Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 29: K'a'ut Ki'elelik laj Moises?

Tzolom 29: K'a'ut Ki'elelik laj Moises?

LAJ Moises yook chi elelik. Ma nakaanaw k'a'ut ke'raj xkamsinkil laj Moises? Qilaq k'a'ut yookeb' xtaqenkil.

Laj Moises yook chi elelik ut yook xkanabʼankil li tenamit Egipto

Laj Moises kik'iik sa' rochoch laj Faraon, jo'kan naq wank xwankil ut wank xnawom. Ab'an naxnaw naq a'an aj Israel ut moko xkomoneb' ta laj Egipto.

Laj Moises wank 40 chihab' re naq xko rilb'al chanru wankeb' li xkomon. Laj Moises kiril naq ra wankeb' laj Israel. Jun laj Egipto yook xsak'b'al jun reheb' laj Israel. Naq laj Moises kiril naq maa'ani yook chi ilok re, kixkamsi laj Egipto. Toja' naq kixmuq rub'el li samahib'.

Naq kisaqewk, laj Moises xko wi' chik chi rilb'aleb' laj Israel. Kixk'oxla naq truuq xtenq'ankileb' re naq te'xkanab' wank cho'q xmooseb' laj Egipto. Naq kiril wiib' laj Israel yookeb' xsak'b'al rib'eb' kixye: ‹K'a'ut nakaasak' laakomon?›

Kichaq'ok li winq li yook chi sak'ok: ‹Ani xyehok aawe naq tatraqoq aatin sa' qab'een? Ma tinaakamsi jo' xaakamsi laj Egipto?›

K'ajo' naq kixuwak laj Moises xb'aan naq kixk'e reetal naq ak neke'xnaw chik li kixb'aanu re laj Egipto. Ut naq laj Faraon kirab'i naq laj Moises kixkamsi laj Egipto, kixtaqla xkamsinkil. Jo'kan naq ki'elelik laj Moises.

Naq laj Moises ki'elk Egipto, kiwulak sa' jun najtil tenamit, Madian xk'ab'a'. Sa' li tenamit a'in kixnaw ru laj Jetro ut li xjunkab'al. Chirix chik a'an kisumlaak rik'in xZipora, jun reheb' li xrab'in laj Jetro. Laj Moises ki'ok rilb'aleb' li xkarneer laj Jetro. Ka'k'aal chihab' kiwank laj Moises sa' li tenamit Madian. Sa' li jun chik tzolom tqanaw k'aru kixk'ul laj Moises naq wank 80 chihab' re.

Éxodo 2:11-25; Hechos 7:22-29.



Ebʼ li patzʼom

  • B’ar kik’iik laj Moises? Ut k’aru naxnaw chirixeb’ li xna’ xyuwa’?
  • K’aru kixb’aanu laj Moises naq wank 40 chihab’ re?
  • Naq wiib’eb’ laj Israel yookeb’ chi pleetik, k’aru kixye laj Moises reheb’? Chanru kichaq’ok laj Israel li yook chi sak’ok?
  • K’a’ut ki’elelik laj Moises?
  • Sa’ k’aru tenamit kiwulak laj Moises naq ki’elk chaq Egipto? Ani kixnaweb’ chaq ru aran?
  • K’aru kixb’aanu laj Moises chiru li 40 chihab’ naq kiwank chaq Madian?

Chaasume ajwiʼ ebʼ li patzʼom aʼin

  • Chaawil li naxye Éxodo 2:11-25.

    Usta laj Moises kik’iik sa’ rochoch laj Faraon, chanru kixk’utb’esi naq tiik xch’ool chiru li Jehob’a ut chiruheb’ laj Israel? (Éxo. 2:11, 12; Heb. 11:24.)

  • Chaawil li naxye Hechos 7:22-29.

    K’aru naqatzol chirix laj Moises naq kixtaqla rib’ xjunes chi xkolb’aleb’ laj Israel sa’ ruq’eb’ laj Egipto? (Hech. 7:23-25; 1 Ped. 5:6, 10.)