Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 5: Li Nima' Jordan

Tzolom 5: Li Nima' Jordan

K'ARU yookeb' xb'aanunkil eb' laj Israel? Yookeb' chi nume'k sa' xyi li nima' Jordan. Ab'an b'ar xko li ha'? Sa'eb' li kutan a'an, naxk'e naab'al li hab' ut sa' junpaat nab'ut'unk li nima'. Ab'an, anaqwan maak'a' chik li ha'! Eb' laj Israel yookeb' chi nume'k sa' xyi, jo' ke'xb'aanu chaq sa' li Kaqi Palaw. Qilaq b'ar xko chixjunil li ha'.

Ebʼ laj Israel yookeb' chi nume'k sa' xyi li nima' Jordan

Naq xwulak xkutankil naq eb' laj Israel te'nume'q sa' li nima', li Jehob'a kixye re laj Josue naq tixye reheb' laj Israel: ‹Eb' laj tij te'k'amoq re xkaaxil li sumwank ut te'k'amoq b'e chiqu. Ut naq te'xk'e li roq sa' li nima' li ha' tchaqiq›.

Jo'kan naq eb' laj tij ke'xk'am xkaaxil li sumwank ut ke'k'amok b'e chiruheb' laj Israel. Li nima' kaw roq ut cham xsa'. Naq eb' laj tij ke'wulak sa' li nima' ink'a' ke'xuwak naq ke'xch'ik rib' sa' ha'. Ut naq ke'xk'e li roq sa' li ha', ki'ok chi chaqik li nima'! Li Jehob'a kixtz'ap xb'e li ha', a'an jun chik li sachb'ach'oolej.

Eb' laj tij ke'xk'am xkaaxil li sumwank ut ke'kanaak sa' xyi li nima'. Chirix chik a'an, ke'ok chi nume'k eb' laj Israel jo' nak'utunk sa' li eetalil.

Naq ke'nume'k chixjunileb' laj Israel, li Jehob'a kixye re laj Josue naq tixsik' 12 chi winq kaweb' rib' ut tixye reheb': ‹Ayuqex sa' li nima' b'arwi' wankeb' laj tij rik'in xkaaxil li sumwank. Aran teerisi 12 chi pek ut teek'e b'arwi' teenumsi li q'oqyink. Wi wulaj kab'ej leeralal leek'ajol te'xpatz' eere, k'aru xyaalal eb' li 12 chi pek a'in? Teeye reheb' naq li nima' Jordan kichaqik naq ke'xnumsi xkaaxil li sumwank sa' xyi li nima'. Eb' li pek tixjultika eere li sachb'ach'oolej a'in›. Laj Josue kixk'e ajwi' 12 chi pek b'arwi' ke'xaqli laj tij sa' li nima'.

Laj Josue

Chirix chik a'an laj Josue kixye reheb' laj tij: ‹Elenqex sa' li nima' Jordan!› Naq eb' laj tij ke'elk chisa', li nima' ki'ok wi' chik chi b'ut'unk.

Josué 3:1-17; 4:1-18.



Ebʼ li patzʼom

  • K’aru kixb’aanu li Jehob’a re naq eb’ laj Israel te’ruuq chi nume’k sa’ li nima’ Jordan?
  • Re naq eb’ laj Israel te’nume’q sa’ li nima’, k’aru ke’xb’aanu re xk’utb’esinkil naq kaweb’ li xpaab’al?
  • K’a’ut kixye li Jehob’a re laj Josue naq tixxok 12 chi pek sa’ li nima’?
  • K’aru kik’ulmank naq eb’ laj tij ke’elk chaq sa’ li nima’?

Chaasume ajwiʼ ebʼ li patzʼom aʼin

  • Chaawil li naxye Josué 3:1-17.

    Jo’ xqil sa’ li tzolom a’in, k’aru tento tqab’aanu re naq li Jehob’a tooxtenq’a ut toorosob’tesi? (Jos. 3:13, 15; Pro. 3:5; Sant. 2:22, 26.)

    K’aru kixk’ul li nima’ naq eb’ laj Israel ke’nume’k chisa’? Ut chanru kixnima a’in li xk’ab’a’ li Jehob’a? (Jos. 3:15; 4:18; Sal. 66:5-7.)

  • Chaawil li naxye Josué 4:1-18.

    K’aru xyaalal eb’ li 12 chi pek li ke’risi chaq sa’ li nima’ ut ke’xk’e sa’ li na’aj Guilgal? (Jos. 4:4-7.)