MA NAKAANAW k'aru yookeb' xxokb'al eb' li qas qiitz'in? A'an tzakahemq. Li tzakahemq a'in chanchan poqs ut saq ru.

Ebʼ laj israel yookebʼ xxokbʼal li mana

Anaqwan eb' laj Israel wankeb' sa' li chaqich'och', ak xnume'k tana jun po naq ke'elk chaq Egipto. Sa' li chaqich'och' raasa na'elk li awimq. Jo'kan naq ke'ok xyeeb'al: ‹Us wanko chaq Egipto xb'aan naq aran wank naab'al li qatzakahemq›.

Jo'kan naq li Jehob'a kixye: ‹Tintaqla sa' xb'eeneb' li tzakahemq›. Naq kisaqewk eb' laj Israel ke'xye: ‹K'aru wank chiru li ch'och'?›

Laj Moises kixye: ‹A'in li tzakahemq kixtaqla chaq li Jehob'a cho'q eere›. MANA ke'xk'e cho'q xk'ab'a' li tzakahemq. Li xsahil li mana chanchan li wa rik'in xya'al kab'.

Laj Moises kixye reheb' laj Israel: ‹Ka'ajwi' teexok jo'nimal tixtzaka li junjunq›. Ut a'an ke'xb'aanu wulaj wulaj. Li mana li kikanaak chiru ch'och' kijaho'k xb'aan li Saq'e.

Laj Moises kixye ajwi' reheb': ‹Maa'ani tixk'uula li mana cho'q re xwulaj›. Ab'an, ma nakaanaw k'aru ke'xk'ul li ink'a' ke'ab'ink chiru? Naq kisaqewk, li mana li ke'xk'uula kimotzo'ink ut kichuho'k ru.

Ab'an li Jehob'a kixye reheb' naq ka'ajwi' sa' li xwaq kutan te'xxok ka'sut xk'ihal li mana. Xb'aan naq sa' xwuq li kutan li Jehob'a ink'a' kixtaqlaheb' xtzakahemq. Naq ke'xxok li mana cho'q re li jun chik kutan ink'a' kimotzo'ink, chi moko kichuho'k ta. A'in jun chik li sachb'ach'oolej kixk'ut li Jehob'a chiruheb'.

Eb' laj Israel ke'xtzaka li mana chiru chixjunil li chihab' naq ke'wank sa' li chaqich'och'.

Éxodo 16:1-36; Números 11:7-9; Josué 5:10-12.



Ebʼ li patzʼom

  • K’aru yookeb’ xokb’al chiru li ch’och’ eb’ li qas qiitz’in ut k’aru xk’ab’a’? (Chaawil li eetalil.)
  • Chanru tento xokb’al li mana naq kixye laj Moises?
  • K’aru kixye li Jehob’a naq te’xb’aanu chiru li xwaq kutan ut k’a’ut naq kixye a’in?
  • K’aru li sachb’ach’oolej kixb’aanu li Jehob’a naq ke’xxok li mana cho’q re li xwuq kutan?
  • Chiru jarub’ chihab’ ke’xtzaka li mana eb’ laj Israel?

Chaasume ajwiʼ ebʼ li patzʼom aʼin

  • Chaawil li naxye Éxodo 16:1-36 ut Números  11:7-9.

    Chanru naxk’ut Éxodo16:8 naq tento tqoxloq’i li neke’k’amok b’e sa’eb’ li ch’uut? (Heb. 13:17.)

    Naq eb’ laj Israel ke’wank sa’ li chaqich’och’, chanru kixk’ut li Jehob’a naq ka’ajwi’ a’an naru xtenq’ankileb’? (Éxo. 16:14-16, 35; Deu. 8:2, 3.)

    K’aru kixye li Jesus naq ki’aatinak chirix li mana ut chanru nokooxtenq’a? (Juan 6:31-35, 40.)

  • Chaawil li naxye Josué 5:10-12.

    Chiru jarub’ chihab’ ke’xwa’ li mana eb’ laj Israel? Chanru ke’yale’k rix rik’in li mana? Ut k’aru naqatzol chirix a’in? (Éxo. 16:35; Núm. 11:4-6; 1 Cor. 10:10, 11.)