'arwi' te'yaloq? Li Jehob'a kixb'aanu naq eb' laj puub', li xik' neke'ilok reheb', te'yaloq chirib'ileb' rib'. Naq ke'wulak, ke'xtaw eb' laj puub' chi kamenaq.

Laj Jehosafat wank xna'leb', jo'kan naq kixk'ojob' xch'ool rik'in li Yos. Wi tqak'ojob' qach'ool rik'in li Jehob'a tqak'utb'esi ajwi' naq wank qana'leb'.

1 Reyes 22:41-53; 2 Crónicas 20:1-30.


Ebʼ li patzʼom

  • Ani laj Jehosafat? Sa’ k’aru kutankil kiwank laj Jehosafat?
  • K’a’ut naq yookeb’ xxiw eb’ laj Israel ut k’aru ke’xb’aanu?
  • Chanru kichaq’ok li Jehob’a naq kitijok laj Jehosafat chiru?
  • K’aru kixb’aanu li Jehob’a naq toj maaji’ neke’ok chi yalok eb’ laj Israel?
  • K’aru naqatzol chirix laj Jehosafat?

Chaasume ajwiʼ ebʼ li patzʼom aʼin

  • Chaawil li naxye 2 Crónicas 20:1-30.

    Chanru te’xk’am reheb’ laj paab’anel rik’in laj Jehosafat naq wanqeb’ sa’ ch’a’ajkilal? (2 Cró. 20:12; Sal. 25:15; 62:2.)

    Sa’eb’ li qakutan, chanru na’aatinak li Jehob’a rik’in li xtenamit? (2 Cró. 20:14, 15; Mat. 24:45-47; Juan 15:15.)

    Naq li Jehob’a tixk’am chaq li nimla yalok u, chanru tqajuntaq’eeta li kixk’ul laj Jehosafat rik’in li tqak’ul sa’ li kutan a’an? (2 Cró. 20:15, 17; 32:8; Apoc. 16:14, 16.)

    Jo’ ke’xb’aanu eb’ laj levitas chanru neke’tenq’ank eb’ laj precursores ut eb’ laj misioneros chi xpuktesinkil li chaab’il esilal sa’ chixjunil li Ruuchich’och’? (2 Cró. 20:19, 21; Rom. 10:13-15; 2 Tim. 4:2.)