LAJ David ak yook chi awab'ejink sa' li tenamit Jerusalen naq li Jehob'a kixb'aanu naq naab'al sut te'elq chi'us sa' li yalok. Li Jehob'a kixyeechi'i li tenamit Canaan reheb' laj Israel. Jo'kan naq, sa' xk'ab'a' li Jehob'a ke'reechani chixjunil li ch'och' a'in.

Laj David naxra li Jehob'a ut naxnaw awab'ejink. Naq ke'reechani li tenamit Jerusalen laj David kixk'am aran xkaaxil li sumwank. Jo'kan naq traj xyiib'ankil jun Rochoch li Jehob'a re naq wanq xna'aj li kaax a'in.

Ke'nume'k li chihab' ut laj David kimaakob'k. Laj David naxnaw naq nimla maak xchapb'al li maawa' qe. Sa' jun q'oqyink, laj David yook chi b'eek sa' xmuheb'aal li rochoch naq ki'ilok taq'a kixk'e reetal naq wank jun li ixq ch'ina'us na'ilok. A'an li xBat-seba ut aj Urias xk'ab'a' li xb'eelom li ixq a'in. Laj Urias nak'anjelak cho'q aj puub' rik'in laj David.

Laj David kixra ru wank rik'in xBat-seba jo'kan naq kixtaqla xb'oqb'al. Li xb'eelom li xBat-seba najt yook chaq chi yalok. Laj David kiwank rik'in li ixq. Chirix chik a'an, kixnaw naq li xBat-seba wank sa' yu'am. Laj David ki'ok xk'a'uxl, jo'kan naq kixye re laj Joab, li najolomink reheb' laj puub', naq tixk'e laj Urias chiruheb' li xik' neke'ilok reheb' re naq tkamsiiq. Naq kikamk laj Urias, laj David kisumlaak rik'in xBat-seba.

Li Jehob'a kichalk xjosq'il rik'in laj David. Jo'kan naq kixtaqla laj Natan re xyeeb'al re laj David li xmaak. Sa' li eetalil nak'utunk naq laj Natan wank rik'in laj David. Laj David kiyot'e'k xch'ool, jo'kan naq li Jehob'a ink'a' kixkamsi. Laj Natan kixye re laj David: ‹K'a'ut naq xatmaakob'k, anaqwan tchalq li rahilal sa' laajunkab'al›. Nim li rahilal kichalk sa' xb'een laj David!

Laj Natan yook xqʼusbʼal laj David

Jo'kan naq, kikamk li xyum li xBat-seba. Chirix chik a'an, laj Amnon, li xb'een ralal laj David, kixchap ut kiyoklaak rik'in li xTamar, li ranab'. Toja' naq, kichalk xjosq'il laj Absalon ut kixkamsi laj Amnon, li ras. Laj Absalon kixb'aanu naq eb' laj Israel te'xk'e cho'q awab'ej. Laj David ki'elk chi'us naq kiyalok rik'in laj Absalon. Toja' naq kikamk laj Absalon. Naab'al li rahilal kixk'ul laj David.

Li xBat-seba kiwank jun chik xyum, aj Salomon kixk'e cho'q xk'ab'a'. Ak cheek ut yaj laj David naq laj Adonias, li ralal, kixyal kanaak cho'q awab'ej. Jo'kan naq laj David kixye re laj Sadoc, laj tij, naq tixk'e aseeyt sa' xjolom laj Salomon re xk'utb'esinkil naq li ralal a'in tkanaaq cho'q awab'ej. Moqon chik kikamk laj David naq wank 70 chihab' re. Chiru 40 chihab' ki'awab'ejink laj David ut laj Salomon kikanaak cho'q awab'ej.

2 Samuel 11:1-27; 12:1-18; 1 Reyes 1:1-48.



Ebʼ li patzʼom

  • K’aru kik’ulmank rik’in li tenamit Canaan xb’aan naq li Jehob’a kixtenq’aheb’ laj Israel?
  • K’aru kixb’aanu laj David naq yook chi b’eek sa’ xmuheb’aal li rochoch?
  • K’a’ut naq kichalk xjosq’il li Jehob’a sa’ xb’een laj David?
  • Ani kixtaqla li Jehob’a chi xyeeb’al re laj David li maak? Ut k’aru kixye li winq a’in naq tixk’ul laj David?
  • K’aru li rahilal kichalk sa’ xb’een laj David?
  • Naq kikamk laj David, ani chik kikanaak cho’q awab’ej sa’ li tenamit Israel?

Chaasume ajwiʼ ebʼ li patzʼom aʼin

  • Chaawil li naxye 2 Samuel 11:1-27.

    Laj David kimaakob’k rik’in li xBat-seba naq ink’a’ xko chi yalok, k’a’ut us naq junelik yooqo chi k’anjelak chiru li Jehob’a?

    K’a’ut naq laj David kimaakob’k? Jo’ aj paab’anel, chanru tooxtenq’a xnawb’al a’in? (2 Sam. 11:2; Mat. 5:27-29; 1 Cor. 10:12; Sant. 1:14, 15.)

  • Chaawil li naxye 2 Samuel 12:1-18.

    K’aru te’xtzol li na’b’ej yuwa’b’ej ut eb’ li neke’k’amok b’e sa’eb’ li ch’uut, naq laj Natan kixk’e xna’leb’ laj David? (2 Sam. 12:1-4; Pro. 12:18; Mat. 13:34.)

    K’a’ut naq li Jehob’a kixkuy xmaak laj David? (2 Sam. 12:13; Sal. 32:5; 2 Cor. 7:9, 10.)