Rilb'al li na'leb'

Rilb'al li xtusulal naʼlebʼ

Tzolom 26: Laj Job Tiik Xch'ool Chiru li Yos

Tzolom 26: Laj Job Tiik Xch'ool Chiru li Yos

TOQ'OB' ru li winq nujenaq sa' xox! A'an laj Job. Li ixq li wank chiru laj Job a'an li rixaqil. Li rixaqil laj Job yook xyeeb'al re: ‹Maajewa li Yos ut tatkamq›. K'a'ut naq li rixaqil laj Job kixye a'in? Ut k'a'ut kichalk li rahilal sa' xb'een laj Job?

Laj job wank xox chirix

Laj Job tiik xch'ool chiru li Jehob'a. Laj Job kiwank sa' li tenamit Uz. Li tenamit a'in, moko najt ta wank chiru Canaan. Li Jehob'a naxra laj Job. Ab'an, ma nakaanaw ani xik' na'ilok re laj Job?

Laj Tza a'an li musiq'ej li xik' na'ilok re li Jehob'a. A'an kixb'aanu naq laj Adan ut x'Eva te'xq'et Raatin li Yos. Laj Tza kixk'oxla ajwi' naq truuq xb'aanunkil naq chixjunileb' te'xq'et Raatin li Yos. Ab'an, ma kiru laj Tza xb'aanunkil a'in? Ink'a' kiru xb'aanunkil. Qajultikaq naq ke'wank winq ut ixq tiikeb' xch'ool chiru li Yos. Ma jultik aawe aniheb' xk'ab'a'?

Laj Job chik kikanaak naq kikamk laj Jacob ut laj Jose. Laj Job jwal tiik xch'ool chiru li Jehob'a sa' chixjunil li Ruuchich'och'. Li Jehob'a kiraj xk'utb'al chiru laj Tza naq moko truuq ta xb'aanunkil naq chixjunileb' yiib'aqeb' ru xna'leb'. Jo'kan naq kixye re laj Tza: ‹Chaawil laj Job. Tiik xch'ool chiwu›.

Laj Tza kixye re li Yos: ‹Laj Job tiik xch'ool chaawu, xb'aan naq nakaawosob'tesi. Ab'an wi taamaq' chixjunil chiru, tatxmaajewa›.

Jo'kan naq li Jehob'a kixye re laj Tza: ‹Maq' chixjunil chiru ut rahob'tesi ab'an maakamsi. Ut aran tqil ma tinxmaajewa›.

Jo'kan naq laj Tza kixb'aanu naq te'relq'a li xketomq, eb' li xkameey ut te'kamq eb' li xkarneer. Kixb'aanu naq te'kamq li 10 chi ralal xk'ajol sa' jun kaqsut-iq'. Chirix chik a'an kixk'e li yajel a'in chirix laj Job. Nim li xrahilal laj Job, jo'kan naq li rixaqil kixye: ‹Maajewa li Yos ut tatkamq›. Ab'an laj Job moko kixb'aanu ta li kixye li rixaqil. Ut oxib'eb' li neke'xye naq ramiiw, ke'xye re laj Job naq yook xtojb'al rix li maa'usilal li kixb'aanu chaq. Ab'an laj Job moko kixkanab' ta wank sa' tiikilal chiru li Yos.

Laj Job kixsahob'resi xch'ool li Jehob'a. Li Yos kirosob'tesi laj Job kixk'irtesi ut kixk'e 10 chik ralal xk'ajol. Jo'kan ajwi' kixk'e ka'sut xk'ihal li xketomq, li xkarneer ut li xkameey chiru li kiwank chaq najter. Jo' li nakaawil sa' li eetalil.

Wi tiikaq aach'ool chi junelik chiru li Jehob'a, jo' kixb'aanu chaq laj Job. Li Yos tatrosob'tesi ajwi' ut tixk'e aayu'am chi junelik naq li Ruuchich'och' twulaq jo' li na'ajej Eden.

Job 1:1-22; 2:1-13; 42:10-17.

Laj Job ut li xjunkabʼal


Ebʼ li patzʼom

  • Ani laj Job?
  • K’aru kixyal xb’aanunkil laj Tza? Ut ma kiru xb’aanunkil?
  • K’aru kixkanab’ li Jehob’a naq tixb’aanu laj Tza? Ut k’a’ut naq li Jehob’a kixkanab’ naq laj Tza tixb’aanu a’in?
  • K’a’ut naq li rixaqil laj Job kixye: ‹Maajewa li Yos ut tatkamq?› (Chaawil li eetalil.)
  • Chanru ki’osob’tesiik laj Job? K’a’ut naq ki’osob’tesiik? (Chaawil li jun chik eetalil.)
  • Wi tiikaq qach’ool chiru li Jehob’a jo’ kixb’aanu laj Job, k’aru li osob’tesiik tqak’ul?

Chaasume ajwiʼ ebʼ li patzʼom aʼin

  • Chaawil li naxye Job 1:1-22.

    Chanru tooruuq xk’amb’al qe rik’in laj Job? (Job 1:1; Fili. 2:15; 2 Ped. 3:14.)

  • Chaawil li naxye Job 2:1-13.

    K’aru kixb’aanu laj Job naq laj tza kixyal rix? Ut k’aru kixye li rixaqil laj Job naq kiril li rahilal a’in? (Job 2:9, 10; Pro. 19:3; Miq. 7:7; Mal. 3:14.)

  • Chaawil li naxye Job 42:10-17.

    K’aru xjuntaq’etalil li osob’tesink kixk’ul laj Job rik’in li kixk’ul li Jesus xb’aan naq tiikeb’ xch’ool? (Job 42:12; Fili. 2:9-11.)

    Chanru naxkawresi qach’ool naq laj Job ki’osob’tesiik xb’aan naq tiik xch’ool? (Job 42:10, 12; Heb. 6:10; Sant. 1:2-4, 12; 5:11.)