Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 36: Li Pech'b'il Yos re Oor

Tzolom 36: Li Pech'b'il Yos re Oor

K'ARU yookeb' xb'aanunkil eb' laj Israel? Yookeb' chi tijok chiru jun li pech'b'il yos. K'ajo' xyiib'al ru li yookeb' xb'aanunkil! K'a'ut naq yookeb' xb'aanunkil a'in?

Naq laj Moises kib'ayk chaq sa' li tzuul, eb' laj Israel ke'ok xyeeb'al: ‹Ink'a' naqanaw k'aru xk'ul chaq laj Moises. Jo'kan naq qayiib'aq junaq qayos re naq toorisi sa' li na'aj a'in›.

Laj Moises yook xjorbʼal li wiibʼ chi perpookil pek

Laj Aaron, ras laj Moises, kixsume xb'aanunkil li pech'b'il yos ut kixye reheb': ‹K'amomaq chaq we leeka'xik ut leematq'ab' re oor›. Naq li tenamit kixb'aanu a'in, laj Aaron kiroksi li oor re xyiib'ankil jun li pech'b'il yos. Toja' naq ke'xye: ‹A'in li qayos li ki'isink chaq qe Egipto›. Chirix chik a'an ke'xb'aanu jun li ninq'e ut ke'xloq'oni li pech'b'il yos.

Li Jehob'a kichalk xjosq'il naq kiril a'in. Ut kixye re laj Moises: ‹Ayu ut seeb'a aawib', ileb' chaq laj Israel yookeb' xb'aanunkil li ink'a' us. Xe'xtz'eqtaana linchaq'rab' ut ke'xwiq'ib' rib' chiru jun li pech'b'il yos re oor›.

Yookeb' xloqʼoninkil jun li pech'b'il yos re oor

Jo'kan naq laj Moises kikub'eek chaq sa' junpaat. Ut naq kiril naq yookeb' chi xajok ut chi b'ichank chiru li pech'b'il yos, k'ajo' naq kichalk xjosq'il! Jo'kan naq kixkut chiru ch'och' li xchaq'rab' li Yos ut ke'jore'k. Chirix chik a'an, kixpuk'i li pech'b'il yos.

Nimla maak kixb'aanu li tenamit. Jo'kan naq laj Moises kixye re jun ch'uut chi winq: ‹Chapomaq leech'iich' ut teekamsi li ke'loq'onink re li pech'b'il yos›. Jo'kan naq 3.000 ke'kamk. A'in naxk'ut chiqu naq ka'ajwi' li Jehob'a tento tqaloq'oni ru.

Éxodo 32:1-35.



Ebʼ li patzʼom

  • K’aru yookeb’ xb’aanunkil sa’ li eetalil? Ut k’a’ut naq yookeb’ xb’aanunkil a’in?
  • K’a’ut naq kichalk xjosq’il li Jehob’a? K’aru kixb’aanu laj Moises naq kiril naq eb’ laj Israel yookeb’ xloq’oninkil li pech’b’il yos?
  • K’aru kixye laj Moises re jun ch’uut chi winq?
  • K’aru naxk’ut chiqu li tzolom a’in?

Chaasume ajwiʼ ebʼ li patzʼom aʼin

  • Chaawil li naxye Éxodo 32:1-35.

    K’aru naxk’oxla li Jehob’a chirix xjunajinkil li b’alaq’il paab’al rik’in li tz’aqal paab’al? (Éxo. 32:4-6, 10; 1 Cor. 10:7, 11.)

    K’aru tento te’xk’e reetal eb’ laj paab’anel naq yookeb’ rab’inkil li b’ich malaj yookeb’ chi xajok? (Éxo. 32:18, 19; Efe. 5:15, 16; 1 Juan 2:15-17.)

    Chanru ke’xkanab’ jun chaabil eetalil cho’q qe eb’ li ralal xk’ajol laj Levi chirix li tiikilal? (Éxo. 32:25-28; Sal. 18:26.)