Ebʼ li winq li xkohebʼ rilbʼal li tenamit yookeb' xpaqonkil ru li cheʼ

CHAAWIL ruheb' li awimq. K'ajo' xnimal xchiijilal li uub'! Jo'kan naq eb' li winq yookeb' xpaqonkil li uub' rik'in jun li che'. Chaawil ajwi' eb' li iig ut eb' li kranadiiy. B'ar ke'xk'am chaq ru li awimq a'in? K'exk'am chaq sa' li tenamit Canaan. Ma jultik aawe naq Canaan ke'wank chaq laj Abrahan, laj Isaac ut laj Jacob. Ab'an naq kiwank li we'ej, laj Jacob ut li xjunkab'al koheb' Egipto. Eb' laj Israel toj wankeb' sa' li chaqich'och' sa' li na'ajej Qades. Kinume'k 216 chihab' naq laj Moises ut eb' laj Israel ke'sutq'iik sa' li tenamit Canaan.

Eb' li wankeb' Canaan maa'useb' xna'leb'. Jo'kan naq laj Moises kixtaqla 12 chi winq ut kixye reheb': ‹Cheerilaq chaq jarub'eb' wankeb' Canaan ut ma kaweb' rib'. Teeril ma us li ch'och' re awk ut teek'am chaq junjunq ru li awinq›.

Naq ke'sutq'iik chaq eb' li winq, ke'xye re laj Moises: ‹Chaab'il li ch'och' wank Canaan›. Jo'kan naq ke'xk'am chaq ru li awimq re naq te'paab'aaq reheb'. Ab'an 10 reheb' li winq a'in ke'xye: ‹Li wankeb' Canaan jwal nimeb' ut kaweb' rib'. Wi tqamaq' li tenamit chiruheb', too'exkamsi›.

Eb' laj Israel ke'xxuwak naq ke'rab'i a'in ut ke'xye: ‹Us raj xookam Egipto malaj sa' li chaqich'och' a'in! Anaqwan tookamq sa' li yalok. Eb' li qixaqil ut eb' li qakok'al te'k'ame'q cho'q moos Canaan. Jo'kan naq qasik'aq reqaj laj Moises ut sutq'iiqo Egipto!›

Ab'an wiib' reheb' li winq a'in, laj Josue ut laj Caleb, k'ojk'ookeb' xch'ool rik'in li Jehob'a. Jo'kan naq ke'xyal xwaklesinkil xch'ool li tenamit ut ke'xye: ‹Mexxuwak, li Jehob'a wank qik'in. Moko ch'a'aj ta reechaninkil li tenamit!› Ab'an li tenamit ink'a' kiraj rab'inkil a'in ut ke'raj xkamsinkil laj Josue ut laj Caleb.

Jo'kan naq kichalk xjosq'il li Jehob'a ut kixye re laj Moises: ‹Maajun reheb' li wank junmay chihab' re malaj naxq'ax junmay t-ok sa' li tenamit Canaan. Usta ke'ril li sachb'ach'oolej kinb'aanu Egipto ut sa' li chaqich'och', toj maaji' neke'xk'ojob' xch'ool chiwu. Jo'kan naq te'xb'eeni rib' sa' li chaqich'och' chiru 40 chihab' toj reetal te'kamq. Ka'ajwi' laj Josue ut laj Caleb te'oq Canaan›.

Números 13:1-33; 14:1-38.



Ebʼ li patzʼom

  • K’aru nakaak’oxla naq nakaawil li uub’ li wank sa’ li eetalil? B’ar ke’xk’am chaq ru li awimq a’in?
  • K’a’ut naq laj Moises kixtaqla 12 chi winq sa’ li tenamit Canaan?
  • K’aru ke’xye re laj Moises eb’ li 10 chi winq naq ke’sutq’iik chaq chi rilb’al li tenamit Canaan?
  • Chanru ke’xk’utb’esi wiib’ chi winq naq k’ojk’ookeb’ xch’ool rik’in li Jehob’a ut chanru xk’ab’a’eb’ li winq a’in?
  • K’a’ut kichalk xjosq’il li Jehob’a ut k’aru kixye re laj Moises?

Chaasume ajwiʼ ebʼ li patzʼom aʼin

  • Chaawil li naxye Números 13:1-33.

    Aniheb’ ke’sik’e’k ru re naq te’ril chaq li tenamit Canaan? K’aru rusilal li tenamit ke’ril chaq? (Núm. 13:2, 3, 18-20.)

    K’a’ut naq laj Josue ut laj Caleb jalan xk’a’uxeb’ chiruheb’ li lajeeb’ li ke’ilok chaq re li tenamit? K’aru naqatzol chirix a’in? (Núm. 13:28-30; Mat. 17:20; 2 Cor. 5:7.)

  • Chaawil li naxye Números 14:1-38.

    K’aru naxye li Santil Hu chirix xweech’inkileb’ malaj aatinak chirixeb’ laj k’amol b’e sa’ li xtenamit li Jehob’a? (Núm. 14:2, 3, 27; Mat. 25:40, 45; 1 Cor. 10:10.)

    Chanru naxk’ut Números 14:24 naq li Jehob’a naxk’e xch’ool chirixeb’ li junjunq li neke’k’anjelak chiru? (1 Rey. 19:18; Pro. 15:3.)