MA NAKAANAW k'aru yook xb'aanunkil laj Abrahan? Chanchan naq ok re xkamsinkil li ralal! Ma nakaanaw k'a'ut? Aatinaqo xb'eenwa chirix li ralal laj Abrahan ut li xSara.

Laj Abrahan ok re xkamsinkil laj Isaac

Ma jultik aawe naq li Yos kixye naq tixk'e jun ralal laj Abrahan? Ab'an chanru te'wanq xk'uula'al laj Abrahan ut xSara xb'aan naq cheekeb' chik. Laj Abrahan naxnaw naq maak'a' ch'a'aj chiru li Yos. Qilaq chanru kik'ulmank a'in.

Ak jun chihab' xnumik naq li Yos kixye re laj Abrahan naq twanq jun ralal. Naq kiyo'laak li k'uula'al a'in; laj Abrahan wank 100 chihab' re ut li xSara 90 chihab'. Aj Isaac ke'xk'e cho'q xk'ab'a' li k'uula'al. Chi jo'kan kitz'aqlok ru li kixye li Jehob'a.

Ak nim chik laj Isaac, naq li Jehob'a kixyal rix li xpaab'al laj Abrahan. Li Jehob'a kixye: ‹Abrahan!› Ut laj Abrahan kichaq'ok: ‹Arin wankin!› Toja' naq li Yos kixye re: ‹K'am laawalal, li jun chaawu, sa' li tzuul li tinye aawe. Aran taakamsi ut taamayeja chiwu›.

K'ajo' naq kiraho'k sa' xch'ool laj Abrahan, xb'aan naq jwal naxra li ralal! Ma jultik aawe naq li Yos kixye re laj Abrahan naq sa' li tenamit Canaan te'wanq li ralal xk'ajol? Chan raj ru kik'ulmank a'in wi kikamk raj laj Isaac? Usta laj Abrahan ink'a' kixtaw ru k'aru yook chi k'ulmank, ki'ab'ink chiru li Yos.

Naq laj Abrahan kiwulak sa' li tzuul, kixb'ak' laj Isaac ut kixtolob' b'arwi' tixmayeja. Toja' naq kirisi li xch'iich' re xkamsinkil li ralal. Sa' li hoonal a'an, li x'anjel li Yos kixye re: ‹Abrahan! Abrahan!› Kichaq'ok laj Abrahan: ‹Arin wankin!›

Toja' naq li Yos kixye re: ‹Maach'e' laawalal. Anaqwan ninnaw naq kaw laapaab'al, xb'aan naq ink'a' xaaram laawalal chiwu›.

Laj Abrahan kaw xpaab'al jo'kan naq ch'olch'o chiru naq li Jehob'a tixwaklesi wi' chik chi yo'yo laj Isaac. Li Jehob'a ink'a' kiraj naq laj Abrahan tixkamsi laj Isaac. Jo'kan naq li Jehob'a kixb'aanu naq tt'ilq jun li karneer sa' xyanq li che'. Ut kixye re laj Abrahan naq tixmayeja li karneer a'in cho'q reqaj laj Isaac.

Génesis 21:1-7; 22:1-18.



Ebʼ li patzʼom

  • K’aru kixyeechi’i li Yos re laj Abrahan? Ut chanru kixb’aanu li Yos li kixyeechi’i re laj Abrahan?
  • Jo’ nak’utunk sa’ li eetalil, chanru kiyale’k rix li xpaab’al laj Abrahan?
  • K’aru kixb’aanu laj Abrahan, usta ink’a’ kixtaw ru k’a’ut naq li Yos kiraj naq tixkamsi laj Isaac?
  • K’aru kik’ulmank naq laj Abrahan kirisi chaq li xch’iich’ re xkamsinkil li ralal?
  • Chanru xpaab’al laj Abrahan?
  • K’aru kixk’e li Yos re laj Abrahan re naq tixmayeja? Chanru kixb’aanu a’in li Yos?

Chaasume ajwiʼ ebʼ li patzʼom aʼin

  • Chaawil li naxye Génesis 21:1-7.

    K’a’ut naq laj Abrahan kixset xtz’uumal xtz’ejwal li ralal naq waqxaqib’ kutan xyo’lajik? (Gén. 17:10-12; 21:4.)

  • Chaawil li naxye Génesis 22:1-18.

    Chanru kixk’utb’esi laj Isaac naq ki’ab’ink chiru li xyuwa’? Ut k’aru kixk’utb’esi a’in? (Gén. 22:7-9; 1 Cor. 5:7; Fili. 2:8, 9.)