Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 57: Li Yos Kixsik' Ru laj David

Tzolom 57: Li Yos Kixsik' Ru laj David
Laj David xkol jun li karneer

K'ARU yook chi k'ulmank sa' li eetalil? Li ch'ina'al a'in kixkol jun li karneer sa' ruq' jun li oso. Li xul a'in kixk'am jun li ch'ina karneer. Jo'kan naq li ch'ina'al kixtoch' li oso ut kixkol li karneer. Naq li oso kiwakli, li ch'ina'al kixkamsi. Kixkol ajwi' jun li karneer sa' ruq' jun li kaqkoj. Kaw rib' li ch'ina'al. Ab'an, ma nakaanaw ani li ch'ina'al a'in?

Li ch'ina'al a'an laj David ut Belen kiyo'laak chaq. Li xyuwa'chin laj David a'an laj Obed. Li xna' xyuwa' laj Obed a'an li xRut ut laj Boaz. Li xyuwa' laj David a'an laj Jese. Laj David naril xkarneer li xyuwa'. Ak 10 chihab' rokik chi awab'ejink laj Saul naq kiyo'laak laj David.

Kiwulak xkutankil naq li Jehob'a kixye re laj Samuel: ‹K'am li aseeyt sa' rochoch laj Jese. Xb'aan naq xinsik' ru jun reheb' li ralal cho'q awab'ej›. Naq laj Samuel kiril ru laj Eliab, li xb'een ralal laj Jese, kixk'oxla: ‹A'in tana sik'b'il ru xb'aan li Jehob'a›. Ab'an li Jehob'a kixye re: ‹Maawil xch'ina'usal chi moko li xnajtil roq. Moko a'an ta xinsik' ru›.

Toja' naq laj Jese kixb'oq laj Abinadab ut kixk'e chiru laj Samuel. Laj Samuel kixye: ‹Moko a'an ta sik'b'il ru xb'aan li Jehob'a›. Chirix chik a'an laj Jese kixk'am laj Samah, li ralal, chiru laj Samuel. Toja' naq laj Samuel kixye: ‹Moko a'an ta sik'b'il ru xb'aan li Jehob'a›. Laj Jese kixk'ameb' wuqub' li ralal chiru laj Samuel, ab'an maajun reheb' ke'sik'e'k ru. Jo'kan naq kixye laj Samuel: ‹Ma a'in chixjunileb' laawalal?›

Laj Jese kixye re: ‹Wank jun chik li walal toj saaj, ab'an yook chaq rilb'aleb' li karneer›. Naq laj Samuel kiril laj David, kixk'e reetal naq ch'ina'us na'ilok. Toja' naq li Jehob'a kixye re laj Samuel: ‹A'in xinsik' ru. K'e li aseeyt sa' xjolom›. Laj Samuel kixb'aanu li kixye li Jehob'a. Moqon chik, laj David kikanaak cho'q awab'ej sa' li tenamit Israel.

1 Samuel 17:34, 35; 16:1-13.



Ebʼ li patzʼom

  • Ani xk’ab’a’ li ch’ina’al li wank sa’ li eetalil? Chanru naqanaw naq kaw rib’ li ch’ina’al?
  • B’ar li xtenamit laj David? Ani xk’ab’a’ li xyuwa’ ut li xyuwa’chin laj David?
  • K’a’ut li Jehob’a kixtaqla laj Samuel sa’ rochoch laj Jese?
  • K’aru kixye laj Samuel naq laj Jese kixk’am li wuqub’ chi ralal chiru?
  • K’aru kixye li Jehob’a re laj Samuel naq ke’xk’am laj David chiru?

Chaasume ajwiʼ ebʼ li patzʼom aʼin

  • Chaawil li naxye 1 Samuel 17:34, 35.

    Naq laj David kixkamsiheb’ li xul, chanru kixk’utb’esi naq maak’a’ xxiw ut k’ojk’o xch’ool rik’in li Jehob’a? (1 Sam. 17:37.)

  • Chaawil li naxye 1 Samuel 16:1-14.

    Chanru nokooxtenq’a li kixye li Jehob’a sa’ 1 Samuel 16:7 re naq juntaq’eet tqil chixjunileb’? (Hech. 10:34, 35; 1 Tim. 2:4.)

    Naq li Jehob’a kirisi li xsantil musiq’ej sa’ xb’een laj Saul, chanru naxk’utb’esi a’in naq li maa’us aj musiq’ej naru t-eechaninq qe naq maak’a’ chik xsantil musiq’ej li Yos qik’in? (1 Sam. 16:14; Mat. 12:43-45; Gál. 5:16.)