Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 25: Li Xjunkab'al laj Jacob Xko Egipto

Tzolom 25: Li Xjunkab'al laj Jacob Xko Egipto

LAJ Jose ink'a' chik kixkuy xyaab', jo'kan naq kixye reheb' li xmoos: ‹Elenqex chiwu!› Naq laj Jose kikanaak rochb'eeneb' li ras ki'ok chi yaab'ak. K'ajo' naq ke'sach xch'ool chi rilb'al. Ink'a' neke'xnaw k'aru naxk'ul. Toja' naq kixye laj Jose reheb' li ras: ‹Laa'in laj Jose. Ma toj yo'yo linyuwa'?›

Sachsookeb' xch'ool ke'kanaak ut ink'a' ke'xsume. K'ajo' naq ke'xuwak. Jo'kan naq laj Jose kixye reheb': ‹B'aanumaq usilal, jilonqex chaq!› Naq ke'jilok, kixye reheb': ‹Laa'in laj Jose, leeriitz'in, li ke'k'ayi reheb' laj Egipto›.

Laj Jose ki'aatinak sa' tuulanil rik'ineb' li ras ut kixye reheb': ‹Moko laa'ex ta wank eere naq xineek'ayi. Li Yos kik'amok chaq we Egipto, re xkolb'aleb' li qas qiitz'in. Laj Faraon kixk'e inwankil sa' li tenamit Egipto. Yemaq chaq re linyuwa' re naq tchalq›.

Toja' naq laj Jose kixq'aluheb' ut kixtz'ub'eb' ru li ras. Naq laj Faraon kirab'i naq eb' li ras laj Jose ke'wulak Egipto, kixye re laj Jose: ‹Xk'amaqeb' li b'eleb'aal ch'iich' re naq te'xk'am chaq laayuwa' ut chixjunileb' laakomon ut chalqeb' sa' li tenamit a'in. Tink'e reheb' li xchaab'ilal ru li na'ajej li wank Egipto›.

Jo'kan naq kichalk chixjunil li xjunkab'al laj Jacob sa' li tenamit Egipto. Sa' li eetalil nak'utunk naq laj Jose yook xq'alunkil li xyuwa'.

Eb' li ralal ut eb' li ri laj Jacob 70 chixjunileb' naq ke'wulak Egipto. Koheb' ajwi' li ixaqilb'ej ut naab'aleb' li moos. Chixjunileb' ke'kanaak Egipto. Ke'k'ab'a'iik cho'q eb' aj Israel, xb'aan naq li Yos kixjal xk'ab'a' laj Jacob cho'q aj Israel. Chi jo'kan ke'kanaak cho'q xtenamit li Yos.

Génesis 45:1-28; 46:1-27.

Laj Jose ut li xjunkabʼal


Ebʼ li patzʼom

  • K’aru kik’ulmank naq laj Jose kixye xyaalal reheb’ li ras?
  • K’aru kixch’olob’ laj Jose sa’ tuulanil chiruheb’ li ras?
  • K’aru kixye laj Faraon naq kirab’i naq eb’ li ras laj Jose wankeb’ Egipto?
  • Chanru xnimal li xjunkab’al laj Jacob li xko chirix sa’ li tenamit Egipto?
  • K’aru li k’ab’a’ej kik’ehe’k re li xjunkab’al laj Jacob? Ut k’a’ut naq ke’reechani li k’ab’a’ej a’in?

Chaasume ajwiʼ ebʼ li patzʼom aʼin

  • Chaawil li naxye Génesis 45:1-28.

    Chanru naqanaw naq li Jehob’a naru tooxtenq’a naq yooqeb’ qarahob’tesinkil? (Gén. 45:5-8; Isa. 8:10; Fili. 1:12-14.)

  • Chaawil li naxye Génesis 46:1-27.

    Naq laj Jacob xko Egipto, chanru kiwaklesiik xch’ool xb’aan li Jehob’a? (Chaawil Gén. 46:1-4.)