Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 43: Laj Josue aj K'amol B'e

Tzolom 43: Laj Josue aj K'amol B'e

LAJ Moises kiraj ok sa' li tenamit Canaan rochb'eeneb' laj Israel. Jo'kan naq kixye re li Jehob'a: ‹Kanab'in chi nume'k sa' junpaak'al li nima' Jordan re naq twil li chaab'il ch'och'›. Li Jehob'a kixye re laj Moises: ‹Kanab' xyeeb'al a'an!› Ma nakaanaw k'a'ut kixye a'in li Jehob'a?

Xb'aan naq laj Moises ut laj Aaron ink'a' ke'xk'e xloq'al li Jehob'a naq ki'elk chaq li ha' sa' li pek. Jo'kan naq li Jehob'a kixye naq ink'a' te'oq sa' li tenamit Canaan.

Wuqub' po xkamik laj Aaron naq li Jehob'a kixye re laj Moises: ‹K'am laj Josue ut k'e chiru laj Eleazar, laj tij, ut chiru li tenamit. Chiru li tenamit taaye naq laj Josue tjolominq reheb'›. Sa' li eetalil nak'utunk naq laj Moises yook xb'aanunkil jo' kiyehe'k re xb'aan li Jehob'a.

Laj Moises yook xkʼeebʼal chi naweʼk naq laj Josue chik tkʼamoq bʼe

Toja' naq li Jehob'a kixye re laj Josue: ‹Kawaq aach'ool ut matxuwak. Laa'at tatk'amoq reheb' laj Israel sa' li tenamit Canaan li xinyeechi'i reheb'. Laa'in wanqin aawik'in!›

Chirix chik a'an, li Jehob'a kixye re laj Moises naq taaxik sa' li tzuul Nebo re li na'ajej Moab. Sa' li tzuul a'in, laj Moises kiril chixjunil rusilal li tenamit Canaan. Li Jehob'a kixye re laj Moises: ‹A'in li ch'och' xinyeechi'i reheb' li ralal xk'ajol laj Abrahan, laj Isaac ut laj Jacob. Xatinkanab' chi rilb'al, ab'an ink'a' tat-oq aran›.

Laj Moises kikamk sa' li tzuul Nebo naq wank 120 chihab' re. Toj kaw rib' ut saqenk na'ilok. Naq kikamk laj Moises k'ajo' naq ke'raho'k sa' xch'ool eb' laj Israel ut ke'yaab'ak chirix! Anaqwan laj Josue tjolominq reheb', jo'kan naq saheb' wi' chik sa' xch'ool.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.



Ebʼ li patzʼom

  • Aniheb’ li wiib’ chi winq wankeb’ rik’in laj Moises sa’ li eetalil?
  • K’aru kixye li Jehob’a re laj Josue?
  • K’a’ut naq xko laj Moises sa’ li tzuul Nebo ut k’aru kiyehe’k re xb’aan li Jehob’a?
  • Jarub’ chihab’ wank re laj Moises naq kikamk?
  • K’a’ut ke’raho’k sa’ xch’ool eb’ laj Israel ut k’aru kisahob’resink re xch’ooleb’?

Chaasume ajwiʼ ebʼ li patzʼom aʼin

  • Chaawil li naxye Números 27:12-23.

    K’aru xnimal ru k’anjel kixk’e li Jehob’a re laj Josue? Sa’eb’ li qakutan, chanru naxk’ut li Jehob’a naq naxra li xtenamit? (Núm. 27:15-19; Hech. 20:28; Heb. 13:7.)

  • Chaawil li naxye Deuteronomio 3:23-29.

    K’a’ut naq li Jehob’a ink’a’ kixkanab’ chi ok laj Moises ut laj Aaron sa’ li tenamit Canaan? K’aru naqatzol chirix li ke’xk’ul laj Moises ut laj Aaron? (Deu. 3:25-27; Núm. 20:12, 13.)

  • Chaawil li naxye Deuteronomio 31:1-8, 14-23.

    Naq laj Moises kixchaq’rab’iheb’ laj Israel, chanru kixk’utb’esi naq kixk’ulub’a li xq’usb’al chiru li Jehob’a? (Deu. 31:6-8, 23.)

  • Chaawil li naxye Deuteronomio 32:45-52.

    Chanru nokooxtenq’a li Raatin li Yos sa’ li qayu’am? (Deu. 32:47; Lev. 18:5; Heb. 4:12.)

  • Chaawil li naxye Deuteronomio 34:1-12.

    Usta laj Moises maajunwa kiril ru li Jehob’a, k’aru naxch’olob’ Deuteronomio 34:10 chirixeb’? (Éxo. 33:11, 20; Núm. 12:8.)