EB' LI winq a'in wankeb' sa' ch'a'ajkilal, tento naq te'eleliq re naq ink'a' te'kamsiiq. Eb' li winq a'in, eb' aj Israel. Li ixq li yook chi tenq'ank reheb' a'an li xRahab. Li rochoch li xRahab wank chire xnub'aal li tenamit Jerico. Qilaq chanru kik'ulmank a'in.

Ak' okeb' re laj Israel sa' li tenamit Canaan naq laj Josue kixtaqla wiib' li winq ut kixye reheb': ‹Cheeril chaq li ch'och' ut li tenamit Jerico›.

Li xRahabʼ ut li wiibʼ chi winq aj Israel li keʼilok chaq re li tenamit

Naq eb' li wiib' aj Israel ke'wulak sa' li tenamit Jerico, ke'ok sa' rochoch li xRahab. Jun reheb' li poyanam kixye re li awab'ej re Jerico: ‹Chi q'eq ke'ok chaq wiib' laj Israel chi rilb'al li tenamit›. Jo'kan naq li awab'ej kixtaqlaheb' winq sa' rochoch li xRahab. Ut ke'xye re li xRahab: ‹Isiheb' chaq laj Israel sa' laawochoch!› Li xRahab kixmuqeb' li wiib' aj Israel sa' xb'een li rochoch ut kixye: ‹Yal naq ke'k'ulunk wiib' chi winq sa' wochoch, ab'an ink'a' ninnaw aj b'areb'. Xkoheb' naq ak okeb' re xtz'apb'al li rokeb'aal li tenamit. Wi texxik sa' junpaat chirixeb', teetaweb' chaq!› Jo'kan naq eb' li winq koheb' sa' aanil.

Naq xkoheb' li winq, li xRahab kixye reheb' laj Israel: ‹Laa'in ninnaw naq li Jehob'a tixk'e eere li tenamit a'in. Xqab'i resil naq li Jehob'a kixchaqihob'resi li Kaqi Palaw naq kex'elk chaq Egipto. Ut naq xeekamsi eb' li awab'ej re Sehon ut Og›. Li xRahab kixye ajwi': ‹Laa'in xexintenq'a. Jo'kan naq cheeb'aanu usilal, cheekolaq linna' linyuwa', eb' li was ut eb' li wiitz'in!›

Eb' laj Israel ke'xk'ulub'a li kixye li xRahab, ab'an kiyehe'k re: ‹Taab'ak' jun li kaqi k'aam chiru laab'entaan ut taach'utub' laajunkab'al sa' laawochoch. Naq toochalq xsachb'al li tenamit Jerico ut tqil li k'aam a'in, maa'ani tixkamsi laajunkab'al›. Naq eb' li wiib' chi winq ke'wulak rik'in laj Josue ke'xye re chixjunil li ke'xk'ul chaq sa' li tenamit Jerico.

Josué 2:1-24; Hebreos 11:31.



Ebʼ li patzʼom

  • B’ar wank rochoch li xRahab?
  • Aniheb’ li winq wankeb’ sa’ li eetalil? K’a’ut wankeb’ chaq sa’ li tenamit Jerico?
  • K’aru kixtaqla xyeeb’al li awab’ej re li xRahab? Chanru kichaq’ok li xRahab?
  • Chanru kixtenq’aheb’ li wiib’ chi winq li xRahab? K’aru usilal kixpatz’ li xRahab reheb’ li wiib’ chi winq?
  • K’aru ke’xye eb’ li winq naq li xRahab kixpatz’ usilal reheb’?

Chaasume ajwiʼ ebʼ li patzʼom aʼin

  • Chaawil li naxye Josué 2:1-24.

    Chanru kitz’aqlok ru li kixye li Jehob’a sa’ Éxodo 23:28 naq eb’ laj Israel ke’wulak chi yalok rik’ineb’ laj Jerico? (Jos. 2:9-11.)

  • Chaawil li naxye Hebreos 11:31.

    Chanru kixk’utb’esi li xRahab naq tento kawaq li qapaab’al? (Rom. 1:17; Heb. 10:39; Sant. 2:25.)