NAAB'AL li ch'a'ajkilal kichalk sa' xb'eeneb' laj Adan ut x'Eva naq ke'isiik sa' li ch'ina'usil na'ajej. Ke'ok chi k'anjelak chi kaw re naq te'wanq xtzakahemq. Moko ke'ril ta chik chaab'il che', ka'aj chik pim ut k'ix ke'xtaw. Chixjunil a'in ke'xk'ul, xb'aan naq ke'xq'et Raatin li Yos ut ke'xkanab' ajwi' wank cho'q Ramiiw.

Laj Adan kaw yook chi kʼanjelak rikʼin li ralal

Ma nakaanaw k'aru ke'ok xk'ulb'al laj Adan ut x'Eva? Ke'ok chi kamk. Ma jultik aawe naq li Yos kixye reheb' naq te'kamq wi te'xlow ru li che'? Sa' li kutan ajwi' a'an naq ke'xlow ru li che' ke'ok chi kamk. Naq ink'a' ke'xpaab' li Yos ke'xk'utb'esi naq maak'a'eb' xna'leb'.

Moko wankeb' ta chik laj Adan ut x'Eva sa' li na'ajej Eden naq ke'yo'laak chixjunileb' xkok'al. Jo'kan naq ke'ok chi tiixk ut chi kamk.

Wi laj Adan ut x'Eva ke'xpaab' raj li Yos, a'aneb' ut eb' li ralal xk'ajol saheb' raj sa' xch'ool ut ke'wank raj xyu'am chi junelik sa' Ruuchich'och'. Maa'ani raj kicheeko'k, kiyajerk chi moko kikamk ta raj.

Li Yos naraj naq twanq qayu'am chi junelik. Naraj naq ch'ina'usaq chixjunil li Ruuchich'och' ut maak'a'aq chik li yajel. Li Yos naraj ajwi' naq chixjunileb' te'wanq cho'q Ramiiw ut te'wanq sa' amiiwil chirib'ileb' rib'. Jo'kan naq twulaq xq'ehil naq li Yos tixb'aanu chixjunil a'in.

Li xʼEva wank rikʼinebʼ li xkokʼal

Li x'Eva kixkanab' wank cho'q Ramiiw li Yos. Jo'kan naq sa' rahilal ut raasa ke'yo'laak li ralal xk'ajol. Naab'al li rahilal kixk'ul x'Eva xb'aan naq kixq'et Raatin li Yos.

Naab'aleb' ralal xk'ajol ke'wank laj Adan ut li x'Eva. Li xk'ab'a' li xb'een ralal a'an aj Cain ut li xkab' aj Abel. Ma nakaanaw, k'aru ke'xk'ul laj Cain ut laj Abel?

Génesis 3:16-23; 4:1, 2; Apocalipsis 21:3, 4.



Ebʼ li patzʼom

  • Chanru xyu’ameb’ laj Adan ut li x’Eva naq ke’isiik sa’ li Eden?
  • K’aru ki’ok xk’ulb’al laj Adan ut x’Eva ut k’a’ut?
  • K’a’ut naq ke’ok chi cheekob’k ut chi kamk eb’ li ralal xk’ajol laj Adan ut li x’Eva?
  • Wi laj Adan ut x’Eva ke’xpaab’ raj li Jehob’a, chan raj ru xyu’ameb’? Ut chan raj ru xyu’ameb’ li ralal xk’ajol?
  • K’aru li rahilal kixk’ul x’Eva naq kixq’et Raatin li Yos?
  • Chanru xk’ab’a’ li xb’een ut li xkab’ ralal laj Adan?
  • Aniheb’ li kok’al wankeb’ rik’in laj Adan ut x’Eva? (Chaawil li eetalil.)

Chaasume ajwiʼ ebʼ li patzʼom aʼin

  • Chaawil li naxye Génesis 3:16-23 ut 4:1, 2.

    K’aru li ch’a’ajkilal ki’ok xk’ulb’al laj Adan naq li Yos kixtz’eqtaana li ch’och’? (Gén. 3:17-19; Rom. 8:20, 22.)

    Sa’ li aatinob’aal Hebreo Eva naraj xyeeb’al: «wank li yu’am». K’a’ut naq xk’ulub’ x’Eva li xk’ab’a’ej a’in? (Gén. 3:20.)

    K’a’ut naq li Jehob’a kiroxloq’iheb’ laj Adan ut li x’Eva usta ke’maakob’k chiru? (Gén. 3:7, 21.)

  • Chaawil li naxye Apocalipsis 21:3, 4.

    K’aru li maa’usilal taawulaq raj chaawu naq trisi li Yos?