LI XNUB'AAL li tenamit Jerico yook chi t'ane'k. Chanchan hiik yook chi b'aanunk re! A'in jun chik li sachb'ach'oolej kixb'aanu li Jehob'a. Qilaq chanru kixb'aanu.

Li xnubʼaal li tenamit Jerico yook chi t'ane'k

Li Jehob'a kixye re laj Josue: ‹Laa'at ut eb' laj puub' li wankeb' aawik'in teesuti chixjunil li tenamit. Jun sut ajwi' chiru li kutan teesuti li tenamit Jerico ut teeb'aanu chiru waqib' kutan. Teek'am xkaaxil li sumwank ut wuqub' aj tij te'xik chiru li kaax a'in ut yooqeb' xyaab'asinkil eb' li pur›.

Kixye ajwi': ‹Sa' xwuq li kutan, wuqub' sut teesuti li tenamit. Moko teekanab' ta xyaab'asinkil li pur ut teejap eere chi kaw. Toja' naq xnub'aal li tenamit tt'ane'q!›

Laj Josue ut eb' laj Israel ke'xb'aanu li kixye li Jehob'a. Naq yookeb' xsutinkil li tenamit maa'ani ki'eek'ank. Ka'ajwi' xyaab' li pur ut roqeb' na'eek'ank. Eb' laj Jerico yookeb' tana xiw. Ma nakaawil jun li kaqi k'aam sa' li b'entaan? A'an xb'entaan li rochoch li xRahab. Li xRahab kixb'aanu li ke'xye li wiib' aj Israel. Li xRahab ut li junkab'al wankeb' sa' li ochoch ut yookeb' rilb'al li yook chi k'ulmank.

Laj Josue

Sa' xwuq li kutan, naq ke'raqe'k xsutinkil wuqub' sut li tenamit ke'xch'e' li pur, ke'xjap reheb' laj puub'. Toja' naq li xnub'aal li tenamit Jerico kit'ane'k. Chirix chik a'an laj Josue kixye: ‹Kamsimaq eb' laj Jerico ut teek'at chixjunil li wank sa' li tenamit. Ab'an ink'a' teek'at li plaat, li oor, li kaqi ch'iich' ut chixjunil li ch'iich' li teetaw. A'in tk'anjelaq sa' Rochoch li Jehob'a›.

Laj Josue kixye reheb' li wiib' aj Israel li ke'wulak chi rilb'al li tenamit Jerico: ‹Isimaq chaq li xRahab ut li xjunkab'al›. Jo'kan naq li xRahab ut li xjunkab'al ke'kole'k.

Josué 6:1-25.



Ebʼ li patzʼom

  • K’aru kixye li Jehob’a naq te’xb’aanu chiru waqib’ kutan eb’ laj puub’ ut eb’ laj tij?
  • K’aru tento te’xb’aanu sa’ li xwuq kutan?
  • K’aru yook xk’ulb’al li xnub’aal li tenamit Jerico? (Chaawil li eetalil.)
  • K’a’ut naq wank jun li kaqi k’aam chiru xb’entaan li xRahab?
  • K’aru kixye laj Josue naq te’xb’aanu laj puub’ reheb’ laj Jerico ut re li tenamit? Ab’an, k’aru te’xb’aanu rik’in li plaat, li oor, li kaqi ch’iich’ ut chixjunil li ch’iich’ li te’xtaw?
  • K’aru kixye laj Josue naq te’xb’aanu li wiib’ aj Israel rik’in li xRahab?

Chaasume ajwiʼ ebʼ li patzʼom aʼin

  • Chaawil li naxye Josué 6:1-25.

    Rik’in li ke’xb’aanu laj Israel sa’ xwuq li kutan, chanru naxjuntaq’eeta rib’ a’in rik’ineb’ laj Testiiw re li Jehob’a naq neke’xpuktesi li chaab’il esilal sa’eb’ li qakutan? (Jos. 6:15, 16; Isa. 60:22; Mat. 24:14; 1 Cor. 9:16.)

    Naq ke’nume’k tana 500 chihab’, chanru kitz’aqlok ru Josué 6:26? K’aru naxk’ut a’in chirix li Santil Hu? (1 Rey. 16:34; Isa. 55:11.)