LAJ Sanson jwal kaw xmetz'ew chiru yalaq ani ut kiwank cho'q aj raqol aatin. Ma nakaanaw ani kik'ehok re xmetz'ew? A'an li Jehob'a. Maaji' ajwi' nayo'laak laj Sanson naq li Jehob'a kixye re li xna': ‹Chi seeb' twanq jun aak'uula'al. A'an tk'amoq b'e ut tixkoleb' laj Israel sa' ruq'eb' laj Filisteo›.

Laj Sanson yook chi yalok rikʼin jun li kaqkoj

Eb' laj Filisteo maa'useb' xna'leb' ut neke'xrahob'tesi eb' laj Israel. Sa' jun kutan naq laj Sanson yook chi xik Canaan b'arwi' wankeb' chaq laj Filisteo kixtaw jun nimla kaqkoj. Laj Sanson kixkamsi li kaqkoj rik'in ruq' ut kixkamsi naab'aleb' aj Filisteo.

Chirix chik a'an laj Sanson xko xch'ool chirix jun li ixq, xDalila xk'ab'a'. Eb' li ke'jolomink reheb' laj Filisteo ke'raj xnawb'al b'ar nachalk xmetz'ew laj Sanson. Jo'kan naq ke'xye re xDalila naq te'xk'e re 1.100 ru li plaat chixjunqaleb' wi' tixye reheb' k'a'ut naq wank xmetz'ew laj Sanson. Li xDalila kisaho'k xch'ool naq kirab'i xk'ihal li tumin. Jo'kan naq moko kixkanab' ta xpatz'b'al re laj Sanson b'ar nachalk xmetz'ew. Li xDalila moko tz'aqal ramiiw ta laj Sanson, chi moko wank ta cho'q ramiiw li xtenamit li Yos.

Li xDalila ut laj Sanson

Li xDalila kixnaw b'ar nachalk xmetz'ew laj Sanson xb'aan naq laj Sanson kixye re: ‹Maajunwa ke'xb'es li wismal. Naq xinyo'laak li Yos kixsik' wu re naq tink'anjelaq chiru cho'q aj Nazareo. Jo'kan naq wi te'xb'es li wismal tsachq linmetz'ew›.

Naq xDalila kirab'i a'in, kixwartesi laj Sanson chiru li ra' ut kiroksi jun li winq sa' rochoch re naq tixb'es li rismal. Naq ki'ajk ru laj Sanson maak'a' chik xmetz'ew. Toja' naq eb' laj Filisteo ke'xchap laj Sanson, ke'risi sa' li ru ut ke'xk'e cho'q xmooseb'.

Laj Sanson yook xtʼanbʼal roqechal li ochoch

Eb' laj Filisteo ke'xb'aanu jun li ninq'e re xloq'oninkil li xyoseb' Dagon. Toja' naq ke'risi chaq laj Sanson sa' tz'alam ut ke'ok xse'enkil. Ab'an laj Sanson ak xchamo'k wi' chik li rismal. Laj Sanson kixye re li ch'ina'al li yook chi k'amok re: ‹K'ehin chi xch'eeb'al roqechal li ochoch›. Chirix chik a'an laj Sanson kixpatz' xmetz'ew re li Jehob'a. Toja' naq kixchap roqechal li ochoch. Kixjap re ut kixye: ‹Kanab'in chi kamk rik'ineb' laj Filisteo!› Sa' li ninq'e wankeb' 3.000 aj Filisteo. Naq laj Sanson kixk'e xmetz'ew, kit'ane'k li ochoch ut chixjunileb' ke'kamk.

Jueces 13-16.



Ebʼ li patzʼom

  • Ani xk’ab’a’ li winq jwal kaw xmetz’ew? Ani kik’ehok re xmetz’ew li winq a’in?
  • K’aru kixb’aanu laj Sanson naq kixtaw jun li kaqkoj?
  • K’aru yook xyeeb’al laj Sanson re xDalila ut k’a’ut naq xmaak a’in kichape’k xb’aaneb’ laj Filisteo?
  • Sa’ li kutan naq kikamk laj Sanson, k’aru kixb’aanu re xkamsinkileb’ 3.000 aj Filisteo?

Chaasume ajwiʼ ebʼ li patzʼom aʼin

  • Chaawil li naxye Jueces 13:1-14.

    K’a’ut naq laj Manoah ut li rixaqil chaab’ileb’ eetalil cho’q reheb’ li na’b’ej yuwa’b’ej? (Jue. 13:8; Sal. 127:3; Efe. 6:4.)

  • Chaawil li naxye Jueces 14:5-9; ut 15:9-16.

    K’aru naxk’utb’esi li xsantil musiq’ej li Yos naq laj Sanson kixkamsi jun li kaqkoj, naq kixt’up jun li ak’ k’aam rik’in li kib’ak’e’k wi’ ut naq kixkamsiheb’ 1.000 chi winq rik’in xkalam e jun li b’uur?

    Chanru nokooxtenq’a anaqwan li santil musiq’ej? (Jue. 14:6; 15:14; Zac. 4:6; Hech. 4:31.)

  • Chaawil li naxye Jueces 16:18-31.

    K’aru kixk’ul laj Sanson naq kiwank cho’q ramiiweb’ li ink’a’ neke’xpaab’ li Jehob’a? K’aru naqatzol chirix a’in? (Jue. 16:18, 19; 1 Cor. 15:33.)