Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 22: Laj Jose Wank sa' Tz'alam

Tzolom 22: Laj Jose Wank sa' Tz'alam

LAJ Jose wank 17 chihab' re naq kik'ame'k Egipto. Sa' li tenamit a'in laj Potifar kiloq'ok re laj Jose. Laj Potifar a'an xmoos laj Faraon, li awab'ej re Egipto.

Laj Jose wank saʼ tzʼalam

Laj Jose kik'anjelak chi kaw sa' rochoch laj Potifar. Naq kiwinqilo'k laj Jose, laj Potifar kixkanab' sa' ruq' chixjunil li wank sa' rochoch. Ab'an, k'a'ut wank sa' tz'alam laj Jose? Sa' xmaak li rixaqil laj Potifar.

Laj Jose ch'ina'us na'ilok. Jo'kan naq li rixaqil laj Potifar kiraj naq laj Jose tyoklaaq rik'in. Laj Jose ink'a' kiraj xb'aan naq naxnaw naq nimla maak xb'aanunkil a'in. Jo'kan naq kichalk xjosq'il li rixaqil laj Potifar. Li ixq kixye re li xb'eelom: ‹Maa'us xna'leb' laj Jose, kiraj inmuxb'al!› Laj Potifar kixpaab' re li rixaqil. Jo'kan naq kichalk xjosq'il ut kixk'e sa' tz'alam laj Jose.

Laj k'aak'alenel tz'alam kixk'e reetal naq laj Jose chaab'il xna'leb'. Jo'kan naq kixkanab' sa' ruq' laj Jose chixjunileb' li wankeb' sa' tz'alam. Moqon chik laj Faraon kixk'e sa' tz'alam laj k'ehol uk'a' ut laj yiib'anel kaxlan wa. Sa' jun q'oqyink, eb' li wiib' chi winq a'in ke'matk'ek, ab'an ink'a' ke'xnaw xyaalal eb' li xmatk'. Naq kisaqewk laj Jose kixye reheb': ‹Seeraq'imaq we leematk'›. Li Yos kitenq'ank re laj Jose chi xnawb'al xyaalal eb' li matk'.

Laj Jose kixye re laj k'ehol uk'a': ‹Sa' oxib' kutan tat-elq sa' tz'alam ut tat-oq wi' chik chi k'anjelak chiru laj Faraon›. Kixye ajwi' re: ‹Chat-aatinaq chiwix rik'in laj Faraon re naq tinrisi sa' tz'alam›. Re laj yiib'anel kaxlan wa kixye: ‹Sa' oxib' kutan laj Faraon tatxkamsi›.

Naq kiwulak li oxib' kutan ke'xk'ul tz'aqal jo' kixye laj Jose. Laj Faraon kixkamsi laj yiib'anel kaxlan wa. Ut kirisi sa' tz'alam laj k'ehol uk'a' ut ki'ok wi' chik chi k'anjelak chiru li awab'ej. Ab'an, laj k'ehol uk'a' kisach sa' xch'ool aatinak chirix laj Jose rik'in laj Faraon, jo'kan naq laj Jose toj kikanaak sa' tz'alam.

Génesis 39:1-23; 40:1-23.



Ebʼ li patzʼom

  • Jarub’ chihab’ wank re laj Jose naq kik’ame’k Egipto? K’aru kixk’ul laj Jose naq kiwulak Egipto?
  • K’a’ut wank sa’ tz’alam laj Jose?
  • K’aru li k’anjel kixb’aanu laj Jose sa’ tz’alam?
  • Naq laj Jose wank sa’ tz’alam, chanru kixtenq’a laj k’ehol uk’a’ ut laj yiib’anel kaxlan wa?
  • K’aru kixk’ul laj k’ehol uk’a’ naq ki’elk chaq sa’ tz’alam?

Chaasume ajwiʼ ebʼ li patzʼom aʼin

  • Chaawil li naxye Génesis 39:1-23.

    Sa’ xq’ehil laj Jose moko ak wank ta chaq li xchaq’rab’ li Yos chirix li muxuk ib’. Ab’an, k’a’ut naq ki’elelik laj Jose chiru li rixaqil laj Potifar? (Gén. 2:24; 20:3; 39:9.)

  • Chaawil li naxye Génesis 40:1-23.

    K’aru kixmatk’e laj k’ehol uk’a’ ut k’aru xyaalal? (Gén. 40:9-13.)

    K’aru kixmatk’e laj yiib’anel kaxlan wa ut k’aru xyaalal? (Gén. 40:16-19.)

    Chanru naxk’am re li moosej tiik xch’ool rik’in laj Jose? (Gén. 40:8; Sal. 36:10; Juan 17:17; Hech. 17:2, 3.)

    Chanru nokooxtenq’a Génesis 40:20 chi rilb’al ma us naq tqaninq’ehi ru xkutankil qayo’lajik? (Ecl. 7:1; Mar. 6:21-28.)