Rilb'al li na'leb'

Rilb'al li xtusulal naʼlebʼ

Tzolom 37: Li Rochoch li Jehob’a

Tzolom 37: Li Rochoch li Jehob’a

MA NAKAANAW k'aru wank sa' li eetalil? A'an Rochoch li Jehob'a, b'arwi' ke'xloq'oni ru. Naq eb' laj Israel ke'elk chaq Egipto ke'ok xyiib'ankil li ochoch a'in ut ke'xb'aanu chiru jun chihab'. Ma nakaanaw ani kiraj naq te'xyiib' li ochoch?

Li Rochoch li Jehobʼa

Li Jehob'a kitaqlank re xyiib'ankil li ochoch a'in. Naq laj Moises wank chaq sa' li tzuul Sinai, li Jehob'a kixye re chanru te'xyiib' li ochoch re naq eb' laj Israel te'ruuq xk'amb'al chirixeb'. Naq eb' laj Israel neke'xjal xna'aj moko ch'a'aj ta chiruheb' naq neke'xyiib' wi' chik li Rochoch li Yos.

Sa' li ochoch a'in, wank xna'aj jun li kaax. A'an xkaaxil li sumwank. Sa' xb'een li kaax wank wiib' li anjel yiib'anb'ileb' rik'in oor. Chisa' li kaax a'in, wank li lajeeb' chi chaq'rab' li kixtz'iib'a wi' chik li Yos, xb'aan naq laj Moises kixjor li wiib' chi perpookil pek li kik'ehe'k re xb'eenwa. Chisa' li kaax kixokmank ajwi' jun xaar li mana. Ma jultik aawe k'aru li mana?

Li Jehob'a kixsik' ru laj Aaron, li ras laj Moises, re naq twanq cho'q xyuwa'il aj tij. A'an kik'amok b'e chiruheb' laj Israel re xloq'oninkil li Jehob'a. Eb' li ralal laj Aaron yookeb' ajwi' chi k'anjelak cho'q aj tij.

Sa' li Rochoch li Yos wank jun li nimla na'aj. Ma nakaawil naq aran ajwi' wank jun li kaax? Sa' li kaax a'in eb' laj tij neke'xk'at li sununkil pom. Wank jun xna'aj kandeel wuqub' xxamlel. Jo'kan ajwi' wank jun li meex ut sa' xb'een wank 12 chi kaxlan wa.

Sa' xmuheb'aal li Rochoch li Yos wank jun nimla na'aj ha'. Aran neke'xch'aj rib' laj tij. Wank ajwi' jun nimla na'aj re xmayejankil li xul. Eb' laj tij neke'mayejak chiru li Jehob'a. Eb' laj Israel ke'xyiib' rochocheb' chire li na'aj a'in. Jo'kan naq li Rochoch li Yos kikanaak sa' xyiheb'.

Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.



Ebʼ li patzʼom

  • K’aru wank sa’ li eetalil ut cho’q re k’aru na’oksimank?
  • K’a’ut kixye li Jehob’a naq moko ch’a’aj ta te’xyiib’ li ochoch?
  • K’aru xk’ab’a’ li kaax li wank wiib’ li anjel sa’ xb’een? Ut k’aru wank chisa’ li kaax?
  • Ani kixsik’ li Jehob’a cho’q xyuwa’il aj tij? K’aru li k’anjel kixb’aanu li xyuwa’il aj tij?
  • K’aru wank sa’ li nimla na’aj re li Rochoch li Yos?
  • K’aru wank sa’ xmuheb’aal li Rochoch li Yos ut k’aru aj e?

Chaasume ajwiʼ ebʼ li patzʼom aʼin

  • Chaawil li naxye Éxodo 25:8-40; 26:1-37; 27:1-8 ut 28:1.

    K’aru naraj xyeeb’al li wiib’ chi anjel li wankeb’ sa’ xb’een xkaaxil li sumwank? (Éxo. 25:20, 22; Núm. 7:89; 2 Rey. 19:15.)

  • Chaawil li naxye Éxodo 30:1-10, 17-21; 34:1, 2 ut Hebreos 9:1-5.

    K’a’ut kixye li Jehob’a naq te’xch’aj rib’eb’ laj tij naq te’k’anjelaq sa’ Rochoch li Yos? Ut k’aru naqatzol chirix a’in? (Éxo. 30:18-21; 40:30, 31; Heb. 10:22.)

    Chanru kixch’olob’ li apostol Pablo naq li Rochoch li Yos ut li chaq’rab’ li kik’ehe’k re laj Moises maak’a’ chik xwankil? (Heb. 9:1, 9; 10:1.)