K'ARU yook xb'aanunkil laj Josue? Laj Josue yook xyeeb'al: ‹Saq'e, kanaqat aran!› Jo'kan naq li Saq'e kikanaak sa' xyi li choxa chiru jun kutan. Li Jehob'a kib'aanunk re a'in. Qilaq k'a'ut naq laj Josue kiraj naq li Saq'e ink'a' t-oq.

Li saqʼe

Naq eb' li oob' chi awab'ej re Canaan ke'ok chi yalok rik'ineb' laj Gabaon, eb' laj Gabaon ke'xtaqla jun li winq chi xsik'b'al laj Josue re naq te'tenq'aaq. Li winq kixye re laj Josue: ‹Chalqat sa' junpaat ut choo'aakol! Chixjunileb' li awab'ej li wankeb' sa' li qasutam ke'chalk chi yalok rik'ineb' laamoos›.

Laj Josue ut eb' laj puub' koheb' sa' junpaat chi xkolb'aleb' laj Gabaon ut ke'b'eek chiru jun q'oqyink. Naq ke'wulak rik'ineb' laj Gabaon, eb' laj puub' re li oob' chi awab'ej k'ajo' naq ke'xuwak ut ke'elelik. Jo'kan naq li Jehob'a kixkut sa' xb'eeneb' li nimla saqb'ach ut naab'aleb' laj puub' re Canaan ke'kamk. Jo'kan naq moko k'iheb' ta chik ke'xkamsi eb' laj puub' li ke'chalk chirix laj Josue.

Laj Josue

Naq laj Josue kiril naq li Saq'e yook chi ok, ki'ok xk'a'uxl xb'aan naq eb' laj puub' re Canaan te'eleliq naq tq'oqyino'q. Jo'kan naq laj Josue kitijok chiru li Jehob'a ut kixye: ‹Saq'e kanaqat aran!› Naq li Saq'e kikanaak sa' xna'aj eb' laj Israel ke'elk chi ub'ej sa' li yalok.

Ab'an toj naab'aleb' li awab'ej re Canaan xik' neke'ril xtenamit li Yos. Chiru waqib' chihab' kiru laj Josue ut eb' laj puub' xsachb'aleb' li 31 chi awab'ej. Chirix chik a'an, laj Josue kixjek'i li tenamit Canaan sa' xyanqeb' li xteep laj Israel li maak'a'eb' xna'aj.

Laj Josue kikamk naq wank 110 chihab' re. Naq toj yo'yo laj Josue ut eb' li ramiiw, li tenamit ki'ab'ink chiru li Jehob'a. Ab'an, naq laj Josue ut eb' li ramiiw ke'kamk, eb' laj Israel ke'ok xb'aanunkil li maa'usilal ut ke'xk'e rib' sa' ch'a'ajkilal. Anaqwan aajel ru naq li Yos ttenq'anq reheb'.

Josué 10:6-15; 12:7-24; 14:1-5; Jueces 2:8-13.



Ebʼ li patzʼom

  • K’aru yook xyeeb’al laj Josue re li Saq’e? Ut k’a’ut kixye a’in?
  • 2. Naq laj Josue ut eb’ laj puub’ koheb’ chi yalok, chanru ke’tenq’aak xb’aan li Jehob’a?
  • 3. Jarub’eb’ li awab’ej kixq’axeb’ ru laj Josue? Ut chiru jarub’ chihab’ kiru xb’aanunkil a’in?
  • 4. K’a’ut naq laj Josue kixjek’i li ch’och’ re Canaan?
  • 5. Jarub’ chihab’ wank re laj Josue naq kikamk? Chanru xyu’ameb’ laj Israel naq ak kamenaq chik laj Josue?

Chaasume ajwiʼ ebʼ li patzʼom aʼin

  • Chaawil li naxye Josué 10:6-15.

    Chanru naxk’ojob’ qach’ool xnawb’al naq li Jehob’a kixxaqab’ li Saq’e ut li Po sa’ xk’ab’a’eb’ laj Israel? (Jos. 10:8, 10, 12, 13; Sal. 18:3; Pro. 18:10.)

  • Chaawil li naxye Josué 12:7-24.

    Ani tz’aqal kisachok reheb’ li 31 chi awabej re Canaan? K’a’ut wank xwankil a’in cho’q qe? (Jos. 12:7; 24:11-13; Deu. 31:8; Luc. 21:9, 25-28.)

  • Chaawil li naxye Josué 14:1-5.

    Chanru kijek’imank li ch’och’ re Canaan sa’ xyanqeb’ laj Israel? K’aru naxk’ut chiqu a’in chirix li ch’och’ li tqak’ul sa’ li Sahilal Na’ajej? (Jos. 14:2; Isa. 65:21; Eze. 47:21-23; 1 Cor. 14:33.)

  • Chaawil li naxye Jueces 2:8-13.

    Jo’ kixb’aanu laj Josue, sa’eb’ li qakutan aniheb’ ink’a’ neke’xkanab’ naq te’xb’alaq’i li xtenamit li Yos? (Jue. 2:8, 10, 11; Mat. 24:45-47; 2 Tes. 2:3-6; Tito 1:7-9; Apoc. 1:1; 2:1, 2.)