MA NAKAANAW aniheb' li winq wankeb' rik'in laj Jacob? Ak yook chi wulak laj Jacob sa' li tenamit Haran. Naq eb' li winq a'in yookeb' xk'aak'alenkil eb' li xkarneer chixk'atq jun li b'ekb'il ha'. Toja' naq laj Jacob kixye reheb': ‹B'ar nekexchalk?›

‹Laa'o aj Haran› chankeb'.

Kixye laj Jacob: ‹Ma nekeenaw ru laj Laban?›

Eb' li winq ke'xye: ‹Naqanaw ru. Chaawil yook chaq chi chalk li xrab'in laj Laban rik'ineb' li xkarneer›. Ma nakaawil li xRaquel sa' li eetalil?

Laj Jacob yook xnawbʼal ru li xRaquel

Naq laj Jacob kiril ru li xRaquel, kirisi chaq li pek sa' xb'een xjulel li ha' re naq te'uk'aq eb' li xkarneer. Laj Jacob kixtz'ub' ru xRaquel ut kixye re naq a'an xkomon. Kisaho'k sa' xch'ool li xRaquel ut kixye chaq re li xyuwa' li kixk'ul.

Laj Laban sa sa' xch'ool naq laj Jacob kikanaak sa' rochoch. Naq laj Jacob kixye naq traj sumlaak rik'in xRaquel, laj Laban kisaho'k sa' xch'ool. Laj Laban kixye re laj Jacob naq tk'anjelaq rik'in wuqub' chihab', re naq tsumlaaq rik'in li xRaquel. Laj Jacob kixk'ulub'a a'in, xb'aan naq naxra li xRaquel chi anchal xch'ool. Naq kiwulak xkutankil xsumlajikeb', ma nakaanaw k'aru kixb'aanu laj Laban?

Laj Laban kixsumub' li xLea rik'in laj Jacob cho'q reqaj li xRaquel. Li xLea asb'ej chiru xRaquel. Naq laj Jacob kixsume k'anjelak wuqub' chihab' chik rik'in laj Laban, kik'ehe'k ajwi' xRaquel cho'q rixaqil. Sa'eb' li kutan a'in li Yos kixkanab' naq eb' li winq te'xb'aanu a'in. Ab'an sa'eb' li qakutan, li Santil Hu naxye naq eb' li winq tento naq te'sumlaaq rik'in jun ajwi' li ixq.

Génesis 29:1-30.



Ebʼ li patzʼom

  • Chaawil li eetalil, ani li ixqa’al yook chaq chi chalk rik’ineb’ li karneer? Ut chanru kitenq’ank laj Jacob naq kiril li ixqa’al?
  • K’aru kixsume xb’aanunkil laj Jacob re naq tsumlaaq rik’in xRaquel?
  • K’aru kixb’aanu laj Laban naq kiwulak xkutankil xsumlajik laj Jacob ut li xRaquel?
  • K’aru kixye laj Jacob naq tixb’aanu re naq tsumlaaq rik’in xRaquel?

Chaasume ajwiʼ ebʼ li patzʼom aʼin

  • Chaawil li naxye Génesis 29:1-30.

    Chanru kixk’utb’esi laj Jacob naq chaab’il xna’leb’, usta kib’alaq’iik xb’aan laj Laban? Ut chanru tqak’am qe rik’in laj Jacob? (Gén. 25:27; 29:26-28; Mat. 5:37.)

    Rik’in li kixb’aanu laj Jacob, chanru naqanaw k’aru li tz’aqal rahok ut k’aru maawa’ tz’aqal rahok? (Gén. 29:18, 20, 30; Cant. de Cant. 8:6.)

    Aniheb’ li kaahib’ chi ixq ke’wank xk’uula’al rik’in laj Jacob? (Gén. 29:23, 24, 28, 29.)