Rilb'al li na'leb'

Rilb'al li xtusulal naʼlebʼ

Tzolom 33: Ke'kamk sa' li Kaqi Palaw

Tzolom 33: Ke'kamk sa' li Kaqi Palaw

K'ARU yook chi k'ulmank sa' li eetalil? Laj Moises yook xtiikankil li palaw rik'in li xche'. Eb' laj Israel ke'kole'k rik'in laj Moises. Ab'an, laj Faraon ut eb' laj puub' yookeb' chi kamk sa' ha'. Qilaq chanru ke'xk'ul a'in.

Ebʼ laj Egipto yookebʼ chi kamk

Jo' ak xqatzol, laj Faraon kixkanab'eb' chi xik eb' laj Israel toj sa' xlaje li rahilal. Ke'elk chaq Egipto 600.000 tana chi winq ut naab'al chi ixq ut kok'al. Jo'kan ajwi' naab'aleb' laj Egipto ke'elk chaq xb'aan naq ke'xpaab' li Jehob'a. Ke'risi chaq eb' li xketomq, eb' li xkarneer ut eb' li xchib'aat.

Naq ak elkeb' chaq re laj Israel, ke'xpatz' reheb' laj Egipto raq'eb', oor ut plaat. Eb' laj Egipto ke'xk'e chixjunil li ke'xpatz' eb' laj Israel. Xb'aan naq toj yookeb' xxiw xb'aan li xlaje rahilal li ke'xk'ul chaq.

Naq eb' laj Israel ke'wulak sa' li kaqi palaw, ke'ok chi hilank. Laj Faraon ut eb' laj Egipto yookeb' xyeeb'al: ‹K'a'ut naq xqakanab'eb' chi xik eb' li qamoos?›

Jo'kan naq laj Faraon ut eb' laj puub' koheb' chirixeb' laj Israel. Ke'xk'am 600 li b'eleb'aal ch'iich' li sik'b'ileb' ru, jo' ajwi' chixjunileb' li xb'eleb'aal ch'iich' eb' laj Egipto.

K'ajo' naq ke'xuwak eb' laj Israel naq ke'ril ru laj Faraon ut eb' laj puub'! Ke'xk'oxla naq maab'ar chik te'xkol rib', xb'aan naq chiruheb' wank li kaqi palaw ut yookeb' chaq chi chalk eb' laj Egipto. Ab'an li Jehob'a kixk'e li choql sa' xyiheb' laj Israel ut eb' laj Egipto. Jo'kan naq, eb' laj Egipto ink'a' chik ke'ru chi wulak b'arwi' wankeb' laj Israel.

Li Jehob'a kixye re laj Moises: ‹Ye' laawuq' sa' xb'een li palaw›. Naq laj Moises kixb'aanu, li Jehob'a kixtaqla chaq jun li kawil iq' ut kixjach rib' li palaw.

Chaqi li b'e naq ke'ok chi nume'k eb' laj Israel sa' xyi li palaw. Ab'an ke'b'ayk chi nume'k, xb'aan naq naab'aleb' ut naab'aleb' ajwi' eb' li xketomq. Naq eb' laj Egipto ke'ril wi' chik ruheb' laj Israel koheb' chirixeb' ut ke'ok sa' li palaw.

Naq eb' laj Egipto wankeb' sa' li palaw, li Yos ki'ok xjuk'b'al eb' li xb'eleb'aal ch'iich'. Jo'kan naq ke'xuwak ut ke'ok xyeeb'al: ‹Li Jehob'a yook chi yalok qik'in, sa' xk'ab'a' li xtenamit. Elenqo sa' li palaw!› Ab'an ink'a' chik ke'ru chi elelik.

Li Jehob'a kixye re laj Moises naq tixye' li ruq' sa' xb'een li palaw, jo' nak'utunk sa' li eetalil. Toja' naq li palaw kisutq'iik sa' xna'aj ut eb' laj Egipto ut eb' li xb'eleb'aal ch'iich' ke'muqunk rub'el ha'. Chixjunileb' laj puub' wankeb' sa' li palaw. Maajun reheb' kikole'k!

K'ajo' naq ke'saho'k sa' xch'ool eb' laj Israel! Jo'kan naq eb' li winq ke'ok chi b'ichank re xb'anyoxinkil re li Jehob'a naq ke'kole'k: ‹Li Jehob'a naxnaw yalok. Kixkuteb' sa' palaw eb' li kawaay ut eb' laj puub'›. Li xMiriam, ranab' laj Moises, kirisi chaq jun li tzojtzoj tun ut eb' li rech-ixqilal koheb' chirix. Yookeb' chi xajok ut yookeb' chi b'ichank ut ke'xye ajwi': ‹Li Jehob'a naxnaw yalok. Kixkuteb' sa' palaw eb' li kawaay ut eb' laj puub'›.

Éxodo 12-15.



Ebʼ li patzʼom

  • Jarub’eb’ li winq aj Israel ke’elk chaq Egipto? Aniheb’ chik ke’elk rik’ineb’ li winq aj Israel?
  • K’aru kixye laj Faraon naq ak koheb’ laj Israel? Chirix chik a’an, k’aru kixb’aanu laj Faraon?
  • K’aru kixb’aanu li Jehob’a re xkolb’al li xtenamit?
  • K’aru kik’ulmank naq laj Moises kixye’ li xxuq’ sa’ b’een li palaw? K’aru ke’xb’aanu laj Israel?
  • K’aru ke’xk’ul eb’ laj Egipto naq ke’ok sa’ li palaw?
  • K’aru ke’xb’aanu eb’ laj Israel naq li Jehob’a kixkoleb’?

Chaasume ajwiʼ ebʼ li patzʼom aʼin

  • Chaawil li naxye Éxodo 12:33-36.

    Chanru kirosob’tesi li Jehob’a li xtenamit xb’aan naq ra ke’xk’ul chaq Egipto? (Éxo. 3:21, 22; 12:35, 36.)

  • Chaawil li naxye Éxodo 14:1-31.

    Chanru nokooxtenq’a Éxodo 14:13, 14 naq tchalq li Armagedon? (2 Cró. 20:17; Sal. 91:8.)

  • Chaawil li naxye Éxodo 15:1-8, 20, 21.

    K’a’ut us naq li neke’paab’ank re li Jehob’a tento naq te’b’ichanq chiru? (Éxo. 15:1, 2; Sal. 105:2, 3; Apoc. 15:3, 4.)

    Chanru ke’xkanab’ jun chaab’il eetalil li xMiriam ut li rech-ixqilal cho’q reheb’ li ixq li neke’xpaab’ li Jehob’a? (Éxo. 15:20, 21; Sal. 68:12.)