Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 1: Li Yos Kiyoob'tesink re Chixjunil

Tzolom 1: Li Yos Kiyoob'tesink re Chixjunil

CHIXJUNIL li us kichalk rik'in li Yos. Re naq twanq li kutan, li Yos kixyiib' li Saq'e, ut re naq too'iloq sa' q'oqyink kixyiib' li Po ut eb' li chahim. Ut kixyiib' li Ruuchich'och' re naq toowanq chisa'.

Li Yos kixyiib' chixjunil a'in. Ab'an, ma nakaanaw k'aru kixb'aanu xb'eenwa? Xb'eenwa kixyoob'tesiheb' li anjel re naq te'wanq rik'in sa' choxa. Eb' li anjel ink'a' naqileb' ru, jo' naq ink'a' naqil ru li Yos.

Li xb'een anjel li kixyoob'tesi li Yos a'an li Ralal ut moko jo' ta li junch'ol chi anjel. Li anjel a'in, kixtenq'a li xyuwa' chi xyiib'ankil chixjunil. Ke'xb'aanu li Saq'e, li Po, eb' li chahim ut li Ruuchich'och'.

Ma nakaanaw chanru li Ruuchich'och' sa' xtiklajik? Sa' xtiklajik maak'a' chaq li yu'am, xb'aan naq li Ruuchich'och' nujenaq chi ha'. Li Yos kiraj naq eb' li poyanam te'wanq sa' Ruuchich'och', jo'kan naq ki'ok xyiib'ankil chi'us. Ab'an, chanru kixb'aanu?

Ki'ajmank naq twanq kutan sa' li Ruuchich'och'. Jo'kan naq li Yos kixk'e li Saq'e re naq twanq kutan ut q'oqyink. Chirix chik a'an kixtaqsi li ch'och' sa' xb'een li nimla palaw.

Sa' xtiklajik maak'a' wank chaq sa' xb'een li Ruuchich'och'. Chanchan li eetalil a'in. Maak'a' chaq uutz'u'uj, ninqi che', xul, chi moko kar sa'eb' li nimla palaw. Jo'kan naq li Yos ki'ok chi k'anjelak chi kaw re naq us te'wanq li poyanam ut eb' li xul sa' li Ruuchich'och'.

Jeremías 10:12; Colosenses 1:15-17; Génesis 1:1-10.

Maakʼaʼ chaq li yuʼam saʼ ruuchichʼochʼ


Ebʼ li patzʼom

  • B’ar kichalk chixjunil li us? K’a’ut nakaaye a’an?
  • K’aru kixyoob’tesi li Yos xb’eenwa?
  • K’a’ut naq li Yos jwal naxra li xb’een anjel?
  • Chanru li Ruuchich’och’ sa’ xtiklajik? (Chaawil li eetalil.)
  • Chanru ki’ok li Yos xyiib’ankil li Ruuchich’och’?

Chaasume ajwiʼ ebʼ li patzʼom aʼin

  • Chaawil li naxye Jeremías 10:12.

    Chanru nokooxtenq’a li yoob’tesihom chi xnawb’al ru chi’us li Yos? (Isa. 40:26; Rom. 11:33.)

  • Chaawil li naxye Colosenses 1:15-17.

    Naq li Yos kixb’aanu chixjunil li k’a’aq re ru, k’aru li k’anjel kixk’e re li Jesus? Jo’kan naq, k’aru nakaak’oxla chirix li Jesus?

  • Chaawil li naxye Génesis 1:1-10.

    Ani kiyiib’ank re li Ruuchich’och’? (Gén. 1:1.)

    K’aru kixyoob’tesi li Yos sa’ li xb’een «kutan»? (Gén. 1:3-5.)

    K’aru kixyoob’tesi li Yos sa’ li xkab’ «kutan»? (Gén. 1:7, 8.)